TLAMACHTIJLI 7

Xkijto tlen melauak niman tlen tetlaneltokiltis

Lucas 1:3

TLEN TIUELIS: Xtekitilti tlen tikmati ika melauak, ijkon akin mitskakiskej tikinpaleuis pampa tlen kasikamatiskej melauak yes.

Xtekitilti tlen kijtoua tlen melauak. Tlen tikijtos makisa ipan iTlajtol toTajtsin niman nochipa ijkuak tiuelis itech xpoua tlen tikijtos. Tla titlajtoua itech ciencia, noticias, itlaj tlen yakaj ipan onochiuj noso itlaj okse, kuajli xkita ika tlen tikteneuas makijto tlen melauak niman tlen yenkuik yonomat itech yejon.
Kuajli xtekitilti tlen tijkuis. Ijkuak tiktetomilis se itlaxelol Biblia, xkilnamikto tlen kijtoua ikuitlapan niman iyekapan, tlen temachtia Biblia niman iamatlajkuiloluan “tekitketl” akin yolmelauak niman tlamachilise (Mat. 24:45). Tla tiktekitiltia itlaj tlen xnokixtia ipan toamatlajkuiloluan, xtlakaita nochi tlen kijtoua niman tlen kinekiya manasikamati akin okijkuilo.

Maka xkijto tlen xok onochiuj nion xmiyekili tlen onoijto. Xtlajpiya ika maka tikpatlas “seki tlaltikpakchanejkej” ika “miyekej tlaltikpakchanejkej”, “kemantika” ika “nochipa” niman “kanaj” ika “yemelak”.
Xkintlanemililti akin mitskaktokej. Sakin ika yotikpouj se itlaxelol Biblia noso okse amoxtli, xtetlajtolti ika tetlakaitalistli noso xteneua se neskayotl tlen kinpaleuis akin mitskaktokej san inselti makasikamatikan tlen melauak.