¿Kenon uelis tinemis ika pakilistli iuan mochanejkauan?

1. ¿Tleka noneki xmonamikti ken kinamiki niman ijkon tinemis ika pakilistli?

Biblia kipiya “kualtsin tlajtoltin tlen ualeuaj itech toTajtsin akin paktika” (1 Timoteo 1:11, NM). Jehová akin paktika, yejua kineki machantilo ika paktli. Yejua akin kachtopa otlanamikti. Tla se kineki kuajli chantis, noneki manonamikti ixpan tekiuajkej. Ijkon uelis kuajli noskaltiskej ikoneuan. Akin kichiuaj ken Cristo noneki kitlakamatiskej tlanauatiltin itech kenon nonamiktiaj kampa chantij . Xkita Lucas 2:1, 4, 5.

¿Kenon kita toTajtsin ijkuak sekimej nonamiktiaj? Yejua kineki nochipa san sekan manemikan se tlakatl iuan se siuatl. Jehová kineki ika akin yononamiktijkej maka manokajkayauakan (Hebreos 13:4). Yejua kitlauelita ijkuak nokauaj akin yononamiktijkej (Malaquías 2:16). Kema, Jehová kikauilia se matekaua niman oksejpa manonamikti, san ijkuak ixnamik noteka iuan okse. Xkita Mateo 19:3-6, 9.

2. ¿Kenon noneki nouikaskej akin yononamiktijkej?

Jehová okichijchiuj tlakatl iuan siuatl niman ijkon manopaleuikan omemej (Génesis 2:18). Pampa teueuentsin yejua tlayekana itech ichanejkauan, noneki kitas kenon kinmakas tlen kinpoloua niman kinmachtis itech toTajtsin. Noijki noneki kiteititis ika kitlasojtla isiuauj ijkuak xkichiuas tlen yejua kinekiskia. Akin yononamiktijkej kipiya ika notlasojtlaskej niman notlakaitaskej. Pampa nochimej tlajtlakolejkej, noneki notlapopoluiskej akin yononamiktijkej tla kinekij ika inyojlo nemiskej. Xkita Efesios 4:31, 32; 5:22-25, 33, niman 1 Pedro 3:7.

3. ¿Kipiya ika timoxelos tla xtinemi ika moyojlo?

Tla xkuajli nemouikaj, tejua iuan moixnamik noneki nenkinyektlaliskej nemotlaueluan, nemochikauaskej niman ijkon nenkiteititiskej ika nemotlasojtlaj (1 Corintios 13:4, 5). ToTajtsin iTlajtol xkijtoua xmoxelo ijkuak tikpiyas tlauejli. Xkita 1 Corintios 7:10-13.

4. Kokonej, ¿tlenon kineki toTajtsin nemotech?

Jehová kineki xnemikan ika pakilistli. Yejua techijlia kenon kuajli titelpochnemiskej. Jehová kineki xkinkaki motajuan pampa yejuamej miyek tlemach youajpanokej niman uelis mitspaleuiskej (Colosenses 3:20). Jehová noijki kineki xyolpaki ijkuak tikchiuas tlen yejua kineki niman tlen kineki iKoneuj. Xkita Eclesiastés 11:9–12:1; Mateo 19:13-15 niman 21:15, 16.

5. Tajtin, ¿kenon uelis nemiskej ika pakilistli nemokoneuan?

Noneki titekitis chikauak niman tikinmakas mokoneuan tlen kikuaskej, intlaken niman kampa chantiskej (1 Timoteo 5:8). San ika, tlen kichiuas manemikan ika pakilistli, noneki tikinmachtis itech toTajtsin niman tikimititis kenon kitlasojtlaskej (Efesios 6:4).Tla tejua tikteititia ika tiktlasojtla toTajtsin, mokoneuan noijki ijkon kichiuaskej. Tla tlen tikimijlia ualeua itech iTlajtol toTajtsin, tikinpaleuis kuajli matlanemilikan. Xkita Deuteronomio 6:4-7 niman Proverbios 22:6.

Uelis tikinpaleuis mokoneuan ijkuak tikinyolchikauas. Noijki noneki tikinmelajkatlalis. Xkintlajpiya itech tlen uelis kimijtlakos pampa yejon san kichiuas maka kuajli manemikan (Proverbios 22:15). San ika, ijkuak tikinmelajkatlalis xkipiya ika melak tikintlajyouiltis. Xkita Colosenses 3:21.

Miyek amoxtin tlen kichijchiuaj iteixpantijkauan Jehová, kinpaleuiya tajtin niman inkoneuan. Tlen ompa ijkuiliujtok ualeua ipan Biblia. Xkita Salmo 19:7, 11.