TLAMACHTIJLI 12

Xteititi ika titetlasojtla niman titeasikamati

1 Tesalonicenses 2:7, 8

TLEN TIUELIS: Xtlajto ika nochi moyojlo niman xteititi ika timajmana ipampa akin mitskaktokej.

Xtlanemili itech akin mitskakiskej. Uelis tikyektlalis moyojlo tla titlanemilia itech ajmantin tlen kixnamikij akin mitskakiskej, noijki xyejyeko tikmachilis tlen kimachiliaj.
Kuajli xtlapejpeni tlen tikijtos. Xyejyeko xkinyolchikaua niman xkinyolseui akin mitskakiskej. Maka xtekitilti tlajtoltin tlen uelis teyolkokoskej niman maka xkijto tlen xkuajli itech akin xkitekichiuiliaj Jehová nion itech tlen kineltokaj.
Xkimititi ika timajmana inpampa. Uelis tikteititis yejuin tla tiyemankatlajtoua niman ika ken tikimolinia momauan niman moxayak. Noijki xkilnamikto ika moxayak kiteititia tlen yemelak tikmachilia, ika yejon manesi ika tipaki.

Xyejyeko xtlajto san ken noneki niman maka melak makakisti ika timokojtilia ijkuak titlajtoua. Ijkuak tiamapouas, manesi ika tikmachilia tlen tikpoujtika, san ika, maka xchiua ika tejua mamitstlajtlatakan. Xyejyeko ika ijkuak titlajtos manauatikan vocales, tlen kichiuas ika motlajtol yemanki makakisti. Tla tikchiuas manauatikan consonantes, xkuajli kakistis motlajtol.