Tlen sa ika tlami noitas

Miyekpa, akin kinekij noapolaktiskej kichiuaj ipan uejueyimej intlanechikoluan iteixpantijkauan Jehová. Ijkuak tokniuj kitlamiltis tlamachtijli itech apolaktilistli, kimijlis akin noapolaktiskej manotelketsakan niman chikauak makinankilikan yejuin:

1. ¿Yemelak yotikajkauj tlen xkuajli tikchiuaya, yotimosentemakak itech Jehová niman kuajli tikneltoka ika toTajtsin techmakixtia itechkopa Jesucristo?

2. Aman ika timoapolaktis, ¿tikasikamati ika tikteititis ika tiiteixpantijkauj Jehová niman ika aman titeuan ipan ikalpan toTajtsin?

Ijkuak akin noapolaktiskej kijtouaj ika kema, kiteititiaj ika kineltokaj ika Cristo totemakixtijkauj niman ika yonosentemakakej itech Jehová ika nochi inyojlo (Rom. 10:9, 10). Noneki kichiuaskej teoyotl niman tlanemiliskej itech tlen kintlajtoltiskej ijkuak noapolaktiskej. Niman ijkon, ijkuak tlanankiliskej kijtoskej tlen yemelak kinemiliaj.

¿Yotikchiuj se teoyotl kampa yotikijli Jehová ika itech timosentemaka, ika san yejua tikueyichiuas niman ika nochipa tikchiuas tlen yejua kineki?

¿Kuajli tikmatstok ika noneki nimantsin timoapolaktis?

¿Kenon noneki notlakentis yakaj ijkuak noapolaktis? (1 Tim. 2:9, 10; Juan 15:19; Filip. 1:10).

Noneki tiktlaliskej totlaken tlen kuajli manesi niman tlen kinamiki. Ika yejon, akin noapolaktiskej xnoneki kitkiskej intlaken tlen xkuajli kintlapachoua nion tlakentin tlen kipiyaj tlajkuiloltin noso tlaixkopinaltin. Niman noijki, intlaken noneki machipauak, kualtsin manesi niman makitlalikan tlen kinamiki notekitiltis ipan yejon tonajli.

¿Tlenon xkipiya tikchiuaskej ijkuak toapolaktiskej? (Luc. 3:21, TNM; Luc. 3:22).

Jesús kuajli otechititi tlenon noneki tikchiuaskej ijkuak toapolaktiskej. Ipampa tlen okichiuj ijkuak onoapolakti, okiteititi ika kasikamatiya ika ueyi kijtosneki tlen okichiuj. Kuakon, ijtik atl kampa se noapolaktia xkipiya ika ompa kamanalos, nauiltijtos nion xkipiya ika kichiuas itlaj tlen xkinamiki. Noijki, akin kemach yonoapolakti xkinamiki tsajtsis kentla ijkuak se tetlani. Maski se melak yolpaki ijkuak noapolaktia, noneki kiteititis iyolpakilis san ken kinamiki.

Tla nochipa tiauj tlanechikoltin, ¿kenon mitspaleuis xchiua tlen otikijli Jehová ijkuak otimosentemakak?

Sakin ika yotimoapolakti, ¿tleka noneki tiktlalis kemanon timomachtis Biblia niman kemanon titenojnotsas?

TLEN TLAYEKANKEJ NONEKI KIMATISKEJ

Ijkuak se akin yopeuj tenojnotsa mechijlis ika kineki noapolaktis, xkijlikan manomachti “Tlen kintlajtoltiskej akin kinekij noapolaktiskej” (páginas 12-49), niman noijki xkijlikan makita “Tlen noneki kimatis akin xinoapolaktia” (página 7). Ompa kijtoua kenon nomachtis tlen sakin nenkitlajtoltiskej, niman noijki ika ijkuak tlanankilijtos uelis konitstias iamatlajkuilol niman tlen okijkuilo. San ika, xnoneki yakaj iuan nomachtis tlen nenkitlajtoltiskej achto ika iuan nemosentlaliskej.

Ijkuak yakaj kineki noapolaktis, noneki kijlis akin kixeloua tekitl itech tlayekankej. Tla akin noapolaktisneki yokipouj “Tlen kintlajtoltiskej akin kinekij noapolaktiskej”, akin kixeloua tekitl itech tlayekankej kitlajtoltis tla yokichiuili se teoyotl Jehová kampa yokijli ika kineki itech nosentemakas niman ika kichiuas tlen yejua kineki. Tla akin kineki noapolaktis kijtoua ika kema, akin kixeloua tekitl itech tlayekankej kimijlis omemej tlayekankej makitlajtoltikan tlen uajlauj ipan yejuin amatlajkuilojli. Tla nemij oksekimej tlayekankej, uelis nopatlatiaskej. Xnoneki kichiaskej hasta manomati kemanon onias se ueyi tlanechikojli.

Ijkuak nenkitlajtoltiskej tlen uajlauj ipan parte 1, 2 niman 3, uelis nenuejkauiskej kanaj se hora noso tla noneki uelis más nenuejkauiskej. Xpeuakan niman xtlamikan ika teoyotl. Akin noapolaktis nion tlayekanketl xkipiya ika notlasiuitiskej. Noneki ika tlayekankej nimantsin manosentlalikan iuan akin kineki noapolaktis.

Tla miyekej kinekij noapokaltiskej, kuajli yes tla tlayekankej san insejselti kintlajtoltiskej tlen uajlauj ipan yejuin amatlajkuilojli. Ijkon, tlayekankej uelis kuajli kikakiskej ken tlanankilia akin kineki noapolaktis, kitaskej tla kasikamati tlen melauak, niman kitaskej tla iuelis noapolaktis. Noijki, akin noapolaktis uelis kijtos tlen kinemilia ika itlajtoluan. Akin yononamiktijkej uelis san sekan kintlajtoltiskej.

Tla siuatl akin kineki noapolaktis, tlayekankej iuan nosentlaliskej kampa uelis kimitaskej, sa maka makinkakikan. Ijkuak nonekis, tlayekanketl akin tetlajtoltis uelis kuikas okse tlayekanketl noso se tlapaleuijketl, san noneki kuajli kitas tlen tetlajtoltis.

Ipan tlanechikoltin kampa xmiyekej nemij tlayekankej, uelis kimijliskej tlapaleuijkej matetlajtoltikan tlen uajlauj ipan “Tlen kineltokaj akin kichiuaj ken Cristo” (parte 1). San tlayekankej noneki tetlajtoltiskej tlen uajlauj ipan parte 2 tlen itoka “Tlen noneki kichiuaskej akin kichiuaj ken Cristo”. Tla ipan tlanechikojli xmiyekej nemij tokniuan akin ueliskej kichiuaskej yejuin tekitl, uelis tlajtoskej iuan tlayekanketl ipan circuito niman ijkon yejua kintlajtlanilis okseki tlayekankej itech okse tlanechikojli matepaleuikan.

Tla akin noapolaktis xikajxiltia 18 xiuitl niman itajuan iteixpantijkauan Jehová, noneki iuan nemiskej. Tla yejuin xueli nochiua, kuakon, manosentlalikan omemej tlayekankej noso se tlayekanketl niman se tlapaleuijketl, san noneki kuajli kitaskej tlen parte kichiuaskej.

Tlayekankej noneki kitaskej ika akin kineki noapolaktis ikasikamati, hasta kampa kinamiki, tlen Biblia temachtia. Noijki noneki kitaskej tla yemelak kitlasojtla tlen youel ipan Biblia niman tla kitlakaita ikalpan Jehová. Tla kitaj ika xikasikamati tlen noneki, kitaskej kenon kipaleuiskej niman ijkon sakin uelis noapolaktis. Kemantika, kanaj akin kineki noapolaktis nonekis más kiteititis ika kuelita tenojnotsas niman ika kitlakamati tlen kijtoua ikalpan toTajtsin. Tlayekankej noneki kitaskej kech uejkauiskej ipan se tlajtoltilistli niman ijkon kijtoskej tla uelis noapolaktis. San ika, maka makilkauakan ika noneki nochi kitlajtoltiskej.

Ijkuak akin kineki noapolaktis yokitlajtoltijkej nochi tlen uajlauj ipan parte 1 niman 2, tlayekankej akin okitlajtoltijkej, nosentlaliskej niman ijkon kijtoskej tla kema uelis noapolaktis. Yejuamej xnoneki kitaskej tla oyaj noso xoyaj escuela niman tla miyek noso xmiyek ueli kichiua. Tlayekankej noneki kitaskej tla kuajli yokasikamat tlen temachtia Biblia niman tla yemelak kitlasojtla Jehová. Tla nenkinpaleuiyaj akin noapolaktiskej uelis kuajli kiteijliskej iTlajtol toTajtsin.

Sakin, se noso ome tlayekanketl akin otetlajtoltijkej, tlajtoskej iuan akin kineki noapolaktis niman kijliskej tla uelis noapolaktis. Tla kema noapolaktis, iuan kitaskej “Tlen sa ika tlami noitas” (páginas 51-53). Tla xitlami nomachtia libro ¡Nochipa uelis tiyolpakis!, kijliskej matlami manomachti sakin ika yonoapolakti. Kijliskej ika tonajli ijkuak onoapolakti noijkuilos ipan Registro de publicador de la congregación. Kijliskej ika noneki kitemiltiskej yejuin amatl pampa ijkon ikalpan toTajtsin kimatstos tlen inpan nochiua iteixpantijkauan Jehová niman para kimakaskej okseki tekitl ipan ikalpan toTajtsin niman makichikauilikan itlaneltokil. Noijki, kilnamiktiskej ika tlen kitlajtoltiskej notekitiltis ijkon ken kijtoua “Política global de protección de datos personales de los testigos de Jehová”, tlen uajnesi ipan jw.org. Maka mapano majtlaktli minutos ijkuak kitaskej nochi yejuin.

Tla yopanok se xiuitl ika yonoapolakti tokniuj, omemej tlayekankej iuan nosentlaliskej niman ijkon kiyolchikauaskej niman kijliskej seki tlen kipaleuis. Akin tlayekana kampa tenonojtsa tokniuj, noneki ompa nemis. Tla tokniuj xikajxiltia 18 xiuitl, noneki ompa nemiskej itajuan akin iteixpantijkauan Jehová. Tlayekankej nokojtiliskej kualtsin iuan tlajtoskej. Kijliskej ika kuajli tekititika niman kipaleuiskej nochipa manomachti iselti, mojmostla makipoua Biblia niman nochipa makiueyichiua toTajtsin iuan ichanejkauan, noijki kijliskej nochipa mauiya tlanechikoltin niman matenojnotsa nochi semanas (Efes. 5:15, 16). Tla xitlami nomachtia libros ¡Nochipa uelis tiyolpakis!, tlayekankej kitejtemouiliskej se tokniuj akin uelis iuan nomachtis. Noneki kijliskej san seki tlen uelis kichiuas pampa más noneki kijliskej tlen kuajli kichiujtika.