TLEN NOTLAJTOLTIAJ TELPOKAMEJ
¿Tleka melak noneki matiknotsakan toTajtsin?
Miyekej telpokamej kijtouaj ika kinotsaj toTajtsin, san ika, xmojmostla ijkon kichiuaj. Niman sekimej kanaj notlajtoltiaj: “¿Oración san mitspaleuis kuajli xmomachili?”.
¿Tlenon kijtosneki tikchiuas oración?
Tikchiuas oración kijtosneki tiknotsas toTajtsin Jehová, akin okichijchiuj nochi tlen onka. Xkonnemili: maski yejua melak ueyixtika xijkon ken tejuamej, “yejua xuejka nemi” itech cada se de tejuamej (Hechos 17:27). Noijki, Biblia techijlia: “Xnisiuikan Dios niman yejua mechnisiuis” (Santiago 4:8).
¿Tlenon uelis tikchiuas niman ijkon tiknisiuis toTajtsin?
Xchiua oración pampa yejon mitspaleuis xmonojnotsa iuan toTajtsin.
Xmomachti Biblia pampa ompa kentla mitsnotsaskia toTajtsin.
Tla tejua tiknotsa toTajtsin niman timomachtia Biblia, mitspaleuis más kuajli iuan xmouika.
“Tiknotsas Jehová kijtosneki tiknotsas akin melak ueyixtika niman yejuin se ueyi tetlayokolijli tlen tinochimej techmaka toTajtsin” (Jeremy).
“Ijkuak nikijlia Jehová tlen nikmachilia, más kuajli iuan ninouika” (Miranda).
¿Yemelak nechkaki toTajtsin?
Miyekej tlaneltokaj itech toTajtsin niman hasta kinotsaj, san ika, kemantika kinemiliaj ika toTajtsin xtechkaki. ¿Tejua noijki ijkon yotiknemilijka? Tla kema, kuajli xmatsto ika Biblia kijtoua ika Jehová kikaki “toueyikatsajtzilis” (Salmo 65:2). Niman xsan yejon, Jehová hasta mitsijlia xkijli nochi tlen mitsajmana. ¿Tleka? Pampa toTajtsin kineki mitspaleuis (1 Pedro 5:7).
Xnemili yejuin: ¿Nochipa timonojnotsa imiuan moamigos? Noijki uelis ijkon tikchiuas iuan toTajtsin. Uelis nochipa iuan timonojnotsas niman tiknotsas ika itoka, Jehová (Salmo 86:5-7; 88:9). Biblia kijtoua: “Nochipa xchiuakan oración” (1 Tesalonicenses 5:17).
“Ijkuak nikchiua oración kentla nitlajtoskia iuan noUeyitajtsin iluikakchane, yejua ika, nikijlia nochi tlen nikmachilia” (Moises).
“Nochi nikijlia Jehová, ijkon ken nikchiua iuan nonan niman imiuan noamigos” (Karen).
¿Tlenon uelis nikijlis toTajtsin ijkuak niknotsas?
Biblia kijtoua: “Nochipa xchiuakan oración. Xtlajtlanilikan Dios tlen mechp[o]loua niman xmakakan tlaxtlauijli” (Filipenses 4:6).
¿Yejuin kijtosneki ika uelis tikijlis nochi tlen mitsajmana? ¡Kema! Pampa Biblia techijlia: “Xkauili toTEKO nochi tlen mitsajmana, niman yejua mitspaleuis” (Salmo 55:22).
San ika, xsan noneki tikijlis tlen mitsajmana. Se ichpochtli akin itoka Chantelle kijtoua: “Xnikteititijtoskia ika Jehová noamigo tla san niknotsaskia ijkuak niknekiskia manechpaleui”. Noijki kijtoua: “Niknemilia ika kachtopa noneki tiktlasojkamachiliskej toTajtsin. Niman onka melak miyek tlen uelis ika tiktlasojkamachiliskej toTajtsin”.
Xnemili yejuin: ¿Tlenon tiktlasojkamachiliskia toTajtsin? Xnemili yeyi tlemach tlen amanin uelis tiktlasojkamachilis toTajtsin.
“Maski ijkuak san tikitaskej se xochitsintli uelis tiktlasojkamachiliskej toTajtsin” (Anita).
“Xtlanemili ipan se texto tlen uajlauj ipan Biblia noso ipan itlaj tlen Jehová yokichijchiuj tlen melak tikuelita. Sakin xtlasojkamachili” (Brian).