¿Akinon arcángel Miguel?

Tlen Biblia kijtoua

Ipan Biblia notlalia tokayotl “Miguel”-noso “san Miguel”, ken miyek religiones kixmatij- para noteneuas Jesús. Yejuin tokayotl uajnesi ijkuak Biblia tlajtoua itech Jesús achto uajlaskia ipan tlaltikpaktli niman ijkuak yonokuep ne iluikak.a Biblia kijtoua ika sakin ika yomijka Moisés, Miguel onokualani iuan Satanás, niman noijki kijtoua ika, sejpa katka, Miguel okipaleui se ángel makijliti teotlajtoketl Daniel tlen toTajtsin kinekiya kijlis (Daniel 10:13, 21; Judas 9). Miguel kimanouiya noso kipaleuiya itlayekanalis Jehová niman kimixnamiki itlauelikniuan Jehová. Yejua ika tej, melak kinamiki manoixmati Jesús ken “Miguel” pampa, tokayotl “Miguel” kijtosneki “¿Akinon Ijkon ken toTajtsin?” (Daniel 12:1; Apocalipsis 12:7).

Matikitakan tleka uelis kuajli tikmatstoskej ika Jesús yejua arcángel Miguel.

• Miguel yejua arcángel noso “on ángel, yejuan ueyi tlayekanki” (Judas 9). Tlajtojli arcángel kijtosneki “ángel akin yekatstika niman akin kinyekana nochimej ángeles”. Yejuin tokayotl arcángel san ipan ome versículos uajnestiuj. Niman, kampa uajnestiuj, xkijtoua “arcángeles”, yej san kijtoua “arcángel”. Yejuin kuajli techasikamachiltia ika nemi san se ángel akin noixmati ken arcángel. Se de yejon versículos kijtoua ika Jesús “uajtemos de ne iluikak ikan tlajtojli de tekiuajketl, ikan itlajtol on ángel yejuan yakatstikaj” (1 Tesalonicenses 4:16). Ipan yejuin texto kijtoua ika Jesús tlajtoua ken “on ángel yejua yakatstikaj”. Yejua ika, kuajli tikmatstokej ika Jesús yejua Miguel, akin arcángel noso “ángel yejua yakatstikaj”.

• Miguel yejua akin kinyekana nochimej ángeles. “On ángel tlayekanki itoka Miguel iuan iángeles onouijsokkej iuan on dragón” noso Diablo (Apocalipsis 12:7). Miguel yejua akin más ueyixtika itech nochimej ángeles. Biblia kitokayotia “Miguel, semej on ángeles tlayekankej yejuan más uejueyixtokej” noso “on ueyixtikaj ángel” (Daniel 10:13, 21; 12:1). Ixtlamatki David Aune okijto ika yejuin tokayomej kuajli kiteititiaj ika Miguel yejua “akin kinyekana nochimej ángeles”.

  Ipan Biblia san notekitiltia ome tokayomej para noteneuas yakaj akin kinyekana ángeles: Miguel niman Jesús. Biblia kijtoua ika “ijkuak ajsis on tonajli ika toTEKO Jesús uajnonextis ne iluikak iuan iuejueyixtokej ángeles. Uajlas ikan tlitl” (2 Tesalonicenses 1:7, 8; Mateo 16:27). Niman 1 Pedro 3:21, 22 kijtoua ika Jesús “nemi ne iluikak iyekmakopa Dios kampa kinmandaroua on ángeles niman on tekiuajkej niman on yejuan kipiyaj poder”. ToTajtsin xkeman kitlaliskia Jesús makinyekana sekimej ángeles niman Miguel oksekimej. Yejua ika, uelis tikijtoskej ika Jesús san noyejua Miguel.

• Miguel notelketsas ijkuak “sanoyej onyas temojtij tlajyouilistli” (Daniel 12:1). Miyekpa, ipan libro de Daniel notekitiltia tlajtojli notelketsas para noijtos ika se tekiuaj peuas kichiuas se ueyi tekitl (Daniel 11:2-4, 21). Jesucristo akin kitokayotiaj ken “iTlajtoltsin Dios”, nochiuas “Rey impan nochimej on reyes” niman ijkon kinpopolos nochimej itlauelikniuan toTajtsin niman kimanouis ikalpan (Apocalipsis 19:11-16). Yejuin kichiuas ijkuak “sanoyej miyek onyas tlajyouilistli ken yejuan xkaman onkaj desde ijkuak opeu in tlaltikpaktli” (Mateo 24:21, 42).