TLAMACHTIJLI 35
TLAKUIKAJLI 121 Noneki matoteltikan
Tlen techpaleuis maka matikchiuakan tlen xkuajli tikileuiyaj
“Maka xkauilikan ika tlajtlakojli makiyekana nemotlalnakayo tlen ueli miki para xnenkichiuaskej tlen nenkileuiyaj” (ROM. 6:12).
TLEN TIKITASKEJ
Tlen techpaleuis maka melak matitajmanakan ijkuak tikileuiskej tlen xkuajli niman noijki matikmapeuakan tlen ueliskia kichiuas matitlajtlakokan.
1. ¿Iuan tlenon titoxijxikouaj tinochimej?
¿KEMANTIKA yotikileuijka tikchiuas itlaj tlen xkuelita Jehová? Tla kema, kanaj tiknemilia ika san tejua ijkon mopan nochiua, yejua ika, melak timajmana. San ika, Biblia kijtoua: “Nochi tlen nenkileuiyaj para nenkichiuaskej se tlajtlakojli san noijki tlen kileuiyaj oksekimej” (1 Cor. 10:13). Yejuin kijtosneki ika xsan tejua ijkon mopan panoua, miyekej tokniuan noijki noxijxikotokej iuan tlen xkuajli kileuiyaj. Niman maka xkilkaua ika Jehová mitspaleuis xpopolo tlen xkuajli tikileuiya.
2. ¿Kanaj iuan tlenon noxijxikotokej sekimej tokniuan niman akin kemach nomachtijtokej? (Noijki xkimita tlaixkopinaltin).
2 Biblia noijki kijtoua: “Sano yejua on xkuajli ieleuilis sen tlakatl kitlatlata para ma tlajtlako ijkuak ieleuilis kiyekana hasta kijtlakouilia itlamachilis” (Sant. 1:14). Yejuin kijtosneki ika tinochimej tikpiyaj tlenon ika titoxijxikouaj. Sekimej tokniuan niman sekimej akin kemach nomachtijtokej Biblia kanaj kileuiyaj auilnemiskej, noijki se tlakatl uelis kileuis notekas iuan se tlakatl noso se siuatl uelis kileuis notekas iuan okse siuatl. Sekimej kanaj yokikajkaujkej kitaskej pornografía, san ika, oksejpa kileuiyaj kitaskej. Niman sekimej kinekij oksejpa kinotlaliliskej drogas noso tlauaniskej. Kanaj kemantika tinochimej yotomachilijkaj ken apóstol Pablo, akin okijto: “Ijkuak nikneki nikchiuas tlen kuajli, más nechyoltilana nikchiuas tlen xkuajli” (Rom. 7:21).
San kemanon niman san kanon uelis tikpiyaskej se tetlatlatalistli. (Xkita párrafo 2).c
3. ¿Kenijki uelis nomachilis yakaj akin noxijxikojtika iuan tlen xkuajli kileuiya?
3 Tla tejua miyekpa timoxijxikojtika iuan tlen xkuajli tikileuiya, kanaj tikmachilia ika xuelis titlaxikos niman pampa tikileuiya itlaj tlen xkuajli, tiknemilia ika xok tikyolpaktia Jehová. ¡San ika, yejon xmelauak! ¿Tleka ijkon tikijtouaj? Ipan yejuin tlamachtijli tiknankiliskej yejuin: 1) ¿akinon kineki ijkon xmomachili? niman 2) ¿tlenon techpaleuis maka matikchiuakan tlen xkuajli tikileuiyaj?
KENIJKI KINEKI SATANÁS MATITOMACHILIKAN
4. a) ¿Tlenon kineki Satanás matiknemilikan? b) ¿Tleka tikmatij ika uelis titlaxikoskej ijkuak tikileuiskej tlen xkuajli?
4 Satanás kineki matiknemilikan ika xuelis titlaxikoskej ijkuak tikileuiskej tlen xkuajli. Ika yejon, Jesús ijkin okijto matiktlajtlanilikan Jehová: “Xtechpaleui para maka titlajtlakoskej niman xtechmakixti itech akin Xkuajli” (Mat. 6:13). Niman Satanás kijtoua ika ijkuak techyoltilanas tlen xkuajli, tejuamej xtiktlakamatiskej Jehová (Job 2:4, 5). ¿Tleka ijkon kijtoua Satanás? Pampa yejua akin kachtopa okinokauili makiyekana tlen xkuajli kileuiya niman xokitlakamat toTajtsin. Kuakon, yejua kinemilia ika noijki ijkon tikchiuaskej ken yejua. Xsan yejon, noijki hasta okijto ika iKoneuj toTajtsin akin xkipiaya tlajtlakojli, kichiuaskia tlen xkuajli kileuiya (Mat. 4:8, 9). San ika, ¿yemelak xuelis tikxikoskej tlen xkuajli tikileuiyaj? Tikmatij ika uelis titlaxikoskej pampa apóstol Pablo ijkin okijto: “Nochi ueli nikchiua pampa toTajtsin nechmaka poder” (Filip. 4:13).
5. ¿Kenijki tikmatij ika Jehová kuajli kimatstika ika uelis tikxikoskej tlen xkuajli tikileuiyaj?
5 Jehová xijkon ken Satanás, yejua kimatstika ika uelis tikxikoskej tlen xkuajli tikileuiyaj. ¿Tleka ijkon tikijtouaj? Pampa Jehová yokijtojka ika miyekej melajkanemiskiaj niman makisaskiaj ipan ueyi tlajyouilistli. Xnemili yejuin: Jehová yokijto ika miyekej kalakiskej ipan xochitlalpan niman kitlalijtiaskej intlaken “istakej”, yejon kijtosneki ika yochipajkanenkej. Niman yejua xtekajkayaua (Apoc. 7:9, 13, 14). Kuakon, Jehová kuajli kimatstika ika uelis tikxikoskej tlen xkuajli tikileuiyaj.
6, 7. ¿Tlenon noijki kineki Satanás matikneltokakan?
6 Satanás noijki kineki matikneltokakan ika pampa tikileuiyaj tlen xkuajli xok uelis tikyolpaktiskej Jehová niman xtikseliskej nemilistli tlen xkeman tlamis. ¿Tleka Satanás kineki ijkon matikneltokakan? Pampa kimatstika ika Jehová xok keman kiselis niman ika kipopoloskej (Gén. 3:15; Apoc. 20:10). Satanás melak technexikolita pampa tejuamej kema uelis tikpiyaskej nemilistli tlen xkeman tlamis. Ika yejon, kineki matomachilikan ken yejua niman maka matikpiyakan tlamachialistli. Biblia kijtoua ika Jehová kineki techpaleuis niman ijkon uelis nochipa tinemiskej. Pampa yejua ijkin kijtoua: “Nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9).
7 Ken yotikitakej, Satanás yejua akin kineki matikneltokakan ika xuelis tikxikoskej tlen xkuajli tikileuiyaj noso ika Jehová xtechselis ipampa tlen kemantika xkuajli tikileuiyaj. Tikilnamikiskej akin kineki ijkon matitlanemilikan, techpaleuis maka san no tejuamej matoyolkokokan. ¡Maka xkauili ika Satanás makichiua ijkon xmomachili! (1 Ped. 5:8, 9).
¿KENIJKI UELIS TITOMACHILISKEJ PAMPA TITLAJTLAKOLEJKEJ?
8. ¿Tlenon noijki uelis kichiuas matiknemilikan ika xtiueliskej tikmapeuaskej tlen xkuajli tikileuiyaj noso ika Jehová xtechselis? (Salmo 51:5; noijki xkita “Tlen noneki matikmatikan”).
8 Ijkon ken Satanás, noijki onka okse tlen kichiua matiknemilikan ika xtiueliskej tikmapeuaskej tlen xkuajli tikileuiyaj noso ika Jehová xtechselis. ¿Tlenon tikteneujtokej? Tlajtlakojli tlen otechpanoltilijkej Adán niman Eva (Job 14:4; xpoua Salmo 51:5).a
9, 10. a) ¿Kenijki onomachilijkej Adán niman Eva ijkuak otlajtlakojkej? (Noijki xkita tlaixkopinajli). b) ¿Kenijki titomachiliaj pampa titlajtlakolejkej?
9 Matontlanemilikan kenijki onomachilijkej Adán niman Eva ijkuak otlajtlakojkej. Sakin, ika xokitlakamatkej Jehová oniyankej niman okichijchiujkej intlaken tlen ika notlapachoskej. Yejuamej ijkon okichiujkej pampa tlajtlakojli okichiuj manotlajtlakoltikan, maajmankamikikan, manomojtikan niman mapinauikan. Adán niman Eva xok keman ueliskiaj nouikaskiaj iuan Jehová. Kuakon, pampa otlajtlakojkej, maski san tlenon kichiuaskiaj, yejuamej nochipa notlajtlakoltiskiaj, ajmankamikiskiaj, nomojtiskiaj niman pinauiskiaj.
10 Ken yotikitakej tejuamej xtinemij ken Adán niman Eva. Yejuamej xuelis kinpaleuis imikilis Cristo, san ika, tejuamej kema, niman uelis techtlapojpoluiliskej totlajtlakoluan niman kuajli touikaskej iuan toTajtsin (1 Cor. 6:11). San ika, pampa titlajtlakolejkej, kemantika noijki titotlajtlakoltiaj, tiajmankamikij, titomojtiaj niman tipinauij. Niman Biblia kijtoua ika tlajtlakojli xkeman techkaua, maski tla tejuamej xotitlajtlakojkej “ijkon ken otlajtlako Adán” (Rom. 5:14). San ika, maka matiknemilikan ika pampa titlajtlakolejkej xuelis tikxikoskej tlen xkuajli tikileuiyaj noso ika xuelis tikyolpaktiskej Jehová. ¿Tlenon techpaleuis maka ijkon matitlanemilikan?
Sakin ika Adán niman Eva otlajtlakojkej, opeuj ajmankamikij, xok intech tlaneltokayaj niman pinauiyaj. (Xkita párrafo 9).
11. ¿Kenijki techpaleuis Romanos 6:12 tla tikmachiliaj ika xuelis tikxikoskej tlen xkuajli tikileuiyaj?
11 Pampa titlajtlakolejkej, kemantika kentla totlamachilis ijkin techijliskia: “Tejua xuelis tikxikos tlen xkuajli tikileuiya”. ¡Maka matijkakikan! Matikilnamikikan ika Biblia kijtoua ika maka matijkauilikan tlajtlakojli “makiyekana” totlalnakayo (xpoua Romanos 6:12). Yejuin kijtosneki ika tejuamej uelis tiktlapejpeniskej xtikchiuaskej tlen xkuajli tikileuiyaj (Gál. 5:16). Jehová techtlajtlanilia matikpopolokan tlen xkuajli tikileuiyaj pampa kimatstika ika uelis ijkon tikchiuaskej (Deut. 30:11-14; Rom. 6:6; 1 Tes. 4:3). Yejuin techititia ika uelis tikpopoloskej tlen xkuajli tikileuiyaj.
12. ¿Tlenon noneki tikchiuaskej tla tikmachiliaj ika Jehová xtechselia, niman tleka?
12 Noijki, pampa titlajtlakolejkej, kemantika totlamachilis uelis ijkin techijlis: “Pampa tikileuiya tlen xkuajli, Jehová xok mitsselis”. ¡Maka matijkakikan! Matikilnamikikan ika Biblia kijtoua ika Jehová kasikamati ika titlajtlakolejkej (Sal. 103:13, 14). Yejua kuajli techixmatstok niman kimati ika pampa titlajtlakolejkej techyoltilana tlen xkuajli (1 Juan 3:19, 20). Tla titoxijxikojtokej iuan tlen xkuajli tikileuiyaj, san ika, xtikchiuaj, tichipaujkanemiskej itech Jehová. ¿Tleka ijkon tikijtouaj?
13, 14. ¿Kenijki tikmatij ika Jehová techselia maski tla tikileuiyaj tlen xkuajli?
13 Biblia kijtoua ika xsan noijki tikileuis tlen xkuajli niman tikchiuas. Xnochipa uelis tikteltiskej tikileuiskej tlen xkuajli, san ika, kema uelis toteltiskej niman xtikchiuaskej tlen xkuajli. Matiuelikan itech corintios, ijkuak xenochiuayaj inomachtijkauan Cristo, sekimej tlakamej auilnemiyaj imiuan tlakamej. Apóstol Pablo ijkin okimijli: “Yejon tlen nemejuamej kachtopa nenkichiuayaj”. Kuakon, ¿kijtosneki ika xok keman okileuijkej ijkon kichiuaskej? Xuelis tikijtoskej tla ka, pampa yejuin ileuilistli melak noneluayotia ipan toyojlo. San ika, tokniuan akin ueliyaj san no yejuamej noteltiayaj niman xkichiuayaj tlen kileuiayaj, Jehová kinseliaya niman kimitaya ken chipajkej (1 Cor. 6:9-11). Tejua noijki uelis mitsselis Jehová niman mitsitas tichipauak.
14 Maski san katlejua xkuajli ileuilistli iuan timoxijxikojtok, kuajli xmatsto ika uelis tikxikos. Niman maski tla xueli tikpopoloua tlen xkuajli tikileuiya, kema uelis san no tejua timoteltis niman xtikchiuas tlen tiknemilia nion tlen kineki motlalnakayo (Efes. 2:3). Matikitakan kenijki uelis tiktlanis tlen xkuajli tikileuiya.
KEN TIKTLANIS TLEN XKUAJLI TIKILEUIYA
15. Tla tikneki tiktlanis tlen xkuajli tikileuiya, ¿tleka noneki tikmatis tlenon mitsyoltilana?
15 Tla tikneki tiktlanis tlen xkuajli tikileuiya, noneki san no tejua xkita tlenon mitsyoltilana para tikmatis tlenon iuan timoxijxikoua. Xkita maka san no tejua timokajkayauas (Sant. 1:22). Sekimej san tlemach ika notlajtlamiyaj, ken yakaj akin kuelita konis alcohol, yejua ueliskia kinemilis ika xtlaj tlenon tla miyek koni pampa sekimej más miyek konij alcohol. Noso yakaj akin kiyoltilana kitas pornografía uelis okse yakaj kitlajtlakoltis, niman kinemilis ika tla isiuauj más kititiskia ika kitlasojtla xkileuiskia kitas pornografía. San ika, akin ijkin tlanemilia, kichiuas mauetsiti ipan tlajtlakojli. Kuakon, tla itlaj mitsyoltilana maka san tlen ika xmotlajtlami. Xseli ika tejua tiktlapejpenia tlen tikchiua (Gál. 6:7).
16. ¿Tlenon mitspaleuis maka xchiua tlen xkuajli tikileuiya?
16 Kuakon, noneki xkita tlen xkuajli tikileuiya, niman xmokojtili maka tikchiuas (1 Cor. 9:26, 27; 1 Tes. 4:4; 1 Ped. 1:15, 16). Xkita tlenon kichiua xkileui tlen xkuajli niman kemanon más ijkon mopan nochiua, kanaj ijkuak melak yetlayoua noso ijkuak tisiaujtika. Xnemili tlenon uelis tikchiuas para tiktlalkauis tlen tikileuiya. Ken yotikitakej, tla kachtopa tiknemilia tlenon uelis tikixnamikis niman timomajmachtia kenijki tiktlalkauis, mitspaleuis xtlaxiko ijkuak mitsyoltilanas tlen xkuajli (Prov. 22:3).
17. ¿Tlenon tiuelij itech José? (Génesis 39:7-9; noijki xkimita tlaixkopinaltin).
17 Matikilnamikikan tlenon okichiuj José ijkuak isiuauj Potifar kichiualtisnekiya iuan manoteka: José nimantsin okimelajkaijli ika ka (xpoua Génesis 39:7-9). Tlen okichiuj José kiteititia ika ijkuak isiuauj Potifar xekijliaya iuan manoteka, yejua yokijtojka ika xkeman notekaskia iuan isiuauj okse tlakatl. ¿Tlenon tiuelij itech José? Ijkuak xetikixnamikij se tetlatlatalistli, noneki tikijtoskej ipan toyojlo ika xtikchiuaskej tlen xkuajli. Ijkon ijkuak itlaj tikileuisnekiskej, uelis nimantsin tiktlalkauiskej pampa yotikijtojkej ika xtikchiuaskej tlen xkuajli.
Nimantsin xmapeua tetlatlatalistin ijkon ken José okichiuj. (Xkita párrafo 17).
SAN NO TEJUA XMOIXTLALO
18. ¿Tlenon uelis más tikchiuas niman ijkon tiktlanis tlen xkuajli tikileuiya? (2 Corintios 13:5).
18 Tla tikneki tiktlanis tlen xkuajli tikileuiya, noijki noneki nochipa timoixtlalos (xpoua 2 Corintios 13:5). Yejon mitspaleuis xkita tla noneki tikpatlas tlen tiknemilia noso tlen tikchiua. Matikonnemilikan ika otikxiko se tetlatlatalistli, sakin uelis ijkin timotlajtoltis: “¿Kech oniuejkauj para nikmapeuas?”. Tla xnimantsin otikmapeuj, maka xmajmana, san ika, xkita tlenon uelis tikchiuas para ijkuak oksejpa ijkon mopan nochiuas nimantsin tikmapeuas. Uelis ijkin timotlajtoltis: “¿Uelis más totoka nikixtis ipan notlamachilis tlen xkuajli niknemilia? ¿Tlen ika ninoyolpaktia más kichiua maniknemili tlen xkuajli? ¿Nimantsin oksekan nontlachia ijkuak uajnesi kampa auilnemilo? ¿Nochipa nikilnamiki ika niktlakamatis Jehová yejon tlen más kuajli, maski kemantika nonekis melak ninokojtilis san no nejua ninoteltis?” (Sal. 101:3).
19. ¿Tleka noneki matokojtilikan matiktlapejpenikan tlen kuajli ipan tlen nesi ika xueyi kijtosneki?
19 Noijki xkilnamiki ika “toyojlo melak tekajkayaua xijkon ken itlaj okse, niman teijtlakoua” (Jer. 17:9, TNM). Niman Jesús okijto ika on tlen xkuajli tiknemiliaj peua ipan toyojlo (Mat. 15:19). Kuakon, maka xmokauili ika moyojlo mamitskajkayaua. Matontlanemilikan itech yakaj akin yokikajkauj ika kita pornografía, san ika, sakin ika yolik peua kinemilia ika xtlaj panos tla kimita tlaixkopinaltin tlen kichiuaj maka kuajli matlanemili, san tla xuajnesij akin tetsotsoltikej. Noso kanaj kinemilis: “Xtlaj tlenon tla nitlanemilia ipan auilnemilistli pampa xnikchiujtika”. Akin ijkin tlanemiliaj, kentla sa kitstokej kemanon kichiuaskej tlen kileuiya intlalnakayo (Rom. 13:14). ¿Tlenon uelis tikchiuas para xsan no tejua timokajkayauas? Xkilnamiki ika tla tiktlapejpenia tlen xkuajli ipan tlen nesi ika xueyi kijtosneki, noijki tiktlapejpenis tlen xkuajli ipan tlen ueyi kijtosneki.b Xmokojtili maka timokajkayauas pampa uelis tiknemilis ika kuajli tlen tikchiujtika.
20. ¿Tlenon panos ika tlayekapan ika tlen xkuajli tikileuiyaj, niman tlenon techpaleuis aman?
20 Ken yotikitakej, Jehová techpaleuiya matikinxikokan tetlatlatalistin. Niman pampa Jesús omik topampa, uelis tinemiskej para nochipa ipan se xochitlalpan. Ijkuakon, melak techyolpaktis tiktekichiuiliskej Jehová pampa xok titoxijxikoskej iuan tlen xkuajli tikileuiyaj. Chika yejko yejon tonajli, kuajli matikmatstokan ika tla titokojtiliaj, uelis tiktlaniskej tlen xkuajli tikileuiyaj pampa Jehová techteochiuas.
TLAKUIKAJLI 122 Nochipa matikojtitokan
a TLEN NONEKI MATIKMATIKAN: Ipan Biblia, tlajtojli tlajtlakojli miyekpa kijtosneki ijkuak tikchiuas tlen xkuajli, ken titlachtekis, tiauilnemis noso titemiktis (Éx. 20:13-15; 1 Cor. 6:18). San ika, kemantika kijtosneki on tlajtlakojli tlen tinochimej tikuajkuij ijkuak tiuajtlakatij maski tla xetikchiuaj itlaj tlen xkuajli.
b Xkita ika on telpochtli tlen noteneua ipan Proverbios 7:7-23 xkuajli tlen okitlapejpenijtia ipan tlen nesiskia ika xueyi kijtosneki niman yejon okichiuj mauetsiti ipan auilnemilistli.
c TLEN NESI IPAN TLAIXKOPINALTIN: Toopochma: Se tokniuj telpochtli tlaonitika kampa kinemakaj café niman kimita sekimej tlakamej akin noititijtokej ika nouelitaj. Toyekma: Se tokniuj siuatl kita se tlakatl niman se siuatl pokitokej.