TLEN XKUAJLI PANOTIKA

4 | Xmatsto ika tlayektlaliuis

¿TLEKA NONEKI IJKON TIKCHIUAS?

Nochi tlen xkuajli panotika yokichiuj ika miyekej maka kuajli manomachilikan niman hasta makualokan. Miyekej akin melak yotlajyouijkej, xok kineltokaj ika ajsis tonajli ijkuak kuajli tinemiskej. ¿Tlenon inpan nochiua sekimej?

Sekimej xok kinekij kimatiskej tlenon panos ika tlayekapan.
Sekimej peua melak tlauanij niman kinkuij drogas.
Oksekimej kinemilia ika más kuajli yeskia tla xok nemiskiaj niman hasta kijtouaj: “San nenka nitlaxikojtika”.

¿Tikmatiya yejuin?

Kanaj seki tlen tikixnamiki xuejkauis niman kanaj uelis san totoka noyektlalis.
Tla tlen tikixnamiktika xnoyektlalia, xchiua itlaj tlen mamitspaleui xxiko tlen mopan nochiujtika.
Biblia kijtoua ika ajsis se tonajli ijkuak noyektlalis nochi tlen xkuajli panotika.

¿Tlenon uelis tikchiuas?

Biblia kijtoua: “Maka xkomatstiakan on tlen mostla nochiuas, pampa cada tonajli ye onkaj tlen nenkiseliskej yejuan ika nemokauaskej. Cada tonajli tej, nenkipiyaskej tlinon mechpajsojlos san kech uelis nenkixikoske” (Mateo 6:34).

Xchiua san tlen tiuelis. Maka sajnoye xmajmana ipampa tlen mostla panos, pampa yejon uelis kichiuas maka xchiua tlen tikchiuaskia ipan yejon tonajli.

Tla nochipa titlanemilijtika itech tlen ueliskia panos, uelis kichiuas sajnoye xajmankamiki niman peuas tiknemilis ika xkeman uelis kuajli tinemiskej.

¿KENON UELIS TIKXIKOS? Seki tlen uelis mitspaleuis

XNEMILI IKA NOCHI KUAJLI ONKISAS

Biblia kijtoua: “Para yejuan chanti ikan ajmantli, xonkaj tonajli yejuan kuajli, niman yejuan iyolika nemi, kimati ken nochipa iluitl” (Proverbios 15:15). Tla san titlanemilijtika itech tlen xkuajli tikixnamiktika, kanaj xtikmatis kenon uelis tikyektlalis. San ika, tla tiknemilia ika nochi kuajli onkisas, kanaj uelis tikmatis kenon tikxikos noso tikyektlalis tlen tikixnamiktika.

Maka sajnoye xkimita niman xkinkaki noticias.
Ijkuak yoteotlak, xnemili ome noso yeyi tlemach tlen tiktlasojkamati.
Xkijkuilo nochi tlen noneki tikchiuas ipan se tonajli. Tla tikita ika itlaj melak tiuejkauis para titlamis, san ajachijtsin xchiujtiuj, ijkon tikitas kenon ika yolik titlantias motekiyo.

XTLAJTLANI MAMITSPALEUIKAN

Biblia kijtoua: “Akin xnosentlalia imiuan oksekimej […] xkineki kikakis tlen kuajli kijliaj” (Proverbios 18:1, TNM). San toselti xuelis tikyektlaliskej se tlauejli, noneki yakaj matechpaleui.

Xkimijli moamigos niman mofamilia mamitspaleuikan.
Xkilnamiki ika tejua noijki uelis tikinpaleuis. Tla tikinpaleuiya oksekimej, mitspaleuis xkita tlen tikixnamiktika san ken noneki.
Tla tiknemilia ika xkeman kuajli tinemis niman ika más kuajli yeskia tla xok tinemiskia, kuajli xkita tla nonekis tias kampa tlapajtijketl. Kemantika, miyekej ijkon nomachiliaj pampa kipiyaj se kokolistli tlen itoka depresión. Miyekej akin kipiyaj yejon kokolistli, más kuajli opeuj nomachiliaj pampa okiselijkej se tratamiento.a

a Revista ¡Xtlachiakan! xkijtoua tlen tratamiento noneki tikselis.

Biblia kijtoua ika ajsis se tonajli ijkuak kualtsin tinemiskej

Se akin okijkuilo salmo okijli toTajtsin: “Motlajtoltsin yejua tlauijli yejuan nechyekana niman nechtlauiluiya ipan noojui” (Salmo 119:105). ¿Tlenon kijtosneki yejuin?

Ijkuak tlayouatijkak se lámpara techpaleuiya matikitakan kanon toncholoskej. Noijki ijkon, Biblia techpaleuiya matikmatikan tlenon uelis tikchiuaskej ijkuak noneki itlaj tiktlapejpeniskej.

Tlauijli techpaleuiya matikitakan tlenon onka tixpan. Noijki ijkon, Biblia techpaleuiya matikitakan tlen kualtsin tikseliskej ika tlayekapan.