Mayolyemankej

¿TLENON KIJTOSNEKI?

Akin yolyemankej tetlakaitaj, xnoueyimatij nion xkinemiliaj ika melak tlasojtij. Yejuamej najmanaj inpampa oksekimej niman kinektokej ueliskej intech.

Sekimej kinemiliaj ika tla tiyolyemanki kijtosneki xtiyolchikauak, san ika, tlen melauak, ijkuak yakaj yolyemanki kipaleuiya manoyektlali, pampa kasikamati ika noijki nopopoloua niman ika xnochi ueli kichiua.

¿TLEKA MELAK NONEKI?

• Mitspaleuis xkinnexti akin imiuan timouikas. Libro La epidemia del narcisismo kijtoua ika akin yolyemankej nimantsin uelij kinnextiaj akin imiuan nouikaj niman ika xkintekiyomaka nonojnotsaskej niman nouikaskej imiuan oksekimej.

• Kipaleuis kuajli makisati mokoneuj. Tla mokoneuj nokojtilia yolyemanki yes, kipaleuis aman niman ika tlayekapan, ken ijkuak kitejtemos tekitl. Tlapajtiketl Leonard Sax okijkuilo: “Se telpochtli akin noueyimati niman kinemilia ika nochi ueli kichiua, xkipaleuis ijkuak ontlajtos iuan akin kimakas tekitl, san ika, akin kuajli kikaki tlen kijlia akin kitlakeuas uelis kipaleuis makipiya yejon tekitl”.a

¿KENON UELIS TIKINMACHTIS MAYOLYEMANKEJ?

Xkinpaleui mokoneuan maka sajnoye intech matlanemilikan

TLEN BIBLIA TECHMACHTIA: “Tla yakaj kinemilia ueyixtikaj, niman xmelauak ueyixtikaj, tla ijkon, sano yejua nokajkayaua” (Gálatas 6:3).

• Maka xkijli tlen nion xnochiuas. “Uelis tikpiyas nochi tlen tiknekis”. “Uelis tikchiuas nochi tlen yotiknemili”. Ijkuak tejua ijkin tikijlia, kakisti kentla melak tikyolchikaua, san ika, kemantika nion xnochiua tlen tikijlia. Kuakon, tla mokoneuan san kitejtemouaj tlen kema uelis kichiuaskej, niman nokojtiliaj, kanaj kuajli onkisaskej.

• Xkimijli tlenon kuajli kichiujtokej. Tla tikijlia mokoneuj ika yejua nochi melak kuajli kichiua, xkipaleuis mayolyemanki. San xkijli tlenon kema kuajli okichiuj.

• Xkita ika mokoneuan maka sajnoye makitekitiltikan redes sociales. Ipan yejuin tonaltin, miyekej kiteititiaj ipan redes sociales kenon yejuamej, tlen uelij kichiuaj noso tlen kuajli yokichiujkej. Nochi yejuin xkichiuaj akin yolyemankej.

• Xmachti mokoneuj nimantsin makitlajtlani makitlapopoluikan. Ijkuak mokoneuj nopopolos, xpaleui makiseli ika xkuajli tlen okichiuj.

Xkinmachti matetlasojkamachilikan

TLEN BIBLIA TECHMACHTIA: “Xpiyakan tetlajsojkamachilistli” (Colosenses 3:15).

• Makitlasojkamatikan tlen yokichijchiuj toTajtsin. Kokonej noneki kipatiojkaitaskej nochi tlen onka. Xkimasikamachilti ika tejuamej ueli tinemij pampa tikpiyaj ajakatl, tlen tikoniskej niman tlen tijkuaskej. Tla tejua ijkin tikimijlia mokoneuan, tikinpaleuis makitlasojkamatikan nochi tlen yokichijchiuj toTajtsin.

• Makitlasojkamatikan tlen kuajli kichiuaj oksekimej. Xkititi mokoneuj ika oksekimej uelij kichiuaj seki tlen yejua xueli, niman ika xnoneki kinnexikolitas, yejua uelis miyek intech nomachtis.

• Xkimititi kenon tetlasojkamachiliskej. Xkimititi mokoneuan ika noneki tetlasojkamachiliskej niman ika xsan noneki kijtoskej, noneki makisa ipan inyojlo. Tla se ueli tetlasojkamachilia, uelis yolyemanki yes.

Xkimititi ika melak noneki titepaleuis

TLEN BIBLIA TECHMACHTIA: “Ikan yolyemanilistli xmomatikan ika oksekimej más uejueyixtokej xken nemejuamej. Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filipenses 2:3, 4).

• Xkimijli mokoneuan matlapaleuikan nemochan. Tla tejua xtikijlia mokoneuj matlapaleui, kentla tikijlitoskia: “Tejua melak tiueyixtika niman xnoneki tikchiuas yejuin tekitl”. Yejua kachtopa noneki tlapaleuis kalijtik niman sakin, nauiltis. Xkititi kenon melak kinpaleuiya oksekimej ijkuak kichiua tlen kinauatiaj niman kenon melak kipatiojkaitaskej niman kitlakaitaskej ipampa itekiyo.

• Xkimititi ika kinyolpaktis tla kinpaleuiyaj oksekimej. Tla mokoneuj najmana inpampa oksekimej, kipaleuis kuajli matlanemili. Ika yejon, san sekan xkitakan akinon noneki makipaleuikan niman kenon yejua uelis kipaleuis. Tla yoontepaleui, xkijli ika melak kuajli tlen okichiuj.