Ipampa tlaxtlauijli uelis yoliuiskej tlaltikpakchanejkej

Ijkuak noilnamiki imikilis Cristo, techpaleuiya matitlanemilikan itech nochi tlateochiualistin tlen tikpiyaskej ipampa tlaxtlauijli. Jehová xkeman okinek ika tlaltikpakchanejkej mamikikan. Ika yejon, melak techajmana ijkuak miki se tochanejkauj (1Co 15:26). Jesús melak onajman ijkuak okitak ika inomachtijkauan chokayaj pampa Lázaro omik (Jn 11:33-35). Pampa Jesús kipiya kualneskayomej ken iTaj, tikmatstokej ika Jehová noijki kiyolkokoua ijkuak techita tichokaj pampa se tochanejkauj miki (Jn 14:7). Jehová melak kineki mayejko tonajli ijkuak kinyolitis itekipanojkauan yolmelaujkej, niman tejuamej noijki (Job 14:14, 15).

Pampa toTajtsin kuelita ika nochi kuajli manochiua, noijki ijkon kichiuas itech yoliuilistli (1Co 14:33, 40). Xok tichokaskej kampa kintokaj akin yomijkej, aman ika yolpakilistli tikinseliskej akin yoliuiskej. ¿Tiktejtemoua kemanon titlanemilis itech tlamachialistli, niman melak ijkon tikchiua ijkuak yakaj miki? (2Co 4:17, 18). ¿Tiktlasojkamachilia Jehová pampa techmaka yejuin tetlayokolijli itech yoliuilistli niman ika itech Biblia techijlia ika akin yomijkej yoliuiskej? (Col 3:15).

• ¿Akinon mochanejkauj noso akin iuan timouika melak tikneki oksejpa tikitas?

• ¿Akinon itech akin kinteneua Biblia tikuelitaskia tikixmatis niman iuan titlajtos?