Xneltoka ika Jehová mitstlasojtla

1. ¿Tleka otimosentemakak itech Jehová? (Noijki xkimita tlaixkopinaltin).

¿TIKILNAMIKI ijkuak otimosentemakak itech Jehová? Ijkon otikchiuj pampa kuajli otikixmat niman melak otiktlasojtlak. Noijki otikijli ika nochipa tikchiuas tlen yejua kineki niman ika nochipa tiktlasojtlas ika nochi moyojlo, moalma, motlamachilis niman ika nochi mokojtilis (Mar. 12:30). Desde ijkuakon opeuj más tiktlasojtla Jehová. Niman tla yakaj mitstlajtoltiskia tla yemelak tiktlasojtla Jehová, kanaj nimantsin ijkin tiknankiliskia: “¡Xakaj nion xtlaj más niktlasojtla ijkon ken Jehová, san yejua melak niktlasojtla!”.

2, 3. ¿Tlenon kineki Jehová? (Jeremías 31:3). ¿Tlenon tikitaskej ipan yejuin tlamachtijli?

² San ika, ¿kenijki titenankiliskia tla yakaj mitstlajtoltiskia “¿Kenijki tikmatstok tla Jehová mitstlasojtla?”? Kanaj mitstekiyomakas nimantsin titenankilis pampa kanaj tikmachilia ika xmitsnamiki mamitstlasojtla Jehová. Se tokniuj siuatl akin xokitlasojtlakej ijkuak pitentsin katka, okijto: “Nejua melak niktlasojtla Jehová, niman yejon kuajli nikmatstok. San ika, miyekpa ninotlajtoltia tla yejua noijki nechtlasojtla”. San ika, ¿tlenon kimachilia Jehová motech?

³ Jehová kineki kuajli xmatsto ika yejua melak mitstlasojtla (xpoua Jeremías 31:​3, TNM).a Yejua kineki iuan xmouika, ika yejon, itech omitsuajuikak. Niman ijkuak itech otimosentemakak niman otimoapolakti omitsmakak itlaj tlen melak kualtsin: itlasojtlalis tlen xtekaua. Yejon kijtosneki ika Jehová nochipa mitstlasojtlas niman xkeman mitskauas. Pampa yejua melak mitstlasojtla mitsita ken yakaj tlen melak patioj (Mal. 3:17). Jehová xkineki xnemili ika xmitstlasojtla, yejua kineki xmomachili ijkon ken apóstol Pablo onomachili, akin okijto: “Pampa kuajli nikmatstika ika nion mikilistli nion nemilistli, nion ángeles nion gobiernos, nion tlen aman onka nion tlen sakin onias, nion akin kipiyaj poder, nion tlen onka tlakpak, nion tlen onka kampa tlauejkatlan, nion okse tlen toTajtsin okichijchiuj xuelis techxelos itech itlasojtlalis” (Rom. 8:​38, 39). Ipan yejuin tlamachtijli, tikitaskej tleka melak noneki kuajli matikmatstokan ika Jehová melauak techtlasojtla niman tlenon techpaleuis kuajli matikneltokakan.

TLEKA NONEKI XNELTOKA IKA JEHOVÁ MITSTLASOJTLA

4. ¿Tlenon kineki Satanás matiknemilikan niman tlenon uelis tikchiuaskej para tikixnamikiskej?

⁴ Tla kuajli tikmatstokej ika Jehová techtlasojtla uelis timelajkanemiskej ijkuak Satanás kinekis techkajkayauas (Efes. 6:11). ¿Tlenon kitekitiltia Satanás para ijkon techkajkayauas niman maka sa matiktekichiuilikan toTajtsin? Yejua kineki matiknemilikan ika Jehová xtechtlasojtla. Matikilnamikikan ika Satanás san kitstok kemanon techkajkayauas. Biblia kijtoua ika yeskia ken se león (1 Ped. 5:​8, 9). Miyekpa, leones kimajsij yolkamej akin xkojtikej niman xueli nomanouiyaj. Noijki ijkon, Diablo techixnamiki ijkuak kita ika xtikojtikej, yotisiaujkej, tajmanaj ipampa tlen yeuejkaui topan onochiuj, ijkuak itlaj topan nochiujtok noso ijkuak techmojtia tlen uelis topan panos (Prov. 24:10). Tla tiknekij tikxikoskej ijkuak Satanás techixnamiki, noneki tikixnamikiskej niman tikchiuaskej tlen techpaleuis kuajli matikneltokakan ika Jehová techtlasojtla (Sant. 4:7).

5. ¿Tleka melak noneki matikneltokakan ika Jehová techtlasojtla niman techpatiojkaita?

⁵ Tla kuajli tikneltokaj ika Jehová techtlasojtla, tiknekiskej más tiknisiuiskej. ¿Tleka ijkon tikijtouaj? Pampa Jehová otechchijchiuj ika matiuelikan matitetlasojtlakan niman matikmachilikan ika techtlasojtlaj. Ijkuak yakaj techititia ika techtlasojtla tejuamej noijki tiktlasojtlaj. Kuakon, ijkuak más tikmachiliskej ika Jehová techtlasojtla niman techpatiojkaita, más tiktlasojtlaskej (1 Juan 4:19). Niman ijkuak más tiktlasojtlaj yejua noijki más techtlasojtla, Biblia kijtoua: “Xnisiuikan Dios niman yejua mechnisiuis” (Sant. 4:8). Aman, matikitakan tlenon techpaleuis matikneltokakan ika Jehová techtlasojtla.

¿TLENON MITSPALEUIS XNELTOKA IKA JEHOVÁ MITSTLASOJTLA?

6. ¿Tlenon uelis tiktlajtlanilis Jehová tla xtikneltoka ika mitstlasojtla?

⁶ Miyekpa xtlajtlanili Jehová mamitspaleui xkajsikamati tleka mitstlasojtla (Luc. 18:1; Rom. 12:12). Kanaj ipan se tonajli nonekis miyekpa tiknotsas Jehová niman tiktlajtlanilis mamitspaleui xmoita ijkon ken yejua mitsita. Tla moyoltsin xueli kineltoka ika Jehová mitstlasojtla, xkilnamiki ika Jehová más kimati xijkon ken moyoltsin (1 Juan 3:​19, 20). Yejua kuajli mitsixmatstok niman kimatstok tlen kuajli tikchiua tlen tejua xueli tikita (1 Sam. 16:7; 2 Crón. 6:30). Kuakon, nochipa xkijli Jehová kenijki timomachilia niman xtlajtlanili mamitspaleui xneltoka ika mitstlasojtla (Sal. 62:8). Niman sakin ika yotiknots, noneki itlaj tikchiuas. Matikitakan seki tlen uelis tikchiuas.

7, 8. ¿Kenijki yejuin Salmos uelis techpaleuiskej matikneltokakan ika Jehová techtlasojtla?

⁷ Xneltoka tlen mitsijlia Jehová. Jehová okinmakak iespíritu santo akin okijkuilojkej Biblia, kuakon, nochi tlen kijtoua Biblia itech Jehová yemelak. Xkitakan tlen kualtsin okijto David: “ToTEKO nemi nisiu para kinyoltlalia on yejuan sanoyej noyolkokouaj, niman kinmakixtia on yejuan xok kipiyaj tlamachalistli” (Sal. 34:18). Ijkuak melak timajmanas, uelis tiknemilis ika xakaj mitsasikamati noso xakaj uelis mitspaleuis. San ika, Jehová yomitsijli ika mouan nemis pampa kimatstika ika ijkuakon más noneki mamitspaleuikan. Ipan okse salmo, David okijkuilo: “Tejua tikmati kech ika yonitlajyouij; tikmati keskipa yonichokak. ¿Tlen xtikijkuilojtiu ipan moamamox?” (Sal. 56:8). Jehová melak kipatiojkaita mixayo tlen yotiktoyauj, kentla kijkuiloskia ipan iamox. Yejua kilnamiki kechpa yotimoyolkoko niman yotichokak. David noijki ijkin okijli Jehová: “Tejua tikmati on ojtli yejuan niknejnemi” (Sal. 139:3). Jehová kita nochi tlen tikchiua, san ika, más kita tlen kualtsin tikchiua (Heb. 6:10). Yejua ijkon kichiua pampa kipatiojkaita nochi tlen tikchiua para tikyolpaktis.b

⁸ Ika yejuin tlaxeloltin tlen melak teyolchikauaj kentla Jehová mitsijliskia: “Nikneki xmatsto ika melak nimitstlasojtla niman nikneki nimitspaleuis”. San ika, ken yotikitakej, Satanás kineki matiknemilikan ika Jehová xtechtlasojtla. Ika yejon, tla kemantika timotlajtoltia tla Jehová mitstlasojtla, xnemili yejuin: “¿Akinon nikneltokas: Satanás akin tlakajkayaua noso toTajtsin akin kijtoua tlen melauak?” (Juan 8:44; Sal. 31:5).

9. ¿Tlenon yokimijli Jehová akin kitlasojtlaj? (Éxodo 20:​5, 6).

⁹ Xnemili tlenon kimachilia Jehová intech akin kitlasojtlaj. Xnemili tlen okijli Moisés niman israelitas (xpoua Éxodo 20:​5, 6). Jehová yokijto ika nochipa kimititis tlasojtlalistli tlen xtekaua akin kitlasojtlaj. Pampa yejua xtekaua, nochipa kintlasojtlas akin kitlasojtlaj (Neh. 1:5). Ika yejon, tla kemantika xtikneltoka tla Jehová mitstlasojtla, xmotlajtolti yejuin: “¿Niktlasojtla Jehová?”. Niman sakin xnemili yejuin: tla tejua tiktlasojtla niman timokojtilia tikyolpaktis, kuajli xmatsto ika yejua noijki mitstlasojtla (Dan. 9:4; 1 Cor. 8:3). Yejuin kijtosneki ika tla tejua kuajli tikmatstika ika tiktlasojtla, kuajli xmatsto ika yejua noijki melak mitstlasojtlas niman xkeman mitskauas.

10, 11. ¿Kenijki Jehová kineki xkita imikilis Cristo? (Gálatas 2:20).

¹⁰ Xnemili tleka Jehová okitemakak isenteKonetsin. Jehová yotechmakak se tetlayokolijli: okitemakak iKonetsin topampa (Juan 3:16). Yejua xsan okitemakak isenteKonetsin inpampa oksekimej, noijki okitemakak mopampa. Xtlanemili itech apóstol Pablo, ijkuak xenochiuaya inomachtijkauj Cristo melak miyek tlen xkuajli okichiuj niman sakin ononek iuan noxijxikos yejon (Rom. 7:​24, 25; 1 Tim. 1:​12-14). Maski ijkon, yejua kuajli okitak ika Jehová okitemakak iKonetsin ipampa (xpoua Gálatas 2:20). Xkilnamiki ika Jehová okitekitilti iespíritu santo para ijkon Pablo makijkuilo nochi yejuin tlajtoltin niman ijkon okichiuj pampa kineki itlaj techmachtis (Rom. 15:4). Yejua kineki xkita imikilis Jesús ken se tetlayokolijli tlen tejua yomitsmakak. Pampa tla ijkon tikita, mitspaleuis más xneltoka ika Jehová mitstlasojtla.

¹¹ Melak tiktlasojkamachiliaj Jehová pampa okuajtitlan isenteKonetsin mamikiki topampa. San ika, Jesús xsan otechmakixtiko. Yejua noijki ouajla para otechmachtiko kenijki iTaj niman tlenon kimachilia itech ikoneuan, yejon tlen amantsin tikitaskej (Juan 18:37).

JESÚS OKITEITITI IKA JEHOVÁ MITSTLASOJTLA

12. ¿Tleka uelis tikneltokaskej ika tlen Jesús okijto itech Jehová melauak katka?

¹² Ijkuak Jesús nemiya ipan tlaltikpaktli, melak kuelitaya kiteijlis kenijki Jehová (Luc. 10:22). Niman uelis tikneltokaskej ika nochi tlen okijto itech iTaj melauak katka. Jesús uejkaujtipan onen iuan iTaj ne iluikak, ika yejon, san yejua melak kuajli kixmatstika (Col. 1:15). Yejua kuajli okitak kenijki Jehová melak kintlasojtla ángeles akin melajkanemij niman nochimej ikoneuan akin nemij ipan tlaltikpaktli niman melajkanemij. Matikitakan kenijki tlen otemachti Jesús techpaleuiya más matikneltokakan ika Jehová techtlasojtla.

13. ¿Kenijki Jesús kineki matikitakan Jehová?

¹³ Jesús kineki matikitakan Jehová ijkon ken yejua kita: ken se Tajtli akin melak kualtsin tenotsa niman melak techtlasojtla. Ipan Evangelios okitokayoti Jehová “noTaj” más de 160 veces. Niman ijkuak kiminojnotsaya inomachtijkauan yejua kinkuiya yejuin tlajtoltin “nemoTaj” niman “nemoTajtsin akin nemi cielo” (Juan 20:17; Mat. 7:11). Ijkuak xeuajlaya Jesús ipan tlaltikpaktli, itekipanojkauan toTajsin akin melajkanemiyaj kitokayotiayaj Jehová, akin nochi ueli kichiua, akin más Ueyixtika niman toTlachijchiujkauj niman ika okseki tokayomej. San ika, Jesús miyekpa kitokayotiaya Jehová “noTaj”. Yejuin techititia ika Jehová kineki ika itekipanojkauan makimachilikan ika kintlasojtla ijkon ken se telpokatsin kimachilia ika itaj kitlasojtla. Matikitakan ome ijkuak Jesús okitekitilti tlajtojli “noTaj” para kiteneuas Jehová.

14. ¿Kenijki okiteititi Jesús ika tinochimej melak techpatiojkaita Jehová? (Mateo 10:​29-31; noijki xkita tlaixkopinajli).

¹⁴ Kachtopa, matikitakan tlen okijto Jesús ipan Mateo 10:​29-31 (xpoua). Ompa okijto ika toTajtsin kimatstok ijkuak se tototl uajuetsi. Tla Jehová kintlajpiya yejuin yolkatsitsintin akin nion xkitekichiuiliaj niman xkitlasojtlaj, san matiknemilikan kenijki melak najmana ipampa nochimej itekipanojkauan akin kiueyichiuaj pampa kitlasojtlaj. Jesús noijki okijto ika toTajtsin kimati kech totson tikpiyaj. Yejuin kijtosneki ika Jehová melak kuajli techixmatstok, kuakon, kuajli matikmatstokan ika yejua melak najmana topampa. Kuajli nesi ika Jesús kineki matikmatstokan ika toTaj iluikakchane melak techpatiojkaita.

15. ¿Tlenon mitsmachtia itech Jehová tlen kijtoua Juan 6:44?

¹⁵ Matikitakan ijkuak Jesús oksejpa okitekitilti tlajtojli “noTaj” niman yejon tiknextiaj ipan Juan 6:44 (xpoua). Ken tikita moTaj iluikakchane okichiuj xkixmati pampa okitak ika kuajli tikpiaya moyojlo (Hech. 13:48). Ijkuak Jesús okinteneuj tlajtoltin tlen uajlauj ipan Juan 6:44 kanaj kijtojtoya tlen Jehová okijto ipan Jeremías 31:3. Ompa Jehová ijkin okijli ikalpan: “Notech onimitsuajuikak ika tlasojtlalistli tlen xtekaua” (Jer. 31:​3, TNM; uelis tikitas Oseas 11:4). Xnemili: moTaj iluikakchane ok melak mitstlasojtla niman yejon kijtosneki ika kitstok tlen kualtsin tikpiya niman tlen kualtsin tikchiua maski tejua xtikita.

16. a) ¿Tlenon otemachti Jesús, niman tleka uelis tikneltokaskej? b) ¿Tlenon techpaleuis matikneltokakan ika Jehová yejua akin más kuajli Tajtli? (Xkita recuadro “San Jehová melak kuajli Tajtli”).

¹⁶ Jesús yotechmachti kenijki iTaj, kuakon, kentla techijlijtoskia: “Jehová xsan nejua noTaj; tejua noijki moTaj. Niman nikneki xmatsto ika yejua melak mitstlasojtla niman kineki mitspaleuis”. Ika yejon, tla kemantika xtikneltoka tla Jehová mitstlasojtla, xkilnamiki tlen Jesús okijto niman xneltoka, pampa yejua nochipa kijtoua tlen melauak niman san yejua melak kuajli kixmatstika iTaj (1 Ped. 2:22).

XMOKOJTILI MÁS XNELTOKA IKA JEHOVÁ MITSTLASOJTLA

17. ¿Tleka noneki más matikneltokakan ika Jehová techtlasojtla?

¹⁷ Ken yotikitakej, Satanás se totlauelikniuj akin melak tlamachilise niman san tlemach kichiua para maka sa matiktekichiuilikan Jehová. Yejua xkineki matitlaneltokakan itech Jehová, ika yejon, kineki matiknemilikan ika Jehová xtechtlasojtla. ¡Maka matijkauilikan matechkajkayaua! (Job 27:5). Yejua ika, matokojtilikan más matikneltokakan ika Jehová techtlasojtla.

18. ¿Tlenon mitspaleuis más kuajli xneltoka ika Jehová mitstlasojtla?

¹⁸ Ipan yejuin tlamachtijli yokitakej seki tlen mitspaleuis más xneltoka ika Jehová mitstlasojtla. Tejua uelis tiktlajtlanilis Jehová mamitspaleui xmoita ken yejua mitsita niman xtlanemili ipan seki tlaxeloltin kampa kiteititiaj ika Jehová melak kintlasojtla itekipanojkauan. Noijki mitspaleuis tla tikilnamiki ika Jehová nochipa kitlasojtlas akin kitlasojtla. Maka xkilkaua ika uelis tikitas imikilis Jesús ken se tetlayokolijli tlen tejua yomitsmakak Jehová. Niman xkilnamikto ika Jehová moTaj, ijkon ken okijto Jesús. Kuakon, ijkuak yakaj mitstlajtoltis “¿Kuajli tikmatstika ika Jehová mitstlasojtla?”, nimantsin tiknankilis: “¡Kema! Niman mojmostla ninokojtilia para nikititis ika noijki niktlasojtla”.