¿Akinon toTajtsin?

1. ¿Tleka noneki matikueyichiuakan toTajtsin?

Akin yemelak toTajtsin okichijchiuj nochi tlen onka. Yejua xkipiya kemanon otlakatiko niman xkeman mikis (Salmo 90:2). Itech yejua ualeua nochi kualtsin tlajtojli tlen onka ipan Biblia (1 Timoteo 1:11). Pampa toTajtsin otechmakak tonemilis, noneki san yejua tikueyichiuaskej. Xkita Apocalipsis (Revelación) 4:11.

2. ¿Tikixmati kenon toTajtsin?

Xakaj ueli kita toTajtsin pampa yejua se espíritu, kijtosneki ika inemilis melak ueyixtika xijkon ken se tlaltikpakchane (Juan 1:18; 4:24). Maski ijkon, uelis tikasikamatiskej kenon toTajtsin tla titlanemiliaj itech tlen yokichijchiuj. Xtlanemili itech yejuin: xochimej niman tlakilyomej techititia itlasojtlalis niman itlamachilis toTajtsin. Noijki, nochi tlen onka ipan iluikak techititia ikojtilis. Xkita Romanos 1:20.

Uelis tomachtiskej miyek itech toTajtsin tla tikitaj tlen kijtoua Biblia. Ompa techititia tlen toTajtsin kuelita niman tlen xkuelita, kenon kimita tlaltikpakchanejkej niman tlen kimachilia ijkuak itlaj panoua. Xkita Salmo 103:7-10.

3. ¿ToTajtsin kipiya itoka?

Jesús okijto: “To Tajtsin akin tinemi ne iluikak, machipaui motoka” (Mateo 6:9, NM). Maski sesejneka noso tlatlamantik kixmatij toTajtsin, kipiya san se itoka. Itech ken sekimej tlajtouaj, tlamantik noso sejneka kiteneuaj. Ika náhuatl noijtoua Jehová. Maski sekimej kitokayotiaj Yavé. Xkita Salmo 83:18 (82:19 ipan sekimej Biblias)

Ipan miyek Biblias yokipatlakej itoka toTajtsin niman san yokitlalijkej toTeko noso toTajtsin. Ijkuak okijkuilojkej Biblia, itoka toTajtsin uajnestiaya kanaj siete mil. Jesús okichiuj manoixmati itoka toTajtsin ijkuak okiminojnots tlaltikpakchanejkej. Xkita Juan 17:26.

Xkita video ¿ToTajtsin kipiya itoka?

4. ¿Najmana Jehová topampa?

Pampa nochiuiyan onka tlajyouilistli, ¿kijtosneki ika Jehová xnajmana topampa? Sekimej kijtouaj ika toTajtsin techtlajyouiltia pampa kineki techtlatlatas, san ika, yejon xmelauak. Xkita Santiago 1:13.

ToTajtsin yokinkauili tlaltikpakchanejkej makitlapejpenikan tlen kichiuaskej. ¿Xtiktlasojkaita ika yotechkauili matiktlapejpenikan tla tiknekij tiktekichiuiliskej? (Josué 24:15). Miyekej yokitlapejpenijkej kinchiuiliskej tlen xkuajli oksekimej, ika yejon miyekej tlajyouiyaj. Jehová kiyolkokoua ijkuak kita tlen xkuajli nochiua. Xkita Génesis 6:5, 6.

ToTajtsin Jehová kema najmana topampa. Yejua kineki matinemikan ika toyojlo. Xok uejkauis, kichiuas maka sa maonia tlajyouilistli niman kinpopolos akin tetlajyouiltiaj. Yejua kimatstika, tleka okikauili maonia tlajyouilistli. Ipan tlamachtijli 8 tikitaskej tleka tekauilia matlajyouilo. Xkita 2 Pedro 2:9 niman 3:7, 13.

5. ¿Kenon uelis tiknisiuiskej toTajtsin?

Jehová techijlia matiknotsakan ika teoyotl niman ijkon matiknisiuikan. Yejua najmana itech tlen topan nochiua (Salmo 65:2; 145:18). Yejua nochipa techtlapopoluiya. Noijki kita kenon tochikauaj pampa tiknekij tikyolpaktiskej, maski kemantika topopolouaj. Kuakon, maski titlajtlakolejkej, uelis touikaskej iuan toTajtsin ika nochi toyojlo. Xkita Salmo 103:12-14 niman Santiago 4:8.

Pampa Jehová akin otechmakak tonemilis, xok yakaj uelis tiktlasojtlaskej ijkon ken yejua (Marcos 12:30). Ijkuak tomachtiaj itech toTajtsin niman tikchiuaj tlen yejua kineki, tikteititiaj ika tiktlasojtlaj, niman ijkon uelis tiknisiuiskej. Xkita 1 Timoteo 2:4 niman 1 Juan 5:3.