Tlen notlajtoltiaj akin kitaj revistas
¿Tlenon okijtosnek Proverbios 30:18, 19 ijkuak okijto ika xueliya kasikamatiya kenijki “sen tlakatl [kiyoleua] sen ichpochtli”?
Miyekej niman hasta sekimej akin melak kimatij itech Biblia, notlajtoltiaj tlenon kijtosnekij yejon versículos. Yejuin versículos ijkin kijtouaj: “Onkaj yeyi, noso hasta naui on tlen sanoyej ouijtikaj yejuan nechtlatlachaltia niman xueli nikajsikamati: ¿Kanon onojuitij sen kuaktli ne ipan cielo? ¿Kanon onojuitij on kouatl ne ipan on temej? ¿Kanon onojuitij sen barco ne ipan mar? ¿Niman kenijki sen tlakatl [kiyoleua] sen ichpochtli para isiuau?” (Prov. 30:18, 19).
Kachtopa, tikasikamatiyaj ika ijkuak kijtoua “sen tlakatl [kiyoleua] sen ichpochtli” kiteneujtoya itlaj tlen xkuajli. ¿Tleka? Pampa ipan okseki versículos tlajtojtika itech tlen xkuajli, tlen xkeman tlami noso “xkaman yolpachiuij” (Prov. 30:15, 16). Niman versículo 20 tlajtoua itech se “tesiuau yejuan auilnemi”, niman kijtoua ika xkichiua itlaj tlen xkuajli. Kuakon, tikasikamatiyaj ika “kuaktli” noso águila, kouatl, barco niman tlakatl san noijki pampa noliniaj noso ijkuak itlaj kichiuaj, xnesi. Yejon techasikamachiltiaya ika ijkuak kijtoua “sen tlakatl [kiyoleua] sen ichpochtli” kijtosneki ijkuak se telpochtli kikajkayaua se ichpochtli para iuan notekas.
San ika, onka tlen techpaleuiya matikasikamatikan ika tlen kijtouaj yejuin versículos kiteneujtoyaj tlen kuajli. Akin okijkuilo Proverbios san kijtojtoya tlen kimojkatlachialtiaya niman xueliya kasikamatiya.
Tlajkuiloltin ika hebreo noijki kijtouaj ika Proverbios 30:18 kijtojtika tlen kuajli. Se diccionario tlen tlajtoua itech Biblia kijtoua ika ijkuak ika hebreo noijtoua “xueli nikajsikamati” ipan yejuin versículo “kijtosneki itlaj tlen temojkatlachialti, tlen xueli tikneltokaj noso tlen xueli nochiua”.
Maestro Crawford Howell Toy, akin temachtiaya ipan Universidad de Harvard tlen onka Estados Unidos, noijki okijto ika yejuin versículo xkiteneujtika tlen xkuajli. Yejua okijto ika akin okijkuilo Proverbios kijtojtoya tlen kimojtlachialtiaya.
Kuakon, uelis tikijtoskej ika Proverbios 30:18, 19 kiteneua tlen melak temojkatlachialti niman tlen xueli tikasikamatij. Ijkon ken akin okijkuilo Proverbios, timojkatlachiaj ijkuak tikitaj kenijki águilas patlanij, kenijki kouamej notilantiuej ipan temej maski xkipiyaj ikxiuan, kenijki barcos tlen uejueyimej niman yetikej yauej ipan mar, niman kenijki se telpochtli niman ichpochtli peuaj nouelitaj niman san sekan yolpakij.