Nimantsin matikinpaleuikan akin kipiyaj “kuajli inyojlo”

1. ¿Tlenon kichiuaj sekimej ijkuak tikinnojnotsaj? (Hechos 13:​47, 48; 16:​14, 15).

IPAN kachtopa siglo, miyekej nimantsin okinekkej kiseliskej tlen melauak ijkuak okinnojnotskej (xpoua Hechos 13:​47, 48; 16:​14, 15). Aman, noijki nemij akin nimantsin kiseliaj tlen melauak ijkuak tikinnojnotsaj. Niman maski sekimej kachtopa xmás kinekiskej techkakiskej, kanaj sakin kinekiskej más ueliskej itech toTajtsin. ¿Tlenon noneki tikchiuaskej ijkuak tikinnextiaj akin kipiyaj “kuajli inyojlo”?

2. ¿Tleka titenojnotsas yeskia ken yakaj akin toka?

² Yakaj akin tenojnotsa yeskia ken yakaj akin toka. Ijkuak akin toka kita ika tlen okitokak yochikauj, yejua kiteki. San ika, xsan kiteki tlen yotlak, noijki más tlatoka. Noijki ijkon, ijkuak tiknextiaj yakaj akin kineki uelis tlen melauak, nimantsin tikpaleuiyaj makichiua ken Cristo. San ika, ok tikinpaleuijtokej oksekimej, makasikamatikan tleka melak kuajli tla nomachtiaj Biblia (Juan 4:​35, 36). Tla tejuamej titlatlachixtokej, uelis tikmatiskej kenijki tikinpaleuiskej akin tikinnojnotsaj. Ipan yejuin tlamachtijli tikitaskej kenijki uelis tikpaleuiskej yakaj akin kuajli techkaki ijkuak kachtopa iuan titlajtouaj. Noijki tikitaskej kenijki tikinpaleuiskej más makixmatikan Jehová niman makitekichiuilikan.

TLA AKIN TIKNOJNOTSAJ KUAJLI TECHKAKI

3. ¿Tlenon uelis tikchiuaskej ijkuak tiknextiaj yakaj akin kuajli techkaki? (1 Corintios 9:26).

³ Tiknekij nimantsin tikinpaleuiskej makiselikan nemilistli tlen xkeman tlamis, akin kuajli techkakij ijkuak tikinnojnotsaj. Ika yejon, nimantsin matikimijlikan tla kinekij nomachtiskej Biblia, niman matikimijlikan mauiyan ipan tlanechikojli (xpoua 1 Corintios 9:26).

4. Xteneua yakaj akin nimantsin okinek nomachtis Biblia.

⁴ Xkijli tla kineki nomachtis Biblia. Nemij sekimej akin kinekij nimantsin nomachtiskej Biblia. Matikitakan tlen opanok ne Canadá. Se ichpochtli ononisiui ipan carrito se jueves niman okonajsik folleto Nochipa uelis tiyolpakis. Tokniuj akin ompa nemiya okijli ika noijki ueliskia kimachtiskiaj ika yejon folleto. Yejon ichpochtli okijli ika kema niman okimakak inúmero de teléfono. Ipan yejon tonajli, yejon ichpochtli okontlajkuilouili tokniuj para kitlajtoltis tla kimachtiskej. Tokniuj okijli tla ueliskia kimachtis itlamiyan semana, san ika, yejon ichpochtli okijli: “¿Tleka xtipeuaj mostla? Nejua nikpiya tiempo”. Uajmostla opeuj nomachtiaj niman yejon itlamiyan semana oyaj ipan totlanechikol, sakin nimantsin opeuj nouika iuan Jehová.

5. ¿Tlenon noneki tikmatstoskej ijkuak tikteijliskej tla kinekij nomachtiskej Biblia? (Noijki xkimita tlaixkopinaltin).

⁵ Xnochimej akin tikinnojnotsaj kinekiskej nimantsin nomachtiskej Biblia ijkon ken yejon ichpochtli, ika yejon, matikilnamikikan ika kachtopa uelis tikimijliskej itech tlen yejuamej kuelitaskej. San ika, tla tejuamej tajmanaj inpampa, kanaj sakin kinekiskej nomachtiskej Biblia. ¿Tlenon uelis tikimijliskej para manomachtikan Biblia? Yejon tlen okintlajtoltijkej miyekej tokniuan tlakamej niman siuamej akin melak ueltokej temachtiaj. Matikitakan tlenon okijtojkej.

6. ¿Tlenon uelis tikchiuaskej niman ijkon akin otiknojnotskej makineki oksejpa matikitatij?

⁶ Yejuin tokniuan akin tenojnotsaj niman precursores kijtouaj ika kemantika más kuajli tla xkimijliaj: ¿Tikneki timomachtis Biblia? Yejuamej yokitakej ika más kuajli tla kimijliaj ika san imiuan tlajtlajtoskej, itlaj kijliskej noso tla kinekij más kuajli kimatiskej itech Biblia. Ijkuak yejuamej kimijlisnekij ika kinekij nokuepaskej, ijkin kimijliaj: “Temojkatlachialti ika ipan Biblia technankilia tlen desde yeuejkaui totlajtoltianij” noso “Biblia xsan tlajtoua de religión, noijki techijlia miyek tlen techpaleuis ipan tonemilis”. Noijki uelis tikijtoskej: “Tiuelis miyek tlen mitspaleuis san ipan 10 noso 15 minutos”. Xnoneki tikijtoskej tla tikmachtiskej nochi semanas, ijkon, akin tikmachtisnekij xkimachilis tla tikchiualtijtokej manomachti.

7. ¿Kemanon kitaj sekimej ika yokinextijkej tlen melauak? (1 Corintios 14:​23-25).

⁷ Xkijli mauiya ipan totlanechikol. Nesi ika ipan itonaluan apóstol Pablo sekimej kitayaj ika yokinextijkaj tlen melauak ijkuak yayaj ipan tlanechikojli (xpoua 1 Corintios 14:​23-25). Aman noijki ijkon panoua, miyekej peua más nouikaj iuan Jehová ijkuak yauej ipan totlanechikoluan. San ika ¿kemanon noneki tikijliskej yakaj mauiya ipan totlanechikol? Maski ipan libro Nochipa uelis tiyolpakis ipan tlamachtijli 10 teijlia mauiyan ipan totlanechikol, xnoneki hasta ijkuakon tikijliskej. Uelis tikijliskej mauiya ipan totlanechikol tlen tikpiyaj itlamiyan semana ijkuak kachtopa iuan titlajtoskej. Kanaj uelis tikteneuiliskej kenijki itoka tlamachtijli tlen nopanoltis, noso itech tlenon tlajtos Amatl Tekakistilijketl ipan yejon semana.

8. ¿Tlenon uelis tikijliskej akin tiknotsaj mauiya ipan totlanechikol? (Isaías 54:13).

⁸ Ijkuak tikimijliskej oksekimej mayakan ipan totlanechikol, matikimijlikan tlenon nochiua ompa niman tleka xsan noijki nochiua ken ipan okseki religiones. Se siuatsintli, ijkuak kemach oyajka ijkuak otomachtijkej Amatl Tekakistilijketl melak okimojtlachialti ika tokniuj akin tetlajtoltijtoya nochimej kintokayomatstoya. Tokniuj okijli ika nochimej akin tinemij ipan tlanechikojli tiyeskiaj ken se familia, yejua ika, nochimej tokojtiliaj tikmatiskej kenijki intoka oksekimej. Yejon siuatsintli okijto ika ipan itemplo xnochimej kimatij kenijki intoka oksekimej. Ijkon ken yejuin siuatsintli, miyekej noijki xkimatij tlenon nochiua ipan totlanechikoluan, ika yejon, kuajli yeskia tla tikimijliaj (xpoua Isaías 54:13). Tejuamej tosentlaliaj pampa tikueyichiuaj Jehová, itech tiuelij niman toyolchikauaj imiuan oksekimej (Heb. 2:12; 10:​24, 25). Totlanechikoluan kuajli nochiuaj niman miyek tlen tonuelij. Ompa xnochiua ijkon ken ipan okseki religiones (1 Cor. 14:40). Kuajli tikitaj ika kaltin kampa tosentlaliaj matlauilpan pampa ompa miyek tlen tonuelij. Ompa xtitlajtouaj itech política pampa tejuamej nion se partido xtikpaleuiyaj. Noijki, xtokualaniaj nion xtotsajtsajtsiliaj. Tla akin tikijlitika mauiya totlanechikol más kineki kimatis tlen ompa nochiua, uelis tikititis video ¿Tlenon nochiua kampa tosentlaliaj?

9, 10. Tla yakaj yauj ipan totlanechikol, ¿tlenon uelis tikijliskej para maka manomojti? (Noijki xkita tlaixkopinajli).

⁹ Miyekej xkinekij yaskej ipan totlanechikoluan pampa nomojtiaj tla kimijlia ika noneki nochiuaskej iteixpantijkauan Jehová. Ika yejon, matikimijlikan ika kuajli tikinseliaj akin xiteixpantijkauan Jehová. Tla yejua kineki, uelis ontlakakis niman xakaj kichiualtis matlanankili nion manopatla de religión. Xnochiua se tlanechikojli para kokonej, kuakon, nochimej san sekan notlaliaj niman san sekan tlakakij. Ijkon tajtin nemij imiuan inkoneuan niman kitaj tlenon kinmachtijtokej (Deut. 31:12). Noijki, xnotlajtlani tomin pampa tikchiuaj ken Jesús okijto: “Maka mamechtlaxtlauilikan ipampa yejuin pampa nemejuamej noijki xonenkitlaxtlajkej” (Mat. 10:8). Noijki, uelis tikijliskej ika xnoneki kitkis itlaken tlen melak patioj. ToTajtsin xkita kenijki nesi yakaj, yejua san kita tlen onka ipan toyojlo (1 Sam. 16:7).

¹⁰ Tla akin otikijli mauiya tlanechikojli, yauj, xchiua kuajli manomachili. Uelis tikchiuaskej makimixmati tokniuan niman tlayekankej. Tla tikchiuaj kuajli manomachili, kinektos oksejpa yas. Ijkuak nopanoltijtos tlanechikojli, matikititikan toBiblia tla xkipiya iBiblia para kimitstias textos niman matikititikan tlenon tomachtijtiuej.

TLA PEUA TITEMACHTIAJ

11. ¿Tlenon noneki tikilnamikiskej tla yakaj peua tikmachtiaj?

¹¹ Tla yakaj peua tikmachtiaj, ¿tlenon noneki tikilnamikiskej? Matikilnamikikan ika akin tikmachtiskej kipiya miyek tekitl, kuakon, maka melak matiuejkauikan. Yejua ika, tla yotikijlijkej tlen hora tiaskej, ijkuakon matiakan, maski miyekej kinemiliaj ika xnoneki tajsiskej ijkuak yotikteijlijkej. Noijki, ijkuak peuas titemachtiskej maka melak matiuejkauikan. Sekimej tokniuan akin melak kuajli temachtiaj kijtouaj ika xnoneki melak tiuejkauiskej maski tla akin tikmachtijtokej kineki más nomachtis. Niman maka melak matitlajtokan; matijkauilikan akin tikmachtiaj makijto tlen kimachilia (Prov. 10:19).

12. ¿Tlenon tiknekij makichiua akin peua tikmachtiaj?

¹² Ijkuak peua yakaj tikmachtiaj itech Biblia, tejuamej tiknekij ika makixmati niman makitlasojtla Jehová niman Jesús. Para uelis tikchiuaskej yejuin, noneki nochipa tikmachtiskej ika Biblia niman xsan tikijliskej tlen tejuamej tiknemiliaj (Hech. 10:​25, 26). Ijkuak apóstol Pablo temachtiaya, nochipa kiteneuaya Jesucristo, akin Jehová okuajtitlan para techpaleuis matikixmatikan niman matiktlasojtlakan (1 Cor. 2:​1, 2). Pablo noijki okijto ika melak noneki matikinpaleuikan akin peuayaj kichiuayaj ken Cristo para makichiuakan miyek tlen kuajli, tlen yeskia ken oro, plata niman kualtsitsintin temej (1 Cor. 3:​11-15). Yejuamej uelis tlaneltokaskej, tlamachilise yeskej, kuajli tlanemiliskej niman kimojkaitaskej Jehová (Sal. 19:​9, 10; Prov. 3:​13-15; 1 Ped. 1:7). Matikchiuakan ken Pablo niman matikinpaleuikan akin tikinmachtiaj más matlaneltokakan niman manouikakan iuan inTaj, Jehová, akin melak tetlasojtla (2 Cor. 1:24).

13. ¿Kenijki uelis tikititiskej akin tikmachtiaj ika xtosiaujkauaj niman ika tikasikamatij? (2 Corintios 10:​4, 5; noijki xkita tlaixkopinajli).

¹³ Ijkuak titemachtiskej, maka matosiaujkauakan niman matiteasikamatikan ijkon ken Jesús. Maka matiktlajtoltikan itlaj tlen uelis kichiuas xkuajli manomachili akin tikmachtiaj. Tla tikitaj ika itlaj xkasikamati, maka matoteltikan, matitlamitij niman sakin uelis tikititiskej tlen xokasikamat. Niman, tla tikitaj ika xkineki kiselis tlen tikmachtiaj, maka matikchiualtikan makichijtiuetsi tlen kijtoua Biblia, matijkauilikan ika yolik makipatla ken tlanemilia (Juan 16:12; Col. 2:​6, 7). Biblia kijtoua ika tlen xmelauak yeskia ken “tlen melak kojtik ijkon ken se torre”, niman noneki “tikxoxotoniskej” (xpoua 2 Corintios 10:​4, 5). Kanaj akin tikmachtiaj kitekiyomakas xok kineltokas tlen youejkauj kineltokaya. Yejua ika, kachtopa noneki tikpaleuiskej kuajli manouika iuan Jehová. Tla ijkon tikchiuaj, xok más kitekiyomakas kikajkauas tlen kineltokaya (Sal. 91:9).

TLA AKIN TIKMACHTIAJ YAUJ TOTLANECHIKOL

14. ¿Kenijki noneki tikinseliskej akin uajlauej ipan totlanechikol?

¹⁴ Jehová xkineki matitechikoitakan, yejua kineki matikintlasojtlakan nochimej akin uajlauej ipan totlanechikol. Kuakon, nochimej kuajli matikinselikan, maski san tlenon makineltokakan, tla kipiyaj noso xkipiyaj tomin, noso maski san kanon maualeuakan (Sant. 2:​1-4, 9). Matikitakan kenijki uelis tikchiuaskej yejuin.

15, 16. ¿Tlenon más uelis tikchiuaskej para kuajli manomachilikan akin kemach yauej ipan totlanechikol?

¹⁵ Nemij akin yauej ipan totlanechikol san pampa kinekij ontlachiaskej noso pampa yakaj akin oksekan chanti okimijli mauiyan. Kuakon, tla tikitaj ika ajsi yakaj akin xkeman yaya, kuajli matikselikan. Kuajli matiknotsakan, san ika, maka matikchiuakan xkuajli manomachili. Uelis tikijliskej touan manotlali. Matikmakakan se Biblia niman toamatlajkuiloluan, noso matikititijtiakan tlen titomachtijtokej. Matiknemilikan kenon uelis tikchiuaskej kuajli manomachili. Matikteneuakan se tlakatl akin oyaj ipan Kajli kampa tosentlaliaj, yejua kilnamiki ika melak pinauiya pampa yejua xonotlakentijka ijkon ken tokniuan. Tokniuj akin okiseli okijli maka manajmana, ika iteixpantijkauan Jehová noijki san tlakamej ijkon ken yejua. Yejon tlakatl onoapolakti niman xkeman okilkauj tlen tokniuj okijli. San ika, maski noneki kuajli tikinseliskej akin uajlauej ipan totlanechikol, matotlajpiyakan para maka tokalaktiskej kampa xnoneki (1 Ped. 4:15).

¹⁶ ¿Tlenon más uelis tikchiuaskej para kuajli manomachilikan akin kemach yauej ipan totlanechikol? Ijkuak titlajtouaj, ijkuak titlanankiliaj noso ijkuak tikpanoltiaj se tlamachtijli ipan tlanechikojli, noneki tikteititiskej ika tiktlakaitaj tlen kineltokaj akin xiteixpantijkauan Jehová. Maka matikijtokan tlen kinyolkokos akin uajlauej niman tlen kichiuas maka oksejpa mauajlakan (Tito 2:8; 3:2). Xkuajli yeskia tla xtiktlakaitaj tlen kineltokaj oksekimej (2 Cor. 6:3). Tokniuan akin kipanoltiaj se tlamachtijli noneki melak kuajli kitaskej tlenon kijtouaj. Noijki uelis tikimijliskej tlenon kijtosnekij seki tlajtoltin tlen san tejuamej tikintekitiltiaj niman yejuamej xkimasikamatij.

17. ¿Tlenon uelis tikchiuaskej tla tiknextiaj yakaj akin kipiya kuajli iyojlo?

¹⁷ Aman más noneki matitenojnotsakan niman matikinnextikan akin kipiyaj “kuajli inyojlo para kiseliskej nemilistli tlen xkeman tlami” (Hech. 13:48). Kuakon, tla tiknojnotsaj yakaj niman kuajli techkaki, nimantsin matikijlikan tla kineki nomachtis niman matikijlikan mauiya ipan totlanechikol. Ijkon tikpaleuiskej mauiya ipan “ojtli tlen teuika kampa onka nemilistli” (Mat. 7:14).