¿Tleka Jesús noixmati ken iKoneuj toTajtsin?
Tlen Biblia kijtoua
Biblia miyekpa kiteneua Jesús ken iKoneuj toTajtsin (Juan 1:49). Ijkuak Biblia kijtoua iKoneuj toTajtsin techasikamachiltia ika toTajtsin yejua akin otlachijchiuj niman ika yejua akin techmaka tonemilis, kuakon, yejuin kijtosneki ika toTajtsin yejua akin okichijchiuj Jesús (Salmo 36:9; Apocalipsis 4:11). Biblia xkijtoua tla toTajtsin okipix ikoneuj ijkon ken aman miyekej kinpiyaj inkoneuan.
Biblia kijtoua ika ángeles ikoneuan toTajtsin (Job 1:6). Noijki kijtoua ika on kachtopa tlakatl, Adán, katka tekoneuj itech toTajtsin (Lucas 3:38). Ijkuak toTajtsin otlachijchiuj, kachtopa okichijchiuj Jesús niman xakaj okipaleui ijkuak okichijchiuj, ika yejon, Biblia kijtoua ika toTajtsin melak kitlasojtla Jesús.
¿Jesús onen iluikak achto uajlaskia ipan tlaltikpaktli?
Kema. Achto uajnemiskia ipan tlaltikpaktli Jesús nemiya iluikak niman katka se espíritu. Yejua okijto: “Nejua oniualeu ne iluikak” (Juan 6:38; 8:23).
Ijkuak toTajtsin otlachijchiuj, kachtopa okichijchiuj Jesús. Biblia kijtoua yejuin itech Jesús:
“Yejua nemi desde ijkuak nochi tlen onkaj, xe onkatka” (Colosenses 1:15).
Yejua okichijchiujkej desde “ijkuak xe itlaj onkatka” (Proverbios 8:22).
Teotlajtojli kijtouaya ika Jesús yeuejkaui inemiya achto uajnemiskia ipan tlaltikpaktli (Miqueas 5:2; Mateo 2:4-6).
¿Tlenon kichiuaya Jesús iluikak achto uajlaskia ipan tlaltikpaktli?
Yejua kipiaya se ueyi tekitl ijkuak nemiya iluikak. Jesús tlajtotoya itech yejuin tekitl ijkuak okijto: “noTajtsin, [...] xnechmaka on ueyilistli yejuan mouan nikpiyaya ijkuak in tlaltikpaktli xe onkatka” (Juan 17:5).
Okipaleui iTajtsin ijkuak otlachijchiuj. Jesús otekit iuan iTaj “ken se tlamachijchijketl” (Proverbios 8:30). Biblia kijtoua yejuin itech Jesús: “Itechkopa Cristo, Dios okichijchiu nochi tlen onkaj ne iluikak niman nikan ipan tlaltikpaktli” (Colosenses 1:16).
Jesús otlapaleui ijkuak toTajtsin okinchijchiuj ángeles niman okseki tlen tikitaj (Revelación 5:11). Uelis tikijtoskej ika ken toTajtsin niman Jesús otekitkej yeskia ken se albañil niman aki kipaleuiya. Albañil kijtoua tlenon nochiuas niman on akin kipaleuiya kichiua.
Noixmati ken Tlajtojli. Achto ika uajlaskia ipan tlaltikpaktli, Biblia kiteneua Jesús ken Tlajtojli (Juan 1:1). Yejuin kijtosneki ika toTajtsin okitekitilti iKoneuj niman ijkon makimijli oksekimej ángeles tlenon kineki makimatikan.
Nesi ika toTajtsin noijki okitekitilti Jesús niman ijkon makimijli tlaltikpakchanejkej tlen nonekiya makimatikan. Uelis tikijtoskej ika kanaj Jehová okitekitilti Tlajtojli noso Jesús para makimijli Adán niman Eva tlenon nonekiya kichiuaskej ijkuak nemiyaj ipan xochitlalpan Edén (Génesis 2:16, 17). Kanaj Jesús yejua katka on ángel akin okinyekan israelitas ipan tlaluaktli niman kanaj yejua akin okimijlijtiaj ika nonekiya kitlakamatiskej tlen toTajtsin kinnauatiaya (Éxodo 23:20-23).a
a Tlajtojli, xsan yejua on ángel akin toTajtsin okitekitilti niman ijkon kiteijlis tlenon kineki manomati. Ipan Biblia kijtoua ika ijkuak Jehová okimijli israelitas tlenon nonekiya kichiuaskej, xsan okitekitilti iyenkuiyoj, noijki okintekitilti oksekimej ángeles (Hechos 7:53; Gálatas 3:19; Hebreos 2:2, 3).