Tla tikchiua nochi yejuin, mitspaleuis xkintlajpiya akin tikintlasojtla
MÁS KUAJLI XMOUIKA IUAN MOIXNAMIK
Más kuajli xmouika iuan moixnamik
Biblia kijtoua: “Más kuajli omemej xken se san iselti, […] tla se de yejuamej uetsi, on okse kuiteuas” (Eclesiastés 4:9, 10). Akin yononamiktijkej noneki yeskej ken se equipo akin san sekan nauiltiaj para tetlaniskej, niman xnoneki yeskej ijkon ken ome equipos akin notlatlanij.
Ijkuak itlaj mitsajmanas maka xmotlauelkixti iuan moixnamik. Más kuajli ninnemiskej tla xnimantsin nenkualanij niman nenmoijyouiyaj.
Xxelokan tiempo ipan se semana para nentlajtoskej itech tlen mechajmana. Maka xmajuakan, yej, xyejyekokan nenkiyektlaliskej tlauejli.
Xxelokan tiempo para san sekan nenkichiuaskej tlen nenomemej nenkuelitaj.
Xkilnamikikan nochi tlen kualtsin san sekan yonenkichiujkej. Kanaj uelis nenkimitaskej nenmofotos de ijkuak onemonamiktijkej noso de okse tonajli ijkuak kualtsin onenpanokej.
“Akin yononamiktijkej xnochipa notlajtolnamikij, maski ijkon uelis san sekan tekitiskej. Yejuamej uelis san sekan kitlapejpeniskej tlen nochiuas niman nopaleuiskej para kuajli makisati” (David).
MAKA XKINTLALKAUI MOAMIGOS
Maka xkintlalkaui moamigos
Maka san xchiato moamigos mamitsyolchikauakan, tejua noijki xkinyolchikaua. Tla ijkon tikchiua, tejua noijki timoyolchikauas.
Mojmostla xkonnotsa se moamigo para tikmatis kenon nemi.
Xkintlajtolti moamigos kenon yokixikojkej itlaj tlen tejua tikixnamiktika.
“Toamigos techpaleuiyaj ijkuak tikixnamikij itlaj tlen xkuajli. Kemantika san noneki matechilnamiktikan itlaj tlen itikmatstoyaj, yejuamej techtlasojtlaj niman kimatstokej ika tejuamej noijki tikintlasojtlaj” (Nicole).
XKIMASIKAMATI MOKONEUAN
Xkinmasikamati mokoneuan
Biblia kijtoua: “Cada se de nemejuamej noneki nemis listo para nentlakakiskej. Pero no xmatikan ika xmechtocaroua nimantsin nentlajtoskej” (Santiago 1:19). Kanaj mokoneuan xmás kinekij kijtoskej kenon nomachiliaj, san ika, tla tejua kuajli tikinkaki, yejuamej kinekiskej mitsijliskej kenon nomachiliaj.
Kemantika, kokonej más kuelitaj nonojnotsaskej imiuan intajuan ijkuak nejnentiuej noso ijkuak yauej ipan carro. Yejua ika, xyejyeko nochipa imiuan timonojnotsas.
Xkitakan ika nemokoneuan maka melak makimitakan noticias kampa noijtoua tlen xkuajli panotika.
Xkimijli mokoneuan tlenon tikchiujtika para tikintlajpiyas.
Xkimijli mokoneuan tlenon uelis nenkichiuaskej tla itlaj panoua niman xchiuakan kentla ijkon ipanotoskia.
“Xtlajto imiuan mokoneuan niman xkaki tlen mitsijliaj, kanaj nomojtiaj, pinauij noso kualantokej, san ika, xtlaj mitsijliaj. Xkimijli ika noijki ijkon timomachiliani niman tlenon tikchiua para xijkon timomachilis” (Bethany).