Tlen notlajtoltiaj akin kitaj revistas
¿Iteixpantijkauan Jehová uelis kitejtemoskej ipan internet akin iuan nonamiktiskej?
Jehová kineki ika akin nonamiktiaj mayolpakikan niman maka keman manoxelokan (Mat. 19:4-6). Tla tikneki timonamiktis, ¿kenon uelis tiknextis se kuajli tlakatl noso se kuajli siuatl? Pampa Jehová otexchijchiuj, yejua kimatstika tlenon noneki tikchiuaskej ijkuak tikistinemiskej iuan yakaj niman ijkuak tonamiktiskej para nochi kuajli makisati. Niman melak techpaleuis tla tikchiuaj tlen yejua techijlia ipan Biblia. Matikimitakan seki textos.
Kachtopa, noneki kuajli tikasikamatiskej ika “iyojlo sen tlakatl tentikaj ikan tlakajkayaualistli niman [...] xakaj ueli kajsikamati” (Jer. 17:9). Ijkuak se tlakatl niman se siuatl akin kinekij nonamiktiskej peua kistinemij, tlen kimachiliaj uelis kintlamachilispolos. Tla nonamiktiaj san ipampa tlen kimachilijtiuetsij niman xkuajli noixmatij, uelis melak noyolkokoskej (Prov. 28:26). Yejua ika, akin san sekan kistinemij xnoneki noijliskej nochi tlen kimachiliaj nion xnoneki noijliskej tlen kinekij kichiuaskej ika tlayekapan ijkuak nion xikuajli noixmatij.
Proverbios 22:3 kijtoua: “Sen tlakatl yejuan nonemilia ijkuak kita itlaj xkuajli nochiua, nejkuania. Pero sen telpokatl yejua xe ixtojtomi, xkita on tlen xkuajli nochiua, niman xnejkuania. Ijkon tej, yejua uelis tlajyouis”. ¿Tlenon uelis topan nochiuas tla tiktejtemouaj ipan internet noso ipan se aplicación akin iuan tonamiktiskej? Teajman ika sekimej yokinkajkayaujkej niman yokinyolkokojkej pampa opeuj kistinemij iuan yakaj akin nion xkixmatij. Noijki, sekimej yokinchijchiujkej cuentas ipan internet niman ijkon tekajkayauaskej niman kiteichtekiliskej tomin. Sekimej akin ijkon kitechiuiliaj tekajkayauaj niman kiteijliaj ika iteixpantijkauan Jehová.
Matikitakan okse tlen teijtlako. Seki páginas de internet kijtouaj ika uelis mitsnextiliskej akin iuan timonamiktis. San ika, xakaj kimati tla yejuin yemelak tepaleui. ¿Kuajli yeskia tla se página de internet kitlapejpenia akin iuan tonamiktiskej? Ka, xkuajli yeskia. Pampa yejuin páginas de internet xuelis techpaleuiskej ijkon ken Biblia techpaleuiya (Prov. 1:7; 3:5-7).
Proverbios 14:15 techijlia itlaj tlen techpaleuiya, kijtoua: “On tlakatl yejuan tonto nochi kineltoka tlen kijliaj, pero on tlakatl yejuan tlamatki achtoj kinemilia tlinon kichiuas”. Achto tiktlapejpeniskej akinon iuan tonamiktiskej, kachtopa noneki kuajli tikixmatiskej. San ika, tla yakaj san tiknotsa ipan internet noso ipan se aplicación, xuelis kuajli tikixmatis. Maski tla akin san sekan kistinemij nochi kinoijliaj ipan internet niman uejkaui ika ompa nonojnotstokej, xkijtosneki tla melauak noixmatij. Ijkon tikijtouaj pampa sekimej akin okinemilijkaj ika yokinextijkaj akin nochipa iuan nemiskiaj, omojkatlachixkej ijkuak okitakej ika xijkon katka ken okitakej ipan internet.
Salmo 26:4 kijtoua: “Xkaman ninouika iminuan on tlakajkayajkej, nion ninosentlalia iminuan on omexayakyejkej”. Miyekej tlakajkayauaj ipan internet pampa kinekij más makimixmatikan. Ika tlen kijkuilouaj, xkiteititiaj kenon yemelak yejuamej. Sekimej kijtouaj ika iteixpantijkauan Jehová, san ika, ¿yemelak yonoapolaktijkej? ¿Chikauak kipiyaj intlaneltokil? ¿Kuajli nouikaj iuan Jehová? ¿Kintlakaitaj ipan tlanechikojli? ¿Noso xkuajli kimitaj ipampa tlen kichiuaj? (1 Cor. 15:33; 2 Tim. 2:20, 21). ¿Uelis nonamiktis ijkon ken Biblia tlanauatia? Yejuin xuelis tikmatiskej tla xtitlajtouaj imiuan oksekimej tokniuan akin kema kixmatij (Prov. 15:22). Kuajli nesi ika se itekipanojkauj toTajtsin akin yolmelajkanemi xkeman nonamiktiskia iuan yakaj akin xnoapolaktia (2 Cor. 6:14; 1 Cor. 7:39).
Tla ipan internet noso ipan se aplicación xuelis tiknextiskej akin iuan tonamiktiskej, ¿kuakon kanon niman kenon uelis tiknextiskej toixnamik? Ijkuak ueli tosentlaliaj ipan tlanechikoltin noso uejueyi tlanechikoltin, ueli tikimixmatij oksekimej iteixpantijkauan Jehová.
Tla akin kinekij nonamiktiskej kixelouaj tiempo para san sekan nemiskej, uelis kitaskej tla san noijki tlen kuelitaj.
Ijkuak xueli san sekan tosentlaliaj, ken ijkuak panoua se ueyi kokolistli ken COVID-19, tikinpanoltiaj tlanechikoltin ipan internet. Ompa, uelis tikimixmatiskej oksekimej iteixpantijkauan Jehová akin xinonamiktiaj. Ipan yejon tlanechikoltin uelis tikitas kenon tlanankilia niman tlaneltoka akin yotikuelitak (1 Tim. 6:11, 12). Noijki, uelis titlajtlatos imiuan tokniuan sakin ika yotlan tlanechikojli ipan salas para grupos tlen kipiya Zoom. Noijki uelis tikimixmatiskej oksekimej tokniuan ijkuak yejuamej nosentlaliaj ipan internet para noyolpaktiskej. Ijkuakon, noijki uelis kuajli tikitas kenon itlamachilis akin yotikuelitak (1 Ped. 3:4). Ijkuak nenmoixmatstiaskej, nenkitstiaskej tla san noijki tlen nenkuelitaj niman tla nemasikamatij.
Ijkuak se ichpochtli noso telpochtli kichiua tlen kijtoua Biblia ijkuak kitejtemoua akin iuan nonamiktis, uelis nochipa yolpakis iuan ixnamik. Nochiua ijkon ken kijtoua Proverbios 18:22: “Sen tlakatl yejuan nonamiktia iuan sen kuajli siuatl [noso se siuatl akin nonamiktia iuan se kuajli tlakatl], kiselis on tlen sanoyej kuajli, niman kiselia itetlajsojtlalis toTEKO”.