TLAMACHTIJLI 35
¿Kenijki uelis ninouikas iuan toTajtsin?
Gabriel okitak ika melak tepaleui timouikas iuan toTajtsin, ijkuak okixnamik tlen xkuajli. Yejua kijtoua: “Ijkuak nikpiaya 12 años, notaj otechkajteuj. Nikilnamiki ika sejpa katka ijkuak inikochiskia, oniktlajtlanili Jehová makichiua manokuepa”.
Ijkuakon maski melak najmantoya, Gabriel opeuj kiamapoua Biblia. Niman okinexti se texto kampa akin otlajkuilo okijli Jehová: “On yejuan xueli nomanauiyaj motech kitlalia inyojlo. Tejua nochipa tikimpaleui[ya] on iknomej” (Salmo 10:14). Gabriel kijtoua ika yejon oajsik ipan iyojlo. Ijkuak onikamapouj onikmachili ika Jehová nechijlitoya ika kinekiya nechpaleuis, nechilnamiktijtoya ika yejua noTajtsin. Nikmatstika ika Jehová yejua se tajtli akin xkeman techkauas.
¿MOPAN yonochiujka ijkon ken Gabriel? Kanaj kema, niman tla ka, noijki kuajli xmatsto ika Jehová kineki mouan nouikas. Xkita tlen Biblia kijtoua: “Xnisiuikan Dios niman yejua mechnisiuis” (Santiago 4:8). Melak kualtsin yejuin. Pampa maski xueli tikitaj toTajtsin niman yejua melak ueyixtika, ¡yejua kineki touan nouikas!
San ika, tla tikneki timouikas iuan toTajtsin noneki timokojtilis. Timouikas iuan totajtsin yeskia ken ijkuak tikpiya se planta, tla tikneki ika yejon planta kuajli manoskalti noneki tiktlajpiyas niman tikatekis, xuelis san ijkon tijkauas. Kuakon, tla tikneki kuajli iuan timouikas toTajtsin, ¿tlenon noneki tikchiuas?
Noneki timomachtis
Tla tikneki timouikas iuan yakaj, noneki nemonojnotsaskej niman nemokakiskej. Noijki ijkon noneki tikchiuaskej tla tiknekij touikaskej iuan toTajtsin. San ika, ¿kenon uelis tijkakiskej? Noneki tomachtiskej niman tikpouaskej iTlajtol, Biblia (Salmo 1:2, 3).
Kanaj ijkon ken miyekej telpokamej, kanaj tejua noijki titlatsiui timomachtis. Kanaj más tikuelita timauiltis, tikitas televisión niman tonpaxalos iuan moamigos. San ika, tla tikneki timouikas iuan toTajtsin, noneki timomachtis. Tijkakis tlen mitsijlia ipan iTlajtol.
Maka xnemili ika melak mitstlatsiuitis timomachtis Biblia, uelis tikuelitas timomachtis Biblia. San noneki tikitas kemanon tikpouas. Uelis tikchiuas ken kijtoua Lais. Yejua kijtoua: “Ijkuak ninokuiteua nikamapoua Biblia maski san se capítulo”. María akin kipiya 15 años, techijlia: “Nejua nikamapoua noBiblia ijkuak inikochis”.
¿Kenon uelis timomachtis Biblia? Kachtopa xkita recuadro tlen uajnesi ipan página 292. Sakin, xkijkuilo tlen hora uelis timomachtis Biblia maski san media hora.
․․․․․
Xouijtika tiktlalis kemanon timomachtis Biblia. Ijkuak tipeuas timomachtis Biblia, kemantika uelis tikmachilis ika melak tesiauiti. Uelis mopan nochiuas ken Jezreel, akin kipiya 11 años. Yejua techijlia: “Seki tlaxeloltin melak nechtlatsiuitia”. San ika, maka xmosiaujkaua. Xkilnamiki ika ijkuak timomachtia Biblia tikaktika Jehová akin moamigo. Tikitas ika melak tikuelitas timomachtis niman miyek tiuelis.
Nochipa xnotsa Jehová
Jehová yokichiuj ika matiuelikan matiknotsakan, niman yejon itlaj tlen melak kualtsin. Tejua uelis tiknotsas Jehová maski ika tonajli noso ika yeuajli. Jehová nochipa uelis mitskakis niman noijki kinektika mitskakis. Ika yejon, Biblia mitsijlia ika nochipa xkijli Jehová tlen mitsajmana, xtlajtlanili tlen mitspoloua niman noijki nochipa xtlasojkamachili tlen kichiua mopampa (Filipenses 4:6).
Yejuin kijtosneki ika tejua uelis tikijlis toTajtsin nochi tlen tikmachilia. San ika, xsan yejon, noijki uelis tiktlasojkamachilis. ¿Xmelak ika ijkuak se moamigo mitspaleuiya, tiktlasojkamachilia? Kema. Niman Jehová yejua moamigo akin más yomitspaleui (Salmo 106:1).
Xkijkuilo tlenon tiktlasojkamachilia Jehová.
․․․․․
¿Tlenon uelis tikchiuas tla kemantika melak timomojtia niman timajmana? Biblia kijtoua: “Xkauili toTEKO nochi tlen mitsajmana, niman yejua mitspaleuis. Yejua, xkaman kauilis ma uetsi yejuan kitlakamati” (Salmo 55:22.)
Xkijkuilo itlaj tlen mitsajmana niman tikuelitaskia tikijlis Jehová.
․․․․․
Xkilnamiki tlen mopan yonochiuj
Onka itlaj okse tlen xnoneki tikilkauas tla tikneki timouikas iuan toTajtsin. Tekiuaj David okijto: “Xtlatlatakan toTEKO niman nenkitaskej ika yejua sanoyej kuajli iyojlo” (Salmo 34:8). Ijkuak okijkuilo yejuin, kemach ipan yonochiujka itlaj tlen xkuajli. Tekiuaj Saúl kimiktisnekiya niman noijki ononek niyanas kampa nemiyaj filisteos, akin kitlauelitayaj. Ueliskia kimiktiskiaj pampa nimantsin okixmatkej. San ika, ¿tikmati kenon omakis? Okichiuj kentla yokipolojka itlamachilis (1 Samuel 21:10-15).
David xokinemili ika san yejua onomakixti. Yejua kasikamatiya ika toTajtsin yejua akin okipaleui, ika yejon, okijto: “Oninoueyikatsajtsilij itech noTEKO niman yejua onechkak, niman onechmanauij de nochi nonemojtil” (Salmo 34:4). Ipampa tlen ipan yonochiujka yejua ouel okijto: “Xtlatlatakan toTEKO niman nenkitaskej ika yejua sanoyej kuajli iyojlo”.a
Xnemili itlaj kampa otikitak ika Jehová mitstlajpixtoya niman xkijkuilo tlenon opanok. Uelis yes itlaj tlen kemantika nion xtikpatiojkaitaj.
․․․․․
Toseselti noneki tokojtiliskej más kuajli touikaskej iuan toTajtsin, maski tla totajuan otechmachtijkej itech Biblia. ¿Timokojtilijtika más kuajli timouikas iuan toTajtsin? Tla ka, yejuin capítulo melak mitspaleuis. Jehová mitsteochiuas pampa timokojtilijtika, niman noijki Biblia techijlia: “Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej” (Mateo 7:7).
[Nota]
a Okseki Biblias kitlajtolkuepa tlajtoltin “xtlatlatakan niman xkitakan” ken: “xmatikan niman xkitakan” (Traducción del Nuevo Mundo).
TEXTO TLEN MITSPALEUIS
“Yolpakij akin kimatstokej ika kipiya ika kitejtemoskej tlen ualeua itech toTajtsin” (Mateo 5:3, TNM).
TLEN UELIS TIKCHIUAS
Tla mojmostla tikamapoua naui páginas de moBiblia, uelis titlamis tikamapouas ipan se año.
¿TIKMATIYA YEJUIN?
Pampa Jehová kineki yes moamigo, kineki xkamapoua yejuin libro niman xkintlakamati itlanauatiluan (Juan 6:44).
¡XCHIUA TLEN YOTIUEL!
Para más kuajli ninomachtis Biblia, nikchiuas yejuin: ․․․․․
Para más niknotsas toTajtsin, nikchiuas yejuin: ․․․․․
¿Tlenon nikneki niktlajtoltis notaj noso nonan itech tlen ninomachtijtika? ․․․․․
¿TEJUA TLENON TIKNEMILIA?
● ¿Tlenon uelis tikchiuas niman ijkon xmitstlatsiuitis timomachtis Biblia?
● ¿Tleka techkaki Jehová maski titlajtlakolejkej?
● ¿Tlenon uelis mitspaleuis más kuajli xnotsa toTajtsin?
[Comentario]
Ijkuak nipitentsin katka, nochipa san no yejua nikijliaya Jehová ijkuak niknotsaya. San ika, aman nikyejyekoua nikijlis nochi tlen mojmostla nopan nochiua, tlen kuajli noso tlen xkuajli” (Eva).
[Recuadro/Tlaixkopinajli]
kuajli xmomachti moBiblia
1. Xtlapejpeni tlen tikuelitaskia tikasikamatis. Xtlajtlanili Jehová mamitspaleui xkasikamati.
2. Ika yolik xkamapoua. Ijkuak tikamapoujtias xtlanemilijtiuj ipan tlen tikamapoujtika. Xchiua kentla tikitaskia tlen panotika, tikinkakiskia akin ompa nemiyaj niman tla onkatka tlakuajli, xchiua kentla tikijnekuiskia niman tikmatiskia ken uelik. Tla ijkon tikchiuaj, melak tikuelitas niman tikmachilis kentla ompa tinemiskia.
3. Xmotlajtolti. Ijkuak yotitlan titlaamapoua, xmotlajtolti:
● ¿Tleka Jehová okinek manoijkuilo yejuin ipan iTlajtol?
● ¿Ken akinomej uelis nikchiuas niman ken akinomej ka?
● ¿Kenon nechpaleuiya yejuin?
● ¿Tlenon nechmachtiaj itech Jehová niman itech tlen yejua kichiua?
4. Xnotsa Jehová. Xkijli tlenon otiuel niman kenon tiknemilia tikchiuas yejon. Niman maka xkilkaua tiktlasojkamachilis Jehová ipampa iTlajtol.
[Tlaixkopinajli]
“Motlajtoltsin yejua tlauijli yejuan nechyekana niman nechtlauiluiya ipan noojui” (Salmo 119:105).
[Recuadro/Tlaixkopinajli]
kachtopa xchiua tlen más noneki
Miyekej kijtouaj ika xkipiyaj tiempo para kinotsaskej toTajtsin niman para nomachtiskej Biblia, ¿tejua noijki ijkon mopan nochiua? Kemantika san noneki tikitas tlenon kachtopa noneki tikchiuas.
Xchiua yejuin: Ipan se cubeta xkintlali temej, niman sakin xtemilti ika xajli. Ken tikita, nochi ouel oonak, temej iuan xajli.
Aman xkixti xajli niman temej, niman oksejpa xtemilti, san ika, aman kachtopa xtlali xajli niman sakin temej. ¿Tlenon opanok? Temej xoonakej. ¿Tleka? Pampa kachtopa otiktlali xajli
¿Tlenon tiuelij? Tla kachtopa tikchiua tlen xmás ueyi kijtosneki, ken timoyolpaktis, xok tikpiyas tiempo para tikchiuas tlen toTajtsin mitstlajtlanilia. Ika yejon, Biblia kimijlia akin kitekichiuiliaj toTajtsin ika nochipa makichiuakan “on tlen más kuajli” (Filipenses 1:10). Tla ijkon tikchiua, tikitas ika tikpiyas tiempo para tikchiuas tlen toTajtsin mitstlajtlanilia niman noijki para tikchiuas tlen tejua tikuelita. Xkilnamiki ika kachtopa noneki tikchiuas tlen más ueyi kijtosneki.
[Tlaixkopinajli]
Timouikas iuan toTajtsin yeskia kentla tikpiyaskia se planta: noneki tiktlajpiyas para kuajli manoskalti