TLAMACHTIJLI 38
Matikpatiojkaitakan tonemilis
San xkonnemili nochi tlen ueli tikchiuaj pampa tiyoltokej. Nochi yejon melak techyolpaktia. Niman maski kemantika tikixnamikij tlen xkuajli, ok ueli tiyolpakij. ¿Kenijki uelis tikititiskej Jehová ika tiktlasojkamatij pampa yotechtlayokoli tonemilis? ¿Niman tleka melak noneki ijkon matikchiuakan?
1. ¿Tleka noneki tikpatiojkaitaskej tonemilis?
Noneki tikpatiojkaitaskej tonemilis pampa Jehová yejua akin otechtlayokoli. Itech Jehová “kisa nochi nemilistli”, kema, yejua akin okichijchiuj nochi tlen yoltika (Salmo 36:9). Jehová tinochimej techmaka “tijyo, tonemilis, niman nochi tlajtlamach” (Hechos 17:25, 28). Kuakon, Jehová yejua akin techmaka nochi tlen noneki niman ijkon matiyoltokan. San ika, xsan yejon, yejua noijki kichiua matiyolpakikan (xkita Hechos 14:17).
2. ¿Kenijki uelis tikititiskej Jehová ika tiktlasojkamatij pampa otechtlayokoli tonemilis?
Jehová melak kuajli mitsixmatstika desde ijkuak tinemiya ijtik monan. Se itekipanojkauj Jehová, akin itoka katka David, okijto: “Tejua kuajli otikitak ken opeu nochijtiu notlalnakayo” (Salmo 139:16). Tonemilis melak ueyi kijtosneki ixpan Jehová (xkita Mateo 10:29-31). San xkonnemili kenijki melak noyolkokoua ijkuak yakaj temiktia noso ijkuak yakaj nomiktia (Éxodo 20:13).a Yejua noijki melak noyolkokoskia tla xtotlajpiyaj noso tikchiuaj itlaj tlen ueliskia kichiuas topan manochiua tlen xkuajli noso inpan manochiua tlen xkuajli oksekimej. Ijkuak totlajpiyaj niman tikintlajpiyaj oksekimej, tikteititiaj ika tikpatiojkaitaj nemilistli.
OKSEKI XKASIKAMATI
Matikitakan kenijki uelis tikteititiskej ika tikpatiojkaitaj tonemilis niman innemilis oksekimej.
3. Xmotlajpiya niman ijkon maka tikualos
Akin yonosentemakakej itech Jehová kitlajpiyaj innemilis pampa yokijlikej Jehová ika nochipa kichiuaskej tlen yejua kineki. Yejuamej kitaj intlalnakayo kentla se uentli tlen kimakaj Jehová. Xkitakan Romanos 12:1, 2 niman xtlajtokan itech yejuin:
¿Tleka noneki timotlajpiyas niman ijkon xtikualos?
¿Kenijki uelis timotlajpiyas niman ijkon xtikualos?
4. Xmotlajpiya niman xkintlajpiya oksekimej
Biblia techijlia ika noneki totlajpiyaskej niman ijkon maka tikchiuaskej itlaj tlen uelis kichiuas topan manochiua tlen xkuajli noso inpan manochiua tlen xkuajli oksekimej. Xkitakan VIDEO. Ompa nenkitaskej tlenon uelis tikchiuaskej niman ijkon totlajpiyaskej niman tikintlajpiyaskej oksekimej.
Xkitakan Proverbios 22:3 niman ijkon nenkimatiskej kenijki uelis notlajpiyas yakaj...
... ijkuak nemis ichan.
... ijkuak nemis ipan itekiyo.
... ijkuak kichiuas ejercicio.
... ijkuak kuikas noso yas ipan se carro.
5. Xpatiojkaita inemilis konetsintli akin xiuajtlakati
David okijto ika Jehová kita ijkuak itlalnakayo se konetsintli peua nochijchiua ijtik inan. Xkitakan Salmo 139:13-15, 17 niman xtlajtokan itech yejuin:
Para Jehová, ¿kemanon peua inemilis se konetsintli: ijkuak uajnemi, noso ijkuak peua nochijchiua ijtik inan?
Tlanauatiltin tlen Jehová okinmakaka israelitas kintlajpiaya siuamej akin koneuajkej noso piluajkej katkaj niman noijki on konetsitsintin akin nemiyaj ijtik innan. Xkitakan Éxodo 21:22, 23 (TNM), niman xtlajtokan itech yejuin:
¿Kenijki nomachiliaya Jehová ijkuak yakaj kimiktiaya se konetsintli akin nemiya ijtik inan maski tla akin otemikti xkinekiya ijkon kichiuas?
Kuakon, ¿kenijki nomachilia Jehová ijkuak kita ika yakaj kimiktia se konetsintli pampa melauak ijkon kinekiya kichiuas?b
¿Tlenon tiknemilia itech ken Jehová kita tonemilis?
Maski se siuatl kipatiojkaita nemilistli, kanaj ueliskia kinemilis ika más kuajli tla kitlajkali ikoneuj. Xkitakan Isaías 41:10 niman xtlajtokan itech yejuin:
Tla se siuatl kichiualtiaj makitlajkali ikoneuj, ¿akinon noneki kitlajtlanilis makipaleui niman ijkon uelis kichiuas tlen kuajli? ¿Niman tleka?
SEKIMEJ KIJTOUAJ: “Se siuatl uelis kitlapejpenis tla kitlajkalis ikoneuj noso kiskaltis”.
¿Tlenon mitsititia ika Jehová kipatiojkaita inemilis se siuatl akin koneua niman noijki inemilis on konetsintli akin ijtik nemi?
TLEN OTIUEL
Jehová yotechtlayokoli tonemilis, niman Biblia techijlia ika noneki tikpatiojkaitaskej. Yejuin techititia ika noneki totlajpiyaskej niman tikintlajpiyaskej oksekimej.
¿Kenon titlanankiliskia?
¿Tlenon techititia ika Jehová kipatiojkaita tonemilis?
¿Kenijki nomachilia Jehová ijkuak yakaj nomiktia noso temiktia?
¿Tlenon ueli tikchiuaj pampa Jehová yotechmakak tonemilis?
OKSEKI XKITA
¿Kenijki uelis tikititiskej Jehová ika tiktlasojkaitaj tonemilis?
Nemilistli se kualtsin tetlayokolijli (tlakuikajli 141) (2:41)
Tla yeuejkaui se siuatl okitlajkal ikoneuj, ¿uelis kitlapopoluis toTajtsin? Xkita tlen kijtoua Biblia.
“¿Tlenon kijtoua Biblia itech akin kitlajkali ikoneuj?” (Tlamachtijli de jw.org)
Xkita tlenon xtiknekiskej ika toyolpaktiskej tla tikasikamatij ika toTajtsin kipatiojkaita tonemilis.
“¿Kuajli tla tauiltiaj kampa uelis tokokoskej?” (¡Xtlachiakan!, 8 de octubre de 2000)
¿Uelis kipaleuis Biblia akin kineki nomiktis?
a Jehová kineki kinpaleuis akin sajnoye noyolkokouaj (Salmo 34:18). Yejua kasikamati kenijki nomachiliaj akin kinekij nomiktiskej niman kineki kinpaleuis. Uelis tikitas tlamachtijli “¿Uelis nechpaleuis Biblia tla xok nikneki ninemis niman yoniknemili ninomiktis?”, yejuin tlamachtijli uajlauj ipan sección “Okseki xkita”.
b Akin yeuejkaui okitlajkal ikoneuj xnoneki nochipa notlajtlakoltijtos, Jehová kinektika kitlapopoluis. Uelis tikitas tlamachtijli “¿Tlenon kijtoua Biblia itech akin kitlajkali ikoneuj?”, yejuin tlamachtijli uajlauj ipan sección “Okseki xkita”.