Se itech ikoneuan Jacob akin pipitikej, katka José. Ikniuan akin iuejueyimej okitakej ika intaj melak kitlasojtlaya. ¿Kenon tiknemilia onomachilijkej? Okinexikolitakej niman okitlauelitakej José. Se tonajli, okipix seki temiktli tlen xkeman kitemikiya niman okimijli ikniuan. Yejuamej okinemilijkej ika yejon temiktli kijtosnekiyaj ika se tonajli notlakuantelketsaskiaj ixpan. Ika yejon, ¡melak okitlauelitakej!

Se tonajli, ikniuan José kintlajpixtoyaj borregos nisiuj ueyikalpan Siquem. Jacob okititlan José makitati tlenon kichiujtoyaj. Ijkuak uejka okontakej José, opeuj noijliaj: “Nikan uajlauj akin temikini. ¡Matikmiktikan!”. Kuakon okajsikej niman okontlajkalkej ijtik se pozo. San ika, Judá okijto: “¡Maka nenkimiktiskej! Matiknemakakan ken se tlakeuajli”. Kuakon okinemakakej José ika 20 plata tomin itech tlasemankej madianitas akin yayaj Egipto.

Ikniuan okipolaktijkej itlaken ijtik iyesyo se chivo, okititlanilijkej intaj niman okijlikej: “Yejuin tlakentli, ¿xiyaxka mokoneuj?”. Jacob okinemili ika se yolki tlen tekuani okimikti José. Yejua melak onoyolkoko. Xakaj ueliya kiyolseuiaya.

Ijkuak oajsikej Egipto, Potifar se akin ueyixtoya okikouj José ken itlakeual. San ika, Jehová nemiya iuan José. Potifar okitak ika José melak kuajli tekitiya niman ika ueliskia itech tlaneltokas. Xouejkauj José okitlalijkej makitlajpiya nochi tlen iyaxka Potifar.

Isiuauj Potifar okitak ika José kojtik niman kualtsin katka. Mojmostla kijliaya José iuan manoteka. ¿Tlenon kichiuaskia José? Xokikak, yejua okijli: “¡Ka! Yejon xkuajli. Noteko notech tlaneltoka, niman tejua tiisiuauj. Tla mouan ninoteka, ¡nitlajtlakos ixpan toTajtsin!”.

Se tonajli isiuauj Potifar okinek kichiualtis José iuan manoteka. Yejua okajsik ipan itlaken, san ika, José ocholoj. Ijkuak Potifar onokuep ichan, yejua okikajkayauj, okijli ika José kinekiya kichiualtis iuan manoteka. Potifar melak okualan niman okitsauk José. San ika, Jehová xokilkauj.

Ijkuak José tsauktoya, Faraón, tekiuaj itech Egipto, okipix seki temiktli niman xakaj ueliya kitomiliaya. Se itekipanojkauj faraón okijli ika José ueliskia kitomiliskia tlenon kijtosnekiya tlen okitemik. Faraón nimantsin otlanauati makanatij.

Faraón okitlajtolti: “¿Uelis tinechtomilis tlen oniktemik?”. José okijli: “Egipto kipiyas miyek tlakuajli chikome xiuitl, sakin uajlaskej chikome xiuitl kampa onias apistli. Xtlapejpeni yakaj akin tlamachilise makisentlali tlakuajli niman ijkon mokalpan xmikis ika apistli”. Faraón okinankili: “¡Tejua nimitstlapejpenia! ¡Tejua akin ika ome tiueyixtos Egipto!”. ¿Kenon okimat José tlenon kijtosnekiyaj tlen okitemik Faraón? Jehová okipaleui.

José okisentlali tlakuajli chikome xiuitl. Sakin, nochiuiyan opeuj apistli ijkon ken yokijtoka. Nochiuiyan kuajtlakouiliayaj ika tlakuajli. Itaj José akin itoka katka Jacob okitekakili ika ipan Egipto onkatka tlakuajli, ika yejon, okintitlan majtlaktli ikoneuan makikouatij.

Ikoneuan Jacob oyajkej itech José, yejua nimantsin okimixmat. San ika, yejuamej xokixmatkej. Onotlakuanketskej ixpan ijkon ken okitemik ijkuak telpochtli katka. José kinekiya kimatis tla ikniuan ok tetlauelitayaj. Kuakon yejua okimijli: “Nemejuamej san onenmixtakatlachiakoj. Nenkinekij nenkimatiskej kenon uelis nenkixoxotoniskej topaís”. Yejuamej okijtokej: “¡Ka! Tejuamej 12 tikniujtin akin tichantij Canaán. Se yomik, niman akin xokoyotl nemi iuan totaj”. José okimijli: “Xnechuajuikilikan nemokniuj akin xokoyotl, ijkon nejua nimechneltokas”. Kuakon yejuamej onokuepkej ichan intaj.

Ijkuak ichanejkauan Jacob okitlamijkej tlakuajli, oksejpa okintitlan ikoneuan Egipto. Aman okuikakej imikniuj Benjamín akin xokoyotl. Pampa kinekiya kintlatlatas ikniuan, José okiyan icopa tlachijchiujtli ika plata ijtik icostal Benjamín kampa kitkiya xinachtli niman okijto ika kinekiyaj kichtekiliskej. Ijkuak itekipanojkauan José okinextijkej copa ijtik icostal Benjamín, ikniuan melak omojkatlachixkej. Okitlajtlanilijkej José makintlajtlakolmaka yejuamej maka Benjamín.

Ijkon okimat José ika ikniuan yonopatlakaj. José xok ouel okitelti tlen kimachiliaya, opeuj choka niman okimijli: “Nejua niJosé. ¿Ok yoltika notaj?”. Ikniuan melak otlamojkaitakej. Yejua okimijli: “Maka xmotlajtlakoltikan ika tlen oninexchiuilijkej. ToTajtsin yejua akin onechajtitlan nikan niman ijkon manimechmakixti. Aman xmotlasiuitikan xkuajuikakan notaj”.

Ikniuan onokuepkej inchan okijlitoj itaj tlen kuajli opanok niman okuikakej Egipto. Maski yopanoka miyek xiuitl, José niman itaj oksejpa onosentlalijkej.