¿Keskimej iteixpantijkauan Jehová tikimixmati? Sekimej kanaj chantij nisiu kampa tejua tichanti, noso kanaj imiuan titekiti noso imiuan tiauj ipan kaltlamachtijli; kanaj mouan yotonojnotskej itech Biblia. ¿Akinomej tiiteixpantijkauan Jehová, niman tleka tikinnojnotsaj oksekimej itech tlen tikneltokaj?

Noijki san titlaltikpakchanejkej ken oksekimej. Tiualeuaj miyekan niman tlamantik noso sejneka ken otoskaltijkej. Sekimej otinenkej ipan okse tlaneltokijli niman oksekimej xtikneltokayaj toTajtsin. San ika, ijkuak ok xtochiuayaj iteixpantijkauan Jehová, tinochimej otomachtijkej ika yolik tlen kijtoua Biblia (Hechos 17:11). Otikselijkej tlen otikasikamatkej niman sakin otiktlapejpenijkej tikueyichiuaskej toTajtsin Jehová.

Techpaleuiya tlen tomachtiaj itech Biblia. Ijkon ken miyekej ipan nochi tlaltikpaktli, tikpiyaj ajmantli niman okseki tlemach. San ika, pampa nochipa tikyejyekouaj tikchiuaskej tlen kijtoua Biblia, yotechpaleui matikyektlalikan tonemilis (Salmo 128:1, 2). Yejon san se tlen kichiua matitenojnotsakan itech tlemach tlen kualtsin yotikasikamatkej ipan Biblia.

Tinemij ken toTajtsin kuelita. ToTajtsin techmachtia ipan Biblia ken kuelita matinemikan. Yejuin kichiua ika kuajli matomachilikan, matikintlakaitakan oksekimej, matitekitikan ken kinamiki niman matitetlasojtlakan. Techpaleuiya matichikaujtokan niman matitlapaleuikan kampa tichantij. Noijki techpaleuiya ika matinemikan san sekan iuan tochanejkauan niman matikpiyakan tonemilis chipauak. Kuajli tikmatstokej ika “Dios xkichikoita se tlakatl iuan okse”. Ika yejon, yemelak tikinpiyaj tokniuan ipan nochi tlaltikpaktli, xtochikoitaj niman xtechxeloua política. Maski noijki san titlaltikpakchanejkej ken oksekimej, tinemij ken san se kalpan (Hechos 4:13; 10:34, 35).

• ¿Tlenon kichiua ika xtisejnekamej noso xtitlamantikej itech oksekimej?

• ¿Tlenon kuajli yokichiuj Biblia matikchiuakan ipan tonemilis?

Miyekej kinemiliaj ika iteixpantijkauan Jehová se tlaneltokijli tlen kemach opeuj. Kipiya ipantsin dos mil setecientos xiuitl, toTajtsin akin melauak okinpix itekipanojkauan akin okintokayoti “nennoteixpantijkauan” (Isaías 43:10-12). Techixmatiyaj ken Nomachtijkej itech Biblia niman ipan 1931 ototokayotijkej iteixpantijkauan Jehová, ¿tleka ijkon ototokayotijkej?

Pampa tikchiuaj makimatikan akinon toTajtsin. Itech tlen onoijkuilo yeuejkaui, itokayo toTajtsin, Jehová, miyekpa uajnestiaya ipan Biblia. Ipan miyek Biblias, itokayo toTajtsin yokipatlakej niman san kitokayotiaj toTeko noso toTajtsin. San ika, toTajtsin okijli Moisés ika yejua itoka Jehová, niman sakin okijli: “Yejuin nochipa yes notoka” (Éxodo 3:15). Ijkon yejua onoteixmachilti itech nochi tajtsitsintin akin xmelajkej. Tejuamej melak techyolpaktia pampa techixmatij ika itokayo toTajtsin.

Pampa tikchiuaj makimatikan tlenon totekiyo. Ijkon ken yolmelaujki Abel akin kachtopa onen, noijki ouajnentiajkej oksekimej akin okiteititijkej intlaneltokil itech Jehová. Ken Noé, Abrahán, Sara, Moisés niman David, akin melak youejkauj ika onenkej. Biblia noijki kintokayotia ken akin “sanoyej miyek tlakatl okipanextij [noso oteititijkej]” ika otlaneltokakej (Hebreos 11:4–12:1). Ijkon ken ijkuak yakaj tlajtoua ipampa se tlakatl akin xkipiya tlajtlakojli niman kinekij kitsakuaskej, tejuamej noijki ipampa titlajtouaj toTajtsin niman tikteijliaj tlen melauak.

Pampa tikchiuaj ken Jesús. Biblia kitokayotia Jesús “itestigo Dios yejuan nochipa kuajli kichiua itekiu. Yejua kijtoua on tlen melauak” (Apocalipsis [Revelación] 3:14). Jesús okijto ika okiteijliko itokayo toTajtsin niman itech tlen melauak (Juan 17:26, NM; 18:37). Ika yejon, akin kichiuaj ken Cristo noneki kimixmatiskej ken iteixpantijkauan Jehová niman kiteijliskej itokayo. Yejon tlen iteixpantijkauan Jehová tochikauaj tikchiuaj.

• ¿Tleka Nomachtijkej itech Biblia onotokayotijkej iteixpantijkauan Jehová?

• ¿Kech youejkauj ika kinpiya Jehová akin kiteixpantiliaj ipan tlaltikpaktli?

• ¿Akinon kitokayotiaj melak ueyi iteixpantijkauj Jehová?

Biblia okijto ika ijkuak mikiskia Cristo, intech akin kichiuaskiaj ken yejua, nemiskiaj akin temachtiskiaj tlen xmelauak niman kijtlakoskiaj tlen melauak kijtoua Biblia (Hechos 20:29, 30). Niman ijkon opanok, yejuin tlamachtijkej okinelojkej tlen kineltokayaj tlaltikpakchanejkej iuan tlen otemachti Jesús. Okichiujkej ika san manesi ika kichiuaj ken Cristo maski xmelak (2 Timoteo 4:3, 4). ¿Kenon tikmatij ika yemelak tikasikamatij tlen melauak temachtia Biblia?

Oyejkok tonajli ijkuak Jehová oteasikamachilti tlen melauak. ToTajtsin okijto ika ijkuak sa itlamiyan tonaltin “tlen melauak tlaixmatilistli melak [miyekiyaskia]” (Daniel 12:4). Ipan 1870, se grupo akin achijtsitsintin katkaj kitejtemouayaj tlen melauak itech Biblia niman okinextijkej miyek tlen temachtiayaj ipan teopantin xonkatka ipan Biblia. Kuakon, opeujkej kitejtemouaj kasikamatiskej tlen melauak temachtia Biblia, niman Jehová okinpaleui makasikamatikan iTlajtol.

Yolmelaujkej tlakamej kuajli onomachtijkej Biblia. Yejuin Nomachtijkej itech Biblia, iteixpantijkauan Jehová, opeujkej melak nomachtiaj Biblia. Okichiujkej ijkon ken tomachtiaj aman: kachtopa noita se tlamachtijli niman sakin okse. Ijkuak itlaj ipan Biblia xkasikamatiyaj, kitejtemouayaj oksekan ipan Biblia tlenon kijtosneki. Niman ijkuak ontlamiyaj, tla kitayaj ika ijkon tlamachtia ipan nochi Biblia, kijkuilouayaj. Pampa kikauiliayaj Biblia makijto tlenon kijtosneki, okasikamatkej tlen melauak itech itokayo toTajtsin niman iTekiuajyo, tlen kineki kichiuas ipampa tlaltikpakchanejkej niman ipan tlaltikpaktli, kenon nemij akin yomijkej niman ika uelis oksejpa yoliuiskej. Tlen okinextijkej ipan Biblia okimixtlapo itech tlemach tlen xmelauak niman tlen xkuajli nochiuaya (Juan 8:31, 32).

Ipan 1879 Nomachtijkej itech Biblia okasikamatkej ika yoyejkoka tonajli ijkuak noteijliskia tlen melauak nochiuiyan. Ipan yejon xiuitl, opeuj nochijchiua se revista tlen ok noxeloua: Amatl Tekakistilijketl. Kiteijlitika iTekiuajyo Jehová. Aman, tlen melauak itech Biblia tikteijlitokej ipan doscientos cuarenta países niman kanaj ipan setecientos cincuenta tlajtoltin. ¡Xkeman ijkon noteijliaya tlen melauak itech Biblia!

• ¿Tlenon opanok itech tlen melauak temachtia Biblia ijkuak omik Jesucristo?

• ¿Kenon ouel oksejpa onasikamat tlen melauak itech iTlajtol toTajtsin?

Iteixpantijkauan Jehová ouejkauj tikintekitiltiaj, tikimixkopinaj niman tikintemakaj Biblias tlen oksekimej okitlajtolkuepkej. Sakin, otikitakej ika nonekiya tiktlajtolkuepaskej se yenkuik Biblia tlen ueliskia melak kuajli kinpaleuiskia tlaltikpakchanejkej “ma kimati[kan] on tlen melauak”, niman ijkon makimatikan tlenon kineki toTajtsin ipampa nochimej tlaltikpakchanejkej (1 Timoteo 2:3, 4). Ika yejon, ipan 1950 opeuj tikchijchiuaj san seki itech Biblia ika inglés Traducción del Nuevo Mundo ken aman titlajtouaj. Yejuin Biblia kuajli yotiktlajtolkuepkej ijkon ken yemelak tlajtoua kanaj ipantsin ciento treinta tlajtoltin.

Nonekiya se Biblia tlen ueliskia manasikamati. Ijkon ken panotiuej tonaltin noijki nopatla ken titlajtouaj, niman miyekej Biblias kipiyaj tlajtoltin tlen xok nasikamati. Noijki, aman yononextijkej sekimej amatlajkuiloltin tlen melak youejkauj onoijkuilojkej niman nonisiuiya itech tlen kachtopa onoijkuilojka ipan iTlajtol toTajtsin. Yejuin kichiua ika manajsikamati tlen onoijkuilo ipan Biblia ika hebreo, arameo niman griego.

Nonekiya se Biblia tlen makijto tlen melauak temachtia iTlajtol toTajtsin. Akin kitlajtolkuepaskej Biblia xkipiya kitlaliskej san tlen kinekiskej itech tlen kijtoua Biblia, noneki notlalis ijkon ken kijtoua ijkuak kachtopa onoijkuilo. San ika, ipan miyek Biblias xkitlaliaj itokayo toTajtsin, Jehová.

Nonekiya se Biblia tlen makiueyichiua akin okichijchiuj (2 Samuel 23:2). Ipan Traducción del Nuevo Mundo, itokayo Jehová oksejpa okitlalijkej kanaj ipan siete mil kampa uajnestiaya ipan amatlajkuiloltin tlen melak youejkauj ika onoijkuilojkej, ijkon ken uelis tikitas tlatsintlan (Salmo 83:18). Opanok melak miyek xiuitl ika onotejtemo tlen yemelak kijtoua Biblia. Kuakon, yejuin Biblia melak tikuelitas tikpouas pampa melak kuajli tikasikamatis tlenon kinemilia toTajtsin. Tla tikpiya Traducción del Nuevo Mundo ika motlajtol noso ka, timitstlajtlaniliaj xpoua mojmostla iTlajtol Jehová (Josué 1:8; Salmo 1:2, 3).

• ¿Tleka nonekiya manotlajtolkuepa okse yenkuik Biblia?

• ¿Tlenon noneki makichiua mojmostla akin kinekis kixmatis tlen kineki toTajtsin?