¿Tleka xkijliaj teopan kampa nosentlaliaj iteixpantijkauan Jehová?

Ipan Biblia, tlajtojli “teopantli” tlen onoijkuilo ika Griego kijtosneki tlanechikojli, akin nosentlaliaj kiueyichiuaj toTajtsin, xkijtosneki kampa nosentlaliaj tlaltikpakchanejkej.

Matikitakan yejuin: Ijkuak Pablo okintlajkuilouili akin kichiuayaj ken Cristo ipan Roma, okintitlanili tlajpaloltin Áquila niman Priscila, niman noijki okijkuilo: “No xkintlajpalokan on tokniuan [noso teopantli, Nueva Versión Internacional] yejuan nosentlaliaj [in]chan” (Romanos 16:5). Kuajli nesi ika Pablo kintitlanilijtoya tlajpaloltin sekimej tlaltikpakchanejkej akin nosentlaliayaj ipan yejon kajli.a

Ika yejon, xtiktokayotiaj teopantli kampa tikueyichiuaj toTajtsin, tiktokayotiaj Kajli kampa Tosentlaliaj.

¿Tleka kitokayotiaj Kajli Kampa nosentlaliaj iTeixpantijkauan Jehová?

Onka miyek tlemach tleka kimelaua ijkon matiktokayotikan. Matikitakan seki:

• Ipan yejuin kajli tosentlaliaj niman tikinpiyaj totlanechikoluan.

• Ompa tosentlaliaj niman tikueyichiuaj Jehová, toTajtsin itech akin tlajtoua Biblia, niman ompa tikteixpantiliaj itech yejua (Salmo 83:18; Isaías 43:12).

• Noijki tosentlaliaj niman miyek okseki tomachtiaj itech iTekiuajyo toTajtsin, tlen otenojnots Jesús (Mateo 6:9, 10; 24:14, TNM; Lucas 4:43).

Timitsnotsaj ika nochi toyojlo xkixmatiti se Kajli kampa Tosentlaliaj tlen onka kampa nisiuj tichanti niman ijkon xkita kenon nochiuaj intlanechikoluan iteixpantijkauan Jehová.