¿Kenon oksejpa uelis timouikas iuan Jehová?

SEJSE xiuitl, miyekej oksejpa uajnokuepaj itech tlanechikojli. San matikonnemilikan kenon “ne iluikak [...] más onkaj paktli” ijkuak se itech yejuin iborreguitos toTajtsin uajnokuepa (Luc. 15:7, 10). Tla tejua kemach yotiuajmokuep itech tlanechikojli, kuajli xmatsto ika Jesús, ángeles niman Jehová melak yolpakij pampa yotiuajmokuep. San ika, kanaj tikixnamikis miyek tlen ouijtika ijkuak tikyejyekos oksejpa timouikas iuan Jehová. ¿Kanaj tlenon tikixnamikis niman tlenon mitspaleuis?

SEKI TLEN UELIS TIKIXNAMIKIS

Miyekej tokniuan akin uajnokuepaj itech tlanechikojli ok xkuajli nomachiliaj. Tla tejua ijkon timomachilia, kanaj tikasikamati kenon onomachili tekiuaj David. Maski Jehová yokitlapopoluijka, yejua okijto: “Notlajtlakoluan más miyek [...] hasta xok niyolchikauak” (Sal. 40:12; 65:3). Yakaj akin uajnokuepa itech Jehová, miyek xiujtin ok notlajtlakoltia noso pinaui. Isabelle,a se tokniuj akin ouejkauj ipantsin 20 xiuitl para oksejpa onokuep itech ikalpan Jehová, okijto: “Xueliya nikneltokaya tla Jehová yonechtlapopoluijka”. Tla tejua melak timoyolajmana, oksejpa uelis ijtlakauis ken timouika iuan Jehová (Prov. 24:10, TNM). Maka xmokauili ijkon mopan manochiua.

Oksekimej melak ajmankamikij pampa kitaj ika noneki miyek kichiuaskej para oksejpa kuajli nouikaskej iuan Jehová. Sakin ika youajnokuep, Antoine, okijto: “Yonikilkaujka nochi tlen nikchiuaya para nikueyichiuas Jehová”. Pampa sekimej kanaj ijkon nomachiliaj xok nokojtiliaj chikauak kitekichiuiliskej Jehová.

San matikonnemilikan tlenon panoua ijkuak se ueyi ajakakiyaujtli kixoxotonia se kajli. Akin ompa chanti melak najmana ijkuak kita ika ikal yoxoxoton niman pampa kita ika uejkauis niman kitekiyomakas para oksejpa kiyektlalis. Tla tejua aman xok timouika iuan Jehová pampa otikchiuj se ueyi tlajtlakojli, kanaj tikita ika ouijtika oksejpa iuan timouikas. San ika, onka miyek tlen uelis mitspaleuis oksejpa iuan xmouika.

Jehová techijlia: “Xuajlakan, [...] ma tikitakan ken tikchiuaskej para tikixtiskej in tlen xkuajli” (Is. 1:18). Jehová mitstlasojtla pampa tejua yotikteititi ika oksejpa tikneki iuan timouikas. Xkonnemili, Jehová uelis mitstekitiltis para kiteititis ika Satanás se tlakajkayaujketl (Prov. 27:11).

Tejua yopeuj tiknisiuiya Jehová pampa itech yotiuajmokuep, niman yejua kuajli kijtoua ika noijki mitsnisiuis (Sant. 4:8). Melak kuajli tla tokniuan kitaj ika oksejpa yotimokuep itech tlanechikojli. San ika, xsan yejon noneki tikchiuas, noneki más tiktlasojtlas Jehová niman tikitas ken moTaj niman moamigo. ¿Kenon uelis tikchiuas?

TLEN UELIS TIKCHIUAS

Xmokojtili tikchiuas nochi tlen tiueli. Ijkon ken se kajli tlen ajakakiyaujtli kixoxotonia xnochi uetsi, kanaj tejua noijki xnochi tikilkaua itech Jehová nion itech tlen kichiuas ika tlayekapan. Ijkon ken yejuin kajli oksejpa noneki makiyektlalikan, tejua noijki noneki oksejpa peuas titenojnotsas, tias tlanechikoltin niman tinemis imiuan tokniuan. Matikitakan seki tlen uelis tikchiuas.

Nochipa xnotsa Jehová. Jehová mitsasikamati ijkuak kita ika tipinaui tiknotsas ipampa motlajtlakol (Rom. 8:26). Maski ijkon, nochipa xnotsa Jehová niman xkijli ika melauak tikneki oksejpa iuan timouikas (Rom. 12:12). Andrej kijtoua: “Ninotlajtlakoltiaya niman nipinauiya ipampa tlen yonikchiujka, san ika, ijkuak nitlamiya nikchiuaya teoyotl, niuajyolseuiya”. Tla tejua xtikmati tlenon tikijlis Jehová, xtlanemili itech tlen okijto tekiuaj David ijkuak onoyolkuep. Yejuin, uelis tiknextis ipan Salmo 51 niman 65.

Mojmostla xmomachti Biblia. Yejuin mitspaleuis más xchikaua motlaneltok niman más xtlasojtla Jehová (Sal. 19:7-11). Felipe okijto: “Pampa xmás ninomachtiaya Biblia, xok chikaujtoya notlaneltok niman onikchiuj se tlajtlakojli. Pampa xnikneki oksejpa ijkon nopan manochiua, opeuj más kuajli ninomachtia niman nikamapoua iTlajtol toTajtsin”. Tejua noijki uelis ijkon tikchiuas. Tla xtikmati tlenon timomachtis, xtlajtlanili mamitspaleui se moamigo akin kipiya chikauak itlaneltokil.

Oksejpa xmouika imiuan tokniuan. Sekimej akin uajnokuepaj itech tlanechikojli najmanaj pampa kinemiliaj ika sekimej kanaj xkuajli kinseliskej. Larissa kijtoua: “Melak nipinauiya. Nikmachiliaya ika yoniktsojkuilojka tlanechikojli. Ouejkauj ijkon ninomachiliaya”. Kuajli xmatsto ika tlayekankej niman oksekimej tokniuan akin kipiyaj chikauak intlaneltokil kinekij mitspaleuiskej para oksejpa kuajli xmouika iuan Jehová (xkita recuadro “Tlen uelis kichiuaskej tlayekankej”). Yejuamej melak yolpakij pampa yotiuajmokuep niman kinekij ika tejua noijki xyolpaki (Prov. 17:17).

¿Kenon uelis más tikinnisiuis tokniuan? Nochipa xuiya tlanechikoltin niman xtenojnotsa imiuan tokniuan. ¿Kenon mitspaleuis yejuin? Félix okijto: “Kuajli nesiya ika tokniuan melak kinekiyaj maninokuepa. Onikmachili ika nechtlasojtlaj. Nochimej onechpaleuijkej kuajli maninomachili ipan tlanechikojli, manikmachili ika Jehová yonechtlapopoluijka niman ika oksejpa ueliskia niktekichiuilis” (xkita recuadro “Tlen tejua uelis tikchiuas”).

¡MAKA XMOSIAUJKAUA!

Chika tejua tikyejyekoua oksejpa kuajli timouikas iuan Jehová, Satanás xkikajkauas ika mitstlatlatas (Luc. 4:13). Yejua ika, tla xtikneki mamitstlani, noneki más tikchikauas motlaneltokil.

Jehová ijkin okimijli itekipanojkauan: “Akin yopoliuj niktejtemos, niman akin yonoxelo oksejpa nikuajuikas, nikpajtis akin kualo, niman nikyolchikauas akin nokokoua” (Ezeq. 34:16, TNM). Jehová yokinpaleui melak miyekej itekipanojkauan oksejpa iuan manouikakan. Kuakon, uelis kuajli tikmatstos ika yejua kineki mitspaleuis oksejpa kuajli iuan xmouika.