SECCIÓN 3

Kenon tikyektlalis tlauejli

“Sanoyej xmotlajsojtla[kan] iuan oksekimej pampa tla melauak nenkintlajsojtlaj [...], nenkintlapojpoluiskej maski miyekpa tlajtlakoskej nemotech.” (1 Pedro 4:8)

Ijkuak se tlakatl niman se siuatl nonamiktiaj, peua kipiyaj seki tlaueltin. Kanaj ijkon panoua pampa xsan noijki ken tlanemiliaj nion tlen kimachiliaj noso pampa tlamantik noso sejneka ken onoskaltijkej. Kemantika, tlauejli noijki ualeua itech oksekimej noso ijkuak itlaj panoua.

Kanaj xtiknekis tikitas tlen melauak panoua, san ika, Biblia kijtoua xkimixnamikikan tlaueltin (Mateo 5:23, 24). Tla tikintlakamati tlajtolyekanalistin, melak kuajli tikyektlalis tlaueltin.

1 XTLAJTO ITECH TLAUEJLI

TLEN BIBLIA KIJTOUA: “Onka [...] kemanon titlajtos” (Eclesiastés 3:1, 7). Noneki xnemili kemanon titlajtos itech tlauejli; xmelajkaijli moixnamik kenon timomachilia niman kenon titlanemilia. Xkijli nochipa tlen melauak (Efesios 4:25). Maski tla tikmachilia ika tikualani, xmochikaua maka iuan xmokualani. Tla yemanki titlajtoua, tlauejli tlen nenkipiyaj xueyiyas (Proverbios 15:4; 26:20).

Maski tla xnoijki titlanemilia ken moixnamik, nochipa kuajli xtlajto; xkititi ika tiktlasojtla niman tiktlakaita (Colosenses 4:6). Nimantsin xmotlauelseuikan niman maka xnemilikan xok nemonotsaskej (Efesios 4:26).

Akin yononamiktijkej san sekan kitaj kenon kiyektlaliskej tlauejli

TLEN UELIS TIKCHIUAS:

Xnemili kemanon kuajli titlajtos itech tlauejli
Ijkuak moixnamik mitsnotstika, maka xtlajtolkotona. Sakin tejua noijki uelis titlajtos

2 XKAKI NIMAN XKASIKAMATI

TLEN BIBLIA KIJTOUA: “Xmotlajsojtlakan se iuan okse [...], niman sanoyej xmotlakaitakan sekimej iuan oksekimej” (Romanos 12:10). Melak noneki xkaki niman xkasikamati tlenon kinemilia moixnamik “ijkuak [...] itlaj kajmana” niman noijki xmochikaua xmoyolyemanili (1 Pedro 3:8; Santiago 1:19). Manesi ika melauak tijkaki. Nochipa ijkuak tiuelis, xkajkaua tlen tikchiujtika niman xkaki kuajli tlen mitsijlia, noso xtlajtolti tla uelis sakin nentlajtoskej. Tla tikita moixnamik ken akin iuan titekiti niman xken akin iuan timoixnamiktika, mitspaleuis xnimantsin tikualanis (Eclesiastés 7:9).

TLEN UELIS TIKCHIUAS:

Kuajli xkaki tlen mitsijlia moixnamik maski kemantika xtikuelitas tlen kijtoua
Xnemili tlenon kijtosneki tlen mitsijlitika. Xkita kenon nesi ipan ixayak niman kenon kakisti itlajtol

3 XCHIUAKAN TLEN YONENKIJTOKEJ

TLEN BIBLIA KIJTOUA: “Nochi tekitl tesiauiti kipiya tlen ika tepaleui, san ika, tla san titlajtos xtlaj tikselis” (Proverbios 14:23). Xsan nenkijtoskej kenon uelis nenkiyektlaliskej tlauejli. Noneki nenkichiuaskej ijkon ken yonenkijtokej. Kanaj nonekis melak nemochikauaskej, san ika, yejon melak kuajli yes (Proverbios 10:4). Tla san sekan nentekitij, nenkipiyaskej se “ueyi tlaxtlauijli” (Eclesiastés 4:9).

TLEN UELIS TIKCHIUAS:

Xnemili tlenon kuajli tikchiuas tejua iuan moixnamik niman ijkon nenkiyektlaliskej tlauejli
Tla yopanok seki tonaltin, xkita tlenon yonenuelkej nenkichiuaj