Ixtlamatkej kipatlaj hora ipan yejon reloj tlen kiteititia kemanon tlapopoliuis | ¿Tlenon kijtoua Biblia?

Ipan 24 de enero de 2023, ixtlamatkej okitakej ika aman más nisiuj para tlapopoliuis ipan tlaltikpaktli. Yejua ika, ipan yejon reloj tlen kixmatij ken Reloj del Juicio Final,a yejuamej okipatlakej hora niman ijkon manesi ika itlamis tonajli pampa kiteititisnekij ika yemero tlapopoliuis.

• “Reloj del Juicio Final, tlen kineskayotia nochi tlen xkuajli panoua ipan tlaltikpaktli, aman onka ipan se hora kampa nesi ika itlamis tonajli. Niman ijkon opanok pampa nochiujtika guerra ne Ucrania, pampa países kinekij kintoponiskej armas nucleares niman pampa ipan tlaltikpaktli melak yotlaijtlakauj” (Servicio internacional de noticias de la agencia AFP).

• “Tlaixmatkej okitemachistijkej ika yejuin martes okipatlakej hora ipan Reloj del Juicio Final. Ipan reloj aman kentla nesiskia ika san poliui 90 segundos para tlamis tonajli de 12 horas. Aman más ititlanisiuijtiuej para mapopoliui yejuin tlaltikpaktli” (ABC News).

• “Miyekej ixtlamatkej okijtojkej ika xkeman panouaya tlen melak xkuajli ipan tlaltikpaktli tlen ueliskia kichiuas matipoliuikan” (The Guardian).

¿Iyejkotok tonajli ijkuak popoliuiskej tlaltikpakchanejkej niman tlaltikpaktli? ¿Tikmakasij tlen uajlauj ika tlayekapan? ¿Tlenon kijtoua Biblia?

Tlen nochiuas ika tlayekapan

Biblia kijtoua ika “tlaltikpaktli xkaman nopatla” noso xkeman popolouis niman ika tlaltikpakchanejkej “ipan chantiskej nochipa” (Eclesiastés 1:4; Salmo 37:29). Kuakon, tlaltikpakchanejkej xuelis kipopoloskej tlaltikpaktli nion xuelis kichiuaskej maka yakaj ompa machanti.

San ika, Biblia kema kijtoua ika ajsis se tonajli ijkuak tlapopoliuis. Ipan se tlaxelojli kijtoua ika “tlaltikpaktli ye tlantiu” (1 Juan 2:17).

• Tla tikneki tikmatis tlenon kijtosneki ijkuak Biblia kijtoua ika popoliuis tlen onka ipan tlaltikpaktli, xkita tlamachtijli “¿Se acerca el fin del mundo? ¿Qué es el apocalipsis?”.

• Tla tikneki tikitas tlen kijtoua Biblia itech tlen panos ipan nochi tlaltikpaktli, xkita tlamachtijli “¿Cuándo será el fin del mundo?”.

Maka melak xmomojti

Biblia techpaleuiya maka melak matomojtikan maski panotika tlen melak xkuajli. ¿Kenon techpaleuiya?

• Biblia techijlia tlen melak techpaleuiya (2 Timoteo 3:16, 17). Tla tikneki tikmatis kenon Biblia uelis mitspaleuis xyolpaki maski tikixnamiktika miyek tlen ouijtika, xkamapoua tlamachtijli “Qué puedo hacer para no preocuparme tanto”.

• Biblia noijki techijlia ika ajsis se tonajli ijkuak tinochimej kuajli tinemiskej (Romanos 15:4). Noijki kuajli techijlia tlenon panos aman niman tlenon panos ika tlayekapan, niman yejon techpaleuiya matitlaxikokan ijkuak panoua itlaj tlen xkuajli ipan tlaltikpaktli.

Tla tikneki mamitspaleui Biblia, timitsyolchikauaj xmomachti Biblia iuan se iteixpantijkauj Jehová.