SECCIÓN 5
Kenon uelis nemouikaskej iuan nemochanejkauan
“[Xmotlakentikan] ikan [...] kuajlilistli, ikan yolyemanilistli, ikan kuajli tenotsalistli itlaj ika, niman ikan ijyouilistli.” (Colosenses 3:12)
Ijkuak se nonamiktia, kipeualtia se yenkuik familia. Maski xkeman kikauas ika kintlasojtlas niman kintlakaitas itajuan, aman noneki kachtopa najmanas san itech ixnamik. Kanaj seki nemochanejkauan ouijtika kasikamatiskej yejuin. San ika, tlajtolyekanalistin tlen uajlauej ipan Biblia kichiuas maka xpiya tlauejli imiuan niman noijki mitspaleuis machikaui monamiktilis.
1 KUAJLI XKIMITAKAN NEMOCHANEJKAUAN
TLEN BIBLIA KIJTOUA: “Xtlakaita motaj niman monan” (Efesios 6:2). Maski kech xiuitl tikpiyas, nochipa noneki xkintlakaita motajuan. San ika, xkilnamiki ika moixnamik noijki noneki najmanas ipampa itajuan. “On yejuan tetlajsojtla xnexikolej”, ika yejon, maka xnemili ika moixnamik xok mitstlasojtla ijkuak najmana ipampa ichanejkauan (1 Corintios 13:4; Gálatas 5:26).
TLEN UELIS TIKCHIUAS:
Maka xkijto ken yejuin: “Mochanejkauan nochipa nechtejteneuaj” noso “Monan xkeman kuelita tlen nikchiua”
Xyejyeko tikmachilis ken nomachilia moixnamik
2 XMELAJKATLATO TLA NONEKI
TLEN BIBLIA KIJTOUA: “Yejua ika tlakatl kikauas itaj niman inan, niman ijkon nosentlalis iuan isiuauj, niman nochiuaskej san se tlalnakayotl” (Génesis 2:24). Ijkuak yotimonamikti, kanaj motajuan ok kinekiskej mitstlajpiyaskej niman kinekiskej nokalaktiskej itech monamiktilis hasta kampa xnoneki.
Nemejuamej uelis nenkimijliskej ika tlasojtlalistli kanon kema uelis mechpaleuiskej. Se uelis melajkatlajtos, san ika, makichiua ika tlakaitalistli (Proverbios 15:1). Tla nenyolyemankej, nenteijyouiyaj niman nenyolseujkej, mechpaleuis kuajli xmouikakan iuan nemochanejkauan niman “xkimijyouikan [...] ika on tetlajsojtlalistli” (Efesios 4:2).
TLEN UELIS TIKCHIUAS:
Tla mitsajmana pampa mochanejkauan nokalaktiaj itech nemonemilis, xtlajto iuan moixnamik ijkuak nenyolseujtoskej
Xtlajtokan kenon nenkichiuiliskej ijkuak panos yejuin