Kenijki techpaleuiya Jehová matitlaxikokan

1. ¿Tleka noneki titlaxikoskej, niman tlenon techpaleuis matitlaxikokan? (1 Pedro 5:10).

IPAN yejuin itlamiyan tonaltin nochimej itekipanojkauan Jehová noneki tlaxikoskej. Sekimej kipiyaj kokolistli tlen xkipiya pajtli, oksekimej yonomijkatijkej niman oksekimej kintlaueltokaj inchanejkauan noso tekiuajkej (Mat. 10:​18, 36, 37). Kuajli xmatsto ika maski san tlenon tikixnamiktika Jehová mitspaleuis xtlaxiko (xpoua 1 Pedro 5:10).

2. ¿Tleka ueli titlaxikouaj akin tiktekichiuiliaj Jehová?

² Titlaxikos kijtosneki timelajkanemis itech Jehová niman tiktekichiuilis ika pakilistli maski ijkuak itlaj tikixnamikis, mitstlaueltokaskej noso mitstlatlataskej. Para titlaxikoskej, noneki tikneltokaskej ika ajsis tonajli ijkuak kuajli tinemiskej. Akin tiktekichiuiliaj Jehová xtitlaxikouaj ipampa tokojtilis, titlaxikouaj pampa Jehová techmaka kojtilistli “tlen xakaj ueli kipiya” (2 Cor. 4:7). Ipan yejuin tlamachtijli, tikimitaskej naui tlapaleuilistin tlen yotechinmakak Jehová niman ijkon uelis titlaxikoskej niman kenijki uelis ika titopaleuiskej.

TEOYOTL

3. ¿Tleka tikijtouaj ika se milagro pampa ueli tiknotsaj Jehová?

³ Jehová yotechmakak itlaj tlen melak ueyi kijtosneki niman ijkon uelis titlaxikoskej. Maski titlajtlakolejkej, yejua yokichiuj matiuelikan matiknotsakan (Heb. 4:16). Matikonnemilikan yejuin: san kemanon uelis tiknotsaskej Jehová niman san tlenon uelis tikijliskej. Yejua uelis techkakis maski san katlejua tlajtojli ika matiknotsakan niman san kanon matinemikan, maski tla xtinemij imiuan tokniuan noso maski tla titsauktokej (Jon. 2:​1, 2; Hech. 16:​25, 26). Yejua ueli kasikamati tlen tikijliaj maski ijkuak xkuajli tiktenkixtiaj tlen tiknekij tikijliskej pampa melak tiajmankamikij (Rom. 8:​26, 27). ¿Xmelak ika se milagro pampa ueli tiknotsaj Jehová?

4. ¿Tleka kuajli tla tiktlajtlaniliaj Jehová matechpaleui para matitlaxikokan?

⁴ Ipan iTlajtol, Jehová techijlia ika maski “san tlinon tiktlajtlaniliskej ken yejua kineki, yejua techkakis” (1 Juan 5:14). Kuakon, ¿kuajli tla tiktlajtlaniliaj matechpaleui matitlaxikokan? Kema, pampa yejua kineki matitlaxikokan. ¿Kenijki tikmatij? Pampa ipan Biblia kijtoua ika ijkuak tikxikouaj tlen tikixnamikij, Jehová ueli kinankilia Satanás, akin kipijpinaujtia (Prov. 27:11). Noijki techijlia ika yejua sa kinektok kinkojtilis “on yejuan itech kitlaliaj nochi inyojlo” (2 Crón. 16:9). Kuakon, kuajli matikmatstokan ika Jehová ueltok niman kinektok techpaleuis matitlaxikokan (Is. 30:18; 41:10; Luc. 11:13).

5. ¿Kenijki techpaleuiya teoyotl matiyolseujtokan? (Isaías 26:3).

⁵ Biblia kinyolchikaua akin kitekichiuiliaj Jehová makichiuilikan teoyotl niman makijlikan tlen kimajmana, niman toTajtsin kinmakas “yolseuilistli tlen xakaj ueli kasikamati. Yejon yolseuilistli kitlajpiyas nemoyojlo niman nemotlamachilis” (Filip. 4:7). ¡Yejuin melak tiktlasojkamatij! Tlaltikpakchanejkej akin xkitekichiuiliaj Jehová san tlemach kichiuaj niman ijkon kimilkauaskej intlaueluan niman achijtsin yolseuiskej. San matikonteneuakan yejuin, sekimej kiyejyekouaj kikixtiskej ipan intsontekon nochi tlen kinemiliaj niman hasta on tlen kimajmana. San ika, yejon melak temojti pampa uelis kichiuas ika demonios makalakikan ipan intlamachilis (uelis tikitas Mateo 12:​43-45). Niman maski tlaltikpakchanejkej achijtsin yolseuij ika yejuin tlen kichiuaj, xkipiyaj on yemelak yolseuilistli tlen Jehová techmaka ijkuak tikchiuiliaj teoyotl. Tejuamej titlaneltokaj itech Jehová, niman yejua kitlajpiya totlamachilis niman toyojlo ijkuak kichiua matikpiyakan yolseuilistli (xpoua Isaías 26:3). ¿Kenijki kichiua? Ijkuak techpaleuiya matikimilnamikikan seki tlaxeloltin itech Biblia kampa nesi ika melak techtlasojtla niman kineki techpaleuis (Sal. 62:​1, 2).

6. ¿Tlenon uelis tikchiuaskej niman ijkon más matechpaleui teoyotl? (Noijki xkita tlaixkopinajli).

⁶ Tlen uelis tikchiuaskej. Ijkuak tikixnamikiskej itlaj tlen ouijtika, matikchiuilikan teoyotl Jehová. Matikijlikan nochi tlen techajmana, matiktlajtlanilikan matechyolseui niman matechmaka tlamachilistli para tikmatiskej tlenon tikchiuaskej (Sal. 55:22; Prov. 2:​10, 11). Xsan noneki tiktlatlaujtiskej Jehová para matechpaleui matitlaxikokan, noijki noneki tiktlasojkamachiliskej (Filip. 4:6). Matikitakan kenijki techpaleuiya Jehová ijkuak itlaj tikixnamikij, niman matiktlasojkamachilikan ipampa yejon. Maka matijkauilikan ika tlen xkuajli topan panoua makichiua maka matikitakan nochi tlen Jehová kichiua topampa (Sal. 16:​5, 6).

BIBLIA

7. ¿Kenijki techpaleuis matitlaxikokan tla tikamapouaj Biblia?

⁷ Jehová yotechmakak iTlajtol niman ijkon techpaleuis matitlaxikokan. Ompa tikinnextiaj miyek tlaxeloltin tlen techititiaj ika Jehová techpaleuis. Se matikitakan, Mateo 6:8 kijtoua: “NemoTajtsin yekimati tlenon mechpoloua maski tla xenenkitlajtlaniliaj”. Yejuin Jesús okijto, niman yejua melak kuajli kixmatstika Jehová xijkon ken okse yakaj. Kuakon, ijkuak itlaj tikixnamikiskej, kuajli matikmatstokan ika Jehová kimatstika tlenon techpoloua niman yejua techpaleuis. Biblia kiteneua miyek tlen kualtsin panos ika tlayekapan tlen techkojtilia matitlaxikokan (Sal. 94:19).

8. a) Xteneua se tlaxelojli tlen techpaleuiya matitlaxikokan b) ¿Tlenon techpaleuis matikilnamikikan tlaxeloltin ijkuak itlaj tikixnamikiskej?

⁸ Biblia noijki kiteneua seki tlen techpaleuiya matitlaxikokan. Tlen Biblia techmachtia techpaleuiya matikpiyakan tlamachilistli niman ijkon matiktlapejpenikan tlen kuajli (Prov. 2:​6, 7). Matikonteneuakan yejuin, ipan Biblia techijlia ika maka san matitlanemilijtokan itech tlen uelis panos ika tlayekapan niman mojmostla matitlaneltokakan itech Jehová (Mat. 6:34). Tla mojmostla tikamapouaj Biblia niman itech titlanemiliaj, techpaleuis matikilnamikikan tlen yotiuelkej ipan Biblia ijkuak itlaj tikixnamiktoskej.

9. ¿Kenijki techpaleuiya tla titlanemiliaj itech tlen inpan opanok itekipanojkauan Jehová akin yeuejkaui onenkej?

⁹ Biblia noijki kiteneua tlen inpan opanok sekimej tlaltikpakchanejkej akin katkaj ijkon ken tejuamej. Yejuamej otlaneltokakej itech Jehová niman yejua okinpaleui (Heb. 11:​32-34; Sant. 5:17). Ijkuak titlanemiliaj itech tlen inpan opanok, más titlaneltokaj itech Jehová. “Yejua totemanauijkau niman yejua toyolchikaualis. Yejua nochipa nemi touan para techpaleuiya san kamanon ijkuak tlajtlamach xkuajli topan nochiua” (Sal. 46:1). Tla tikitaj kenijki otlaneltokakej niman otlaxikojkej itekipanojkauan toTajtsin akin yeuejkaui onenkej, tiknekiskej tikchiuaskej ken yejuamej (Sant. 5:​10, 11).

10. ¿Tlenon uelis tikchiuaskej niman ijkon más matechpaleui Biblia?

¹⁰ Tlen uelis tikchiuaskej. Mojmostla matikamapouakan toBiblia niman matikchiuakan se lista itech tlaxeloltin tlen tikitaskej ika uelis techpaleuiskej. Miyekej tokniuan kiamapouaj texto diario ika kualkan, pampa ijkon kipiyaj itlaj tlen kualtsin itech tlanemiliskej ipan yejon tonajli. Yejuin tlen okipaleui se tokniuj siuatl akin itoka Marie.a Itajuan okimijlijkej ika kipiayaj cáncer, niman ononek kintlajpiyas ipan yejon metstin ijkuak ok yoltoyaj. Marie kijtoua: “Mojmostla ika kualkan nikamapouaya texto diario niman itech nitlanemiliaya. Yejon onechpaleui mojmostla manitlanemili itech Jehová niman itech nochi tlen kualtsin techmachtia ipan iTlajtol, niman maka sa manitlanemilijto itech tlen xkuajli nikixnamiktoya” (Sal. 61:2).

TOKNIUAN

11. ¿Tleka techyolchikaua tikmatiskej ika tokniuan kixikouaj tlen kixnamikij?

¹¹ Jehová yotechinmakak miyekej tokniuan itech nochi tlaltikpaktli niman ijkon techpaleuis matitlaxikokan. Techyolchikaua tikmatiskej ika ipan nochi tlaltikpaktli miyekej tokniuan noijki tlajyouiyaj ken tejuamej titlajyouiyaj (1 Ped. 5:9). ¿Tleka techyolchikaua? Pampa ijkuak tikitaj ika yejuamej noijki kixnamikij tlen tejuamej tikixnamikij niman yotlaxikojkej, techpaleuiya kuajli matikmatstokan ika tejuamej noijki uelis titlaxikoskej maski san tlenon tikixnamikiskej (Hech. 14:22).

12. ¿Kenijki uelis techpaleuiskej tokniuan, niman kenijki uelis tikinpaleuiskej? (2 Corintios 1:​3, 4).

¹² Tokniuan noijki uelis techpaleuiskej ika tlen kijtouaj niman ika tlen kichiuaj. Miyekej tokniuan yejon tlen okichiujkej ipampa apóstol Pablo. Ijkuak yejua tsauktoya ichan, miyekej tokniuan melak okipaleuijkej, niman ipan icartas okintokayoti niman okintlasojkamachili pampa okiyolseuijkej niman okiyolchikaujkej (Filip. 2:​25, 29, 30; Col. 4:​10, 11). Ipan yejuin tonaltin, tokniuan noijki uelis techyolchikauaskej niman techpaleuiskej matitlaxikokan, niman tejuamej noijki uelis ijkon tikchiuaskej ipampa (xpoua 2 Corintios 1:​3, 4).

13. ¿Tlenon okipaleui se tokniuj akin itoka Maya matlaxiko?

¹³ Matikitakan tlen ipan opanok se tokniuj siuatl akin chanti Rusia niman itoka Maya. Ipan 2020, sekimej policías okalakkej ichan niman otlatejtemojke. Sakin, Maya okuikakej ixpan tekiuajkej pampa tenojnotsaya itech tlen kineltoka. ¿Kenijki okipaleuijkej tokniuan? Yejua kijtoua: “Ipan yejon tonaltin, melak ninajmanaya, najmankamikiya niman yonisiaujka. San ika, tokniuan nechuajnotsayaj, nechtlajkuilouiliayaj niman nechijliayaj ika melak nechtlasojtlaj”. Noijki kijtoua: “Yenikmatstoya ika tokniuan melak nechtlasojtlayaj niman ika yeskiaj ken nochanejkauan, san ika, desde ipan 2020 más kuajli yonikitak ika yejon yemelak”.

14. ¿Tlenon uelis tikchiuaskej niman ijkon titopaleuiskej intech tokniuan? (Noijki xkita tlaixkopinajli).

¹⁴ Tlen uelis tikchiuaskej. Ijkuak tikixnamikiskej tlen ouijtika, matinemikan nisiuj tokniuan. Matikilnamikikan ika nochipa uelis tikintlajtlaniliskej tlayekankej matechpaleuikan, pampa yejuamej yeskiaj ken “kampa niyanalo ijkuak chikauak ajaka noso chikauak ajakakiaui” (Is. 32:2). Aman tej, maka matikilkauakan ika tokniuan noijki kixnamikij tlen ouijtika. Tla tikpaleuiyaj yakaj akin kixnamiktika tlen ouijtika, tiyolpakiskej, niman yejon techpaleuis matikxikokan tlen tejuamej tikixnamiktokej (Hech. 20:35).

TLEN TIKCHIAJ IKA TLAYEKAPAN

15. ¿Kenijki okipaleui Jesús tlen kichiuaya tlayekapan, niman tejuamej kenijki techpaleuiya? (Hebreos 12:2).

¹⁵ Jehová techijlia ika tlen tikchiaj ika tlayekapan yemelak nochiuas niman yejon techpaleuiya matitlaxikokan (Rom. 15:13). Matikilnamikikan ika ijkuak Jesús onen ipan tlaltikpaktli ouel otlaxiko ijkuak okixnamik tlen melak ouijtika pampa sa kichiatoya tlen Jehová yokijlijka kichiuas (xpoua Hebreos 12:2). Yejua kimatstoya ika tla melajkanemiya, kiteititiskia ika xmelauak katka nochi tlen Satanás okijtouili Jehová. Noijki, sa kinektoya oksejpa nemis iuan iTaj ne iluikak niman sa kichiatoya on tonajli ijkuak peuaskia tekiuajtis iuan tlapejpeniltin. Noijki ijkon, tla tikmatstokej ika ajsis tonajli ijkuak nochipa tinemiskej ipan se kualtsin xochitlalpan, techpaleuis matikxikokan maski san tlenon tikixnamikiskej ipan yejuin tlaltikpaktli tlen kiyekana Satanás.

16. ¿Kenijki okipaleui se tokniuj tlen Jehová yotechijli techmakas, niman tlenon tiuelij itech tlen okijto?

¹⁶ Matikitakan kenijki pampa tikchiaj nochipa tinemiskej ipan se kualtsin xochitlalpan okipaleui se tokniuj akin itoka Anna niman chanti Rusia. Iueuentsin okajsikej niman okitsakuatoj chika kichiaya makijlikan tlenon panoskia iuan. Anna kijtoua: “Ouel onitlaxiko pampa nochipa nikchiuaya teoyotl niman nitlanemiliaya itech tlen Jehová yotechijli techmakas. Nikmatstika ika tlen xkuajli tikixnamikij ontlamis. Jehová kintlanis itlauelikniuan niman techteochiuas”.

17. ¿Kenijki uelis tikteititiskej ika tiktlasojkamatij tlen Jehová yotechijli techmakas ika tlayekapan?

¹⁷ Tlen uelis tikchiuaskej. Matikxelokan tiempo niman ijkon matitlanemilikan itech tlen Jehová yotechijli techmakas ika tlayekapan. Matitlanemilikan itech nochi kualtsitsintin tlateochiualistin tlen tikinseliskej ipan xochitlalpan. Tla ijkon tikchiuaj, tikitaskej ika nochi tlen aman techtlajyouiltia “san panotikisa niman xyetik” (2 Cor. 4:17). Noijki, matokojtilikan tikinnojnotsaskej oksekimej itech tlen tikneltokaj. Matikonnemilikan kenijki nomachiliaj tlaltikpakchanejkej akin xkitekichiuiliaj Jehová. Yejuamej noijki inpan nochiua miyek tlen xkuajli, san ika, yejuamej xkimatij nochi tlen kualtsin kichiuas Jehová ika tlayekapan. Kanaj xnonekis melak miyek tikimijliskej para makinekikan más kimatiskej itech tlen Jehová yotechijli techmakas.

18. ¿Tleka uelis tikneltokaskej ika Jehová yemelak kichiuas tlen yokijto?

¹⁸ Sakin ika Job yotlaxikojka niman yokiteititijka ika melajkanemiya, ijkin okijli Jehová: “Nejua nikmatstikaj ika tejua nochi tiueli tikchiua, niman xakaj ueli mitskaualtia tikchiuas on tlen tikneki” (Job 42:2). Job okajsikamat ika xtlaj uelis kiteltis Jehová makichiua tlen yokijto. Ijkuak tikajsikamatij yejon, techmaka kojtilistli para titlaxikoskej. Se neskayotl, matikonnemilikan ika se siuatl youejkauj kualo niman melak yonosiaujkauj pampa yokimitato miyekej tlapajtijkej niman nion se xouel okipajti. San ika, se tonajli okinexti se tlapajtijketl akin melak ueltok niman kijlia tlenon kichiua makualo, noijki kijlia tlenon uelis kipaleuis más kuajli manomachili. Maski kimatstika ika xnimantsin pajtis, yejua yolseui, niman xok melak ouijtika kita kixikos ikokolis pampa aman kimatstika ika uelis pajtis. Noijki ijkon, tejuamej ueli tikxikouaj nochi tlen tikixnamikij pampa tikmatstokej ika yemelak yejkos on tonajli ijkuak tichantiskej ipan xochitlalpan ijkon ken Jehová yotechijli.

19. ¿Tlenon techpaleuis matitlaxikokan?

¹⁹ Ken yotikitakej, Jehová yotechmakak teoyotl, Biblia, tokniuan niman tlen tikchiaj ika tlayekapan para matitlaxikokan. Tla tikintekitiltiaj, Jehová techpaleuis matikxikokan san tlenon tikixnamikiskej hasta ijkuak kipopoloskej tlaltikpaktli tlen kiyekana Satanás niman nochi tlen techtlajyouiltia (Filip. 4:13).