¿Akinon arcángel Miguel?

IPAN Biblia onka san seki textos kampa san se espíritu kitokayotiaj Miguel. Niman ompa nochipa uajnestiuj itlaj kichiujtika. Ipan amoxtli Daniel nouisoktika iuan xkuakualtin iluikaktekitkej; ipan iamatlajkuilol Judas, iuan nokualanijtika Diablo, niman ipan amoxtli Apocalipsis (noso Revelación), iuan nouisoktika Satanás niman xkuakualtin espíritus. Kema, nochipa kiteititia ika Jehová tlayekana kentla Tekiuaj niman kimixnamiki akin kitlauelitaj toTajtsin. Ijkon kiteititia tlen kijtosneki itoka “¿Akinon Ijkon Ken toTajtsin?”. Aman, ¿akinon Miguel?

Kachtopa, matikilnamikikan ika sekimej xsan se itoka kipiyaj. Kentla Jacob, akin okipix melak miyekej ichanejkauan, noijki okixmatkej ken Israel, niman Pedro, ken Simón (Génesis 49:1, 2; Mateo 10:2). Noijki ijkon, ipan Biblia nesi kenon Miguel noijki kixmatij kentla Jesucristo ijkuak xiuajlaya ipan tlaltikpaktli niman ijkuak oksejpa oyaj iluikak. Matikitakan kenon Biblia kichiua matikasikamatikan yejuin.

Arcángel. Ipan iTlajtol toTajtsin, Miguel kitokayotiaj kentla “iluikaktekitketl yejuan yakatstikaj” (Judas 9). Kuakon, arcángel yejua akin “yakatstikaj”. Nikan nesi ika san se iluikaktekitketl kitokayotiaj yekatstika. Niman Jesús nesi ika kichiujtok itekiyo kentla iluikaktekitketl akin yekatstika. Ijkon tikitaj ipan 1 Tesalonicenses 4:16, kampa kijtoua tlenon kichiuas Jesucristo akin yokikuiteujkej: “Sa no toTeko uajtemos ne iluikak ikan tlajtojli de tekiuajketl, ikan itlajtol on iluikaktekitketl yejuan yekatstikaj”. Nikan kijtoua ika Jesús tlajtos ken iluikaktekitketl akin yekatstika. Kuakon techasikamachiltia ika Jesús yejua arcángel Miguel.

Ueyi tlayekanketl. Biblia kijtoua ika “on yakatstikaj iluikaktekitketl itoka Miguel niman iiluikaktekitkauan onouijsokej iuan on dragón niman on iluikaktekitkej” (Apocalipsis 12:7). Kuajli nesi ika Miguel yejua ueyi tlayekanketl akin kinyekana melak miyekej iluikaktekitkej. Ipan amoxtli Apocalipsis noijki tlajtoua itech Jesús kentla ueyi tlayekanketl akin kinyekana melak miyekej iluikaktekitkej yolmelaujkej (Apocalipsis 19:14-16). Niman Pablo kiteneua “toTeko Jesús” iuan ‘iiluikaktekitkauan’ (2 Tesalonicenses 1:7). Ken tikitaj, Biblia tlajtoua itech Miguel iuan ‘iiluikaktekitkauan’ niman noijki itech Jesús iuan ‘iiluikaktekitkauan’ (Mateo 13:41; 16:27; 24:31; 1 Pedro 3:22). Ipan iTlajtol toTajtsin xkijtoua tla iluikaktekitkej yolmelaujkej ojkan xeliujtokej. Sekimej kinyekana Miguel niman oksekimej Jesús. Nikan kuajli tikasikamatij ika Miguel yejua Jesucristo akin kichiujtika itekiyo ne iluikak.a