Iamatlajkuilol Grupo akin Tlayekana ipan nochi tlanechikoltin

Tokniuan akin timechtlasojtlaj:

Akin tikueyichiuaj Jehová tiktlasojtlaj iTlajtol, Biblia. Tejuamej kuajli tikmatstokej ika itech tiknextiaj tlen yemelak opanok yeuejkaui, tlajtolyekanalistin tlen kema techpaleuiyaj ipan tonemilis niman noijki techititia ika Jehová yemelak kintlasojtla tlaltikpakchanejkej (Salmo 119:105; Lucas 1:3; 1 Juan 4:19). Tiknekij ika nochi toyojlo tikinpaleuiskej oksekimej makixmatikan tlen melak kualtsin temachtia iTlajtol toTajtsin. Ika yejon, melak techyolpaktia timechixpantiliskej yejuin amoxtli itoka Tlamachtiltin tlen mitsmachtia Biblia. Xtechkauilikan matimechijlikan achijtsin itech yejuin amoxtli.

Ijkuak onoijkuilo yejuin amoxtli, ononemili ipan kokonej. San ika, noijki uelis melak kinpaleuis akin iuejueyimej makixmatikan okseki itech Biblia. Pampa Biblia onochijchiuj ika nochimej matechpaleui, kuajli tikmatstokej ika tla tomachtiaj yejuin tlamachtiltin, techpaleuis yemelak matiyolpakikan.

Pampa onokixti itech Biblia, yejuin amoxtli peua techpouilia itech kenon opeujkej nemij tlaltikpakchanejkej niman tlen sakin opanok. Ika xouijtika tlajtoltin, otikyejyekojkej titemachiltiskej tlen onochiuj ipan Biblia niman otokojtilijkej tiktlaliskej ijkon ken opanotia.

Yejuin amoxtli, xsan techpouilia tlen Biblia kijtoua opanok. Tlaixkopinaltin niman tlen ijkuiliujtok, kichiuas matikitakan ken yemelak opanok niman matikmachilikan tlen okimachilijkej akin noteneuaj ipan Biblia.

Yejuin amoxtli techpaleuis matikitakan ika Biblia tlajtoua itech akin okitlakamatkej Jehová niman akin xokichiujkej. Noijki techititis tlenon uelis tomachtiskej itech innemilis (Romanos 15:4; 1 Corintios 10:6). Yejuin amoxtli xeliujtok ika 14 secciones. Ipeujyan yejuin secciones, ika achijtsin tlajtoltin techijlia seki tlamachtiltin tlen uelis tomachtiskej.

Tla tejua tikinpiya mokoneuan, san sekan xpouakan se tlamachtijli niman xtlajtokan itech tlaixkopinaltin tlen kipiya. Sakin, xpouakan tlaxeloltin itech Biblia kampa onokixti tlamachtijli. Xkinpaleui mokoneuan makitakan kenon tlen Biblia kijtoua niman tlen tlamachtia yejuin amoxtli, notlajtolnamikij. Noijki uelis ijkin tikchiuas ijkuak tikmachtis se akin iueyi niman ijkon uelis kitas tlenon tlamachtia Biblia.

Melak tiknekij ika yejuin amoxtli makinpaleui nochimej, pipitikej niman akin iuejueyimej, akin kipiyaj kuajli inyojlo, makixmatikan iTlajtol toTajtsin niman makichiuakan ipan innemilis tlen ompa uelij. Yejuin kichiuas ika yejuamej noijki, san sekan imiuan ichanejkauan Jehová, makiueyichiuakan.