SECCIÓN 2
Nochipa san yejua xtlasojtla
“Ma ka yakaj tlakatl kixelos on tlen Dios okinsentlalij.” (Marcos 10:9)
Jehová kineki “[matiktlasojtlakan] yolmelaujkanemilistli” (Miqueas 6:8). Yejuin melak noneki itech akin yononamiktijkej, pampa tla xyolmelaujkanemij xok uelis noneltokaskej. Niman tla yejuamej noneltokaj, intlasojtlalis ueyiyas.
Ipan yejuin tonajli, yolmelaujkanemilistli polijtiuj itech akin yononamiktijkej. Tla tikneki tiktlajpiyas monamiktilis, noneki tikchiuas ome tlemach.
1 XTLANEMILI KACHTOPA ITECH MONAMIKTILIS
TLEN BIBLIA KIJTOUA: “Nenkitlapejpeniskej on tlen más kuajli [noso tlen melak noneki, TNM]” (Filipenses 1:10). Monamiktilis itlaj tlen melak noneki ipan monemilis. Ika yejon, noneki kachtopa itech xtlanemili.
Jehová kineki ika tejua nochipa san xtlachia itech moixnamik niman san sekan xyolpakikan (Eclesiastés 9:9). ToTajtsin kuajli kijtoua ika noneki nochipa xtlajpiya moixnamik, niman xtejtemo kenon tikchiuas mayolpaki (1 Corintios 10:24). Noneki moixnamik makimachili ika tiktlasojkaita niman makimachili ika tejua tikneki iuan xnemi.
TLEN UELIS TIKCHIUAS:
Nochipa xtejtemo san sekan xnemikan, xkititi ika san ipampa timajmana
Xtlanemili nemotech, maka san motech
2 XTLAJPIYA MOYOJLO
TLEN BIBLIA KIJTOUA: “San akinon yejuan kitas se siuatl ikan xkuajli eleuilistli, yejua ye siuapajpatla ipan iyojlo iuan on siuatl” (Mateo 5:28). Tla yakaj xkiteltia tlen kinemilijtika itech auilnemilistli, kentla kikajkayaujtika ixnamik.
Jehová kijtoua ika noneki tiktlajpiyas moyojlo (Proverbios 4:23; Jeremías 17:9). Ika yejon, maka xkita tlen mitsijtlakos (Mateo 5:29, 30). Xchiua ken okichiuj Job, akin xokikauili ixtololojuan makitlajtlatakan okse siuatl ika xkuajli ileuilistli (Job 31:1). Maka xnemili tiktlajtlatas ken auilnemilo. Maka itlaj xmachili ipan moyojlo itech akin xmoixnamik.
TLEN UELIS TIKCHIUAS:
Kuajli xkimititi oksekimej ika yemelak tikchiua tlen otikijto ijkuak otimonamikti
Xtlakaita tlen kimachilia moixnamik, niman tla xkuajli nomachilia ipampa yakaj iuan timouika, maka sa iuan xmouika