Jehová xkimilkaua akin xtlakakij

Jehová kineki ika nochimej tlaltikpakchanejkej makixmatikan niman makimatikan itech itekiuajyo (1 Timoteo 2:3, 4). Ika yejon, iteixpantijkauan Jehová kinchijchiuaj Biblias niman okseki amatlajkuiloltin tlen kinpaleuiya miyekej makinmachtikan, yejuin kijtosneki ika noijki kinpaleuiyaj akin xtlakakij. Ikalpan Jehová yokinchijchiuj amatlajkuiloltin tlen noitaj ika videosa ipantsin 100 tlajtoltin ika señas. ¿Kenon kinchijchiuaj niman kenon kintemakaj yejuin amatlajkuiloltin? ¿Niman kenon noyenkuilijtiuj?

¿Kenon kinchijchiuaj videos ika tlajtojli señas?

Ipan nochi tlaltikpaktli nemij akin tlajtolkuepaj ika tlajtojli señas. Ijkuak se equipo kitlajtolkuepaj se amatlajkuilojli kachtopa noneki kuajli nomachtis, sakin kitaj kenon kuajli kiteijliskej niman ijkon kuajli manasikamati ipan itlajtol ika señas. Sakin kichiuaj grabación itech yejon amatlajkuilojli. Ipan yejuin tonaltin nemij 60 equipos akin nochipa kitlajtolkuepaj amatlajkuiloltin tlen ika temachtiskej, oksekimej 40 equipos san kemantika kichiuaj.

Yeuejkaui ijkuak kinchijchiuayaj videos ika tlajtojli señas melak patioj katka. Cámaras niman okseki tlen notekitiltiayaj melak patiojkej katka xijkon ken aman. Grabaciones nochiuayaj ipan se cabina, kemantika nonekiya nochijchiuaskia noso noyektlaliskia se edificio kampa nochiuaskiaj grabaciones. Kuakon ijkuak noyektlaliaya nochi ijkon se equipo ueliskia kichiuaskia igrabaciones nopopolouaya ipantsin 30,000b dólares.

Pampa ikalpan Jehová kuajli kitekitiltia donaciones kita kenon kuajli kichiuas itekiyo niman maka miyek tomin manopopolo. Ika yejon tikintekitiltiaj aparatos tlen más yenkuikej, tlen xpatiojkej niman tlen xouijtika tikintekitiltis. Aman xnoneki se cabina, pampa nochimej akin tlajtolkuepaj ueli kichiuaj ingrabaciones desde kampa tekitij, san noneki kitlaliskej tlakuitlapan se tela xoxojki. Niman ijkuak noneki nesiskej miyekej tokniuan ipan se video, yejuamej ueli kichiuaj ingrabación desde kampa tekitij noso desde inchan.

Noijki yotikinchijchiujkej seki programas tlen kinpaleuiya equipos akin kinchijchiuaj amatlajkuiloltin, ipampa yejuin más isiujkan tikinchijchiuaj amatlajkuiloltin ika tlajtojli señas. Tokniuan kitlasojkamatij nochi yejuin. Se tokniuj akin itoka Alexander, kijtoua: “Melak niyolpaki pampa aman más nokixtiaj videos ika tlajtojli señas, achto xijkon katka. Mojmostla ueli nikita se video”.

Ipan yejuin tonaltin para kiyektlaliskej kampa nochijchiuaskej videos ika tlajtojli señas san nopopoloua 5,000 dólares. Ipampa yejon ueli tikinchijchiuaj más videos ipan miyek tlajtoltin ika tlajtojli señas.

¿Kenon kintemakaj videos ika tlajtojli señas?

Sakin ika yonochiuj grabación itech se amatlajkuilojli noneki tikintitlaniliskej akin kintekitiltiskej. Yeuejkaui, grabaciones tikomintitlaniliayaj se companía niman yejuamej kichiuayaj copias ika videocintas niman DVD, sakin tejuamej tikomintitlaniliaj tlanechikoltin. San ika, para nochiuaya yejuin tekitl nonekiya miyek tiempo niman tomin. San ipan 2013 onopopolo ipantsin 2,000,000 de dólares para onochijchiujkej DVD ika tlajtojli señas.

Akin xtlakakij melak yolpakiyaj pampa kipiayaj yejuin videos, san ika kemantika melak ouijtika katka kintekitiltiskej, pampa más miyekixtiayaj yejon DVD. Kemantika san se libro itech Biblia kipiayaj miyek DVD. Tokniuj Gilnei, akin chanti Brasil, kijtoua: “Ijkuak niknekiya nikpouas se texto kachtopa nonekiya niktejtemos ipan tlen DVD onka, niman sakin niktejtemos tlaxelojli, melak ouijtika katka”. Tokniuj Rafayane, kitekitiltiaya DVD ika tlajtojli señas, yejua kijtoua: “Melak ouijtika katka ninomachtis san noselti, pampa melak nechtekiyomakaya nikinnextis textos niman tlen kijtosnekiyaj”. Ijkuak tokniuan tenojnotsayaj nonekiya kitkiskiaj miyek DVD niman ijkon kintlaliayaj ipan intelevisión akin kinektoyaj kitaskiaj, niman kemantika yejuamej nonekiyaj kitkiskiaj kampa kitlaliskiaj. Sakin onochijchiujkej seki aparatos kampa ueliskia tikintlaliskiaj DVD niman ueliya kitkiyaj maski san kanon. Bobby, akin chanti Estados Unidos, kijtoua: “Tla tiknekiya tikteititis okse texto nonekiya tikpatilis DVD, xnimantsin tikchiuas yejuin, ika yejon ouijtika katka tiktekitiltis Biblia ijkuak titenojnotsaya”.

Ipan 2013, ikalpan Jehová okichijchiuj aplicación JW Library Sign Language, ika yejuin aplicación tokniuan uelis kintemoltiskej noso kimitaskej videos ika tlajtojli señas ipan incelulares noso tabletas. Ijkuak onochijchiuj san onkatka ika tlajtojli señas americano, san ika, ipan 2017 onoyenkuili niman ijkon nochimej akin nemij ipan tlajtojli señas uelis kitekitiltiskej. Tokniuan melak oyolpakej. Juscelino, akin chanti Brasil, techijlia: “Xueliya nikneltokaya. Nochipa niknemilijtoya ika tokniuan itech Grupo akin Tlayekana, melak techtlasojtla tejuamej akin xtitlakakij niman kineki ika noijki machikaujto totlaneltokil ijkon ken oksekimej tokniuan. Ijkuak okis yejuin aplicación, melak oniyolpak niman niknekiya más ninomachtis Biblia”.

Aman tikinchijchiuaj videos ika tlajtojli señas ika computadoras niman tikintlaliaj ipan página tlen tikpiyaj ipan internet niman ipan aplicación JW Library Sign Language. Ipampa yejuin tiktlajtolkuepas, tikchiuas grabaciones niman tikinxelos amatlajkuiloltin ika tlajtojli señas xok tiuejkauis miyek metstin noso xiujtin, aman nochiua san ipan seki tonaltin. Niman amatlajkuiloltin ika tlajtojli señas, miyekpa san noijki kistiuj ken okseki tlajtoltin.

Xkita tlen techijliaj sekimej tokniuan akin xtlakakij. Klízia kijtoua: “¿Akinon kichiua tlen noneki ijkon akin xtlakakij makipiyakan tlen ika kichikauaskej intlaneltokil? Xakaj ijkon kichiua, san ikalpan Jehová”. Niman Vladimir kijtoua: “Videos nechititia ika Jehová melak kintlasojtla akin xtlakakij niman akin tlakakij”.

Ipan miyek videos ika tlajtojli señas kijtoua yejuin: “Yejuin amatlajkuilojli xnonemaka. Noxeloua ipan nochi tlaltikpaktli, tepaleuiya manasikamati Biblia niman nochiua ika tomin tlen kitemakaj tlaltikpakchanejkej ika nochi inyojlo”. Melak tiktlasojkamatij pampa nenkuelitaj nenkitemakaskej nemodonaciones, miyek nochiuaj ijkon ken uajnestiuj ipan donate.jw.org. Yejuin tomintsin techpaleuiya matikinchijchiuakan Biblias niman okseki tlemach tlen kinpaleuiya miyekej manomachtikan, noijki akin tlajtouaj tlajtojli señas.