¿Tleka melak kuajli tla niauj kampa nosentlaliaj iteixpantijkauan Jehová?

Iteixpantijkauan Jehová nosentlaliaj okpa ipan se semana. ¿Tlenon nochiua ipan kajli kampa nosentlaliaj iteixpantijkauan Jehová? ¿Mitspaleuis tla tiauj kampa nosentlaliaj?

• ¿Tlenon nochiua ipan kajli kampa nosentlaliaj iteixpantijkauan Jehová?

• ¿Tleka melak kuajli tla tiauj kampa nosentlaliaj iteixpantijkauan Jehová?

• Tlen telpokamej niman ichpokamej kijtouaj

¿Tlenon nochiua ipan kajli kampa nosentlaliaj iteixpantijkauan Jehová?

Iteixpantijkauan Jehová nosentlaliaj ipan yejon kaltin para nomachtiskej itech Biblia. Tla tejua tiauj kampa nosentlaliaj, tiuelis yejuin:

• Tlen melauak itech toTajtsin.

• Tleka aman panoua miyek tlen xkuajli.

• Kenijki tikchiuas tlen kuajli.

• Kenijki uelis tikinpiyas amigos akin mitspaleuiskej.

¿Tleka melak kuajli tla tiauj kampa nosentlaliaj iteixpantijkauan Jehová?

Tlen ompa noijtoua melak mitspaleuis. Textos tlen noitaj ipan intlanechikol iteixpantijkauan Jehová mitspaleuiskej xmochiua titlamachilise (Proverbios 4:5). Yejuin kijtosneki ika Biblia mitspaleuis xtlapejpeni tlen kuajli. Niman noijki mitspaleuis xkasikamati yejuin:

• ¿Tleka otexchijchiuj toTajtsin?

• ¿ToTajtsin kichiua matitlajyouikan?

• ¿Tlenon panoua ijkuak yakaj miki?

Yejuin seki tlamachtiltin tlen nopanoltiaj ipan tlanechikoltin tlen nochiuaj itlamiyan semana:

• ¿Tleka noneki matechyekana Biblia?

• ¿Itech akinon uelis tiyolchikauiskej ijkuak melak titajmanaj?

• ¿Kenijki techpaleuijtika iTekiuajyo toTajtsin ipan yejuin tonaltin?

“Sejpa katka, se akin iuan ninomachtia ipan escuela oyajka kampa tosentlaliaj. Onoseui iuan nofamilia niman otiktlaneujtijkej amatlajkuilojli tlen tomachtijtoyaj. Sakin onechijli ika melak okuelitak kenon otlanankilijkej tokniuan. Niman noijki okijto ika ipan iteopan xkipiyaj tlen ika nomachtiskej tlen tejuamej kema tikpiyaj” (Brenda).

¿Tikmatiya yejuin? Akin yauej kampa nosentlaliaj iteixpantijkauan Jehová xtlaj kitlaxtlauaj para kalakiskej niman ompa xnotlajtlani tomin.

Akin ompa tikimixmatis melak mitsyolchikauaskej. Biblia kijtoua ika noneki tosentlaliskej pampa ompa toyolchikauaj (Hebreos 10:24, 25). Aman miyekej xok tetlasojtlaj niman san intech tlanemiliaj, yejua ika, melak kualtsin timomachilis ijkuak tinemis imiuan akin kitlasojtlaj toTajtsin niman kintlasojtlaj oksekimej.

“Kemantika melak nisiaujtika ipampa tlen onikchiuj ipan se tonajli niman kemantika hasta ninajmana, san ika, ijkuak niauj kampa nosentlaliaj iteixpantijkauan Jehová yejuamej melak nechyolchikauaj. Ijkuak tlami tlanechikojli niman ninokuepa nochan, sajnoye niyolpaki niman nikmachilia ika uajmostla uelis nikxikos maski san tlenon mapano” (Elisa).

¿Tikmatiya yejuin? Ipan nochi tlaltikpaktli, iteixpantijkauan Jehová kinpiyaj ipantsin 120,000 tlanechikoltin niman ipantsin 60,000 kaltin kampa nosentlaliaj. Sejse xiuitl nochijchiuaj kanaj 1,500 Kaltin kampa nosentlaliaj iteixpantijkauan Jehová pampa más miyekixtiuej akin kinekij imiuan nosentlaliskej.a