TLAMACHTIJLI 25
¿Kenijki kineki toTajtsin matinemikan?
Biblia kijtoua ika tejuamej xmiyek tonaltin tinemij niman ika melak titlajyouiyaj (Job 14:1). San ika ¿ijkin kinekiya toTajtsin matinemikan? Tla xijkin kinekiya, kuakon, ¿kenijki kinekiya matinemikan? ¿Ajsis se tonajli ijkuak tinemiskej ijkon ken yejua kinekiya? Xkita tlen Biblia kijtoua itech nochi yejuin.
1. ¿Kenijki kineki toTajtsin matinemikan?
Jehová kineki kuajli matinemikan. Ijkuak toTajtsin okichijchiuj kachtopa tlakatl niman kachtopa siuatl, Adán iuan Eva, okintlali kampa melak tlakualtsinkan. Ompa itoka katka jardín de Edén. Niman Jehová okinteochiuj niman ijkin okimijli: “Xkimpiyakan miyekej nemokoneuan. Xtemiltikan in tlaltikpaktli” (Génesis 1:28). Jehová kinekiya ika Adán iuan Eva makinpiyakan inkoneuan, makikualtsintilikan yejuin tlaltikpaktli niman makintlajpiyakan yolkamej. Yejua kinekiya maka yakaj makualo niman maka yakaj mamiki.
Maski aman xijkon tinemij,a ajsis se tonajli ijkuak tinemiskej ijkon ken toTajtsin kinekiya (Isaías 46:10, 11). Yejua xnopatla, ok kineki ika nochimej akin kitlakamatij nochipa manemikan ipan se kualtsin tlaltikpaktli (xkita Apocalipsis 21:3, 4).
2. ¿Tlenon techpaleuis nochipa matiyolpakikan?
Jehová otexchijchiuj niman ijkon matiuelikan matijkakikan iTlajtol niman matiktlakamatikan. Yejua ijkon otexchijchiuj pampa kineki matikixmatikan niman matikueyichiuakan (xkita Lucas 11:28). ToTajtsin kineki kuajli iuan matouikakan, matiktlakamatikan, matiktlasojtlakan niman matiktekichiuilikan ika nochi toyojlo (Deuteronomio 10:12; Salmo 25:14). Tla tikchiuaj nochi yejuin, nochipa tiyolpakiskej maski kemantika topan nochiuas tlen xkuajli. Ijkuak tikueyichiuaj toTajtsin, melak tiyolpakij pampa tikmatstokej ika tikchiujtokej tlen yejua kuelita.
OKSEKI XKASIKAMATI
ToTajtsin melak kualtsin ken okichijchiuj yejuin tlaltikpaktli pampa melak techtlasojtla. Matikitakan tleka ijkon tikijtouaj niman matikasikamatikan tleka otexchijchiuj.
3. Jehová kineki matiyolpakikan
Xkitakan VIDEO niman xtlajtokan itech yejuin:
¿Tleka toTajtsin melak kualtsin okichijchiuj tlaltikpaktli?
Xkitakan Eclesiastés 3:11 niman xtlajtokan itech yejuin:
¿Tlenon techititia yejuin texto itech Jehová?
4. Jehová ok kineki matinemikan ken kachtopa kinekiya
Xkitakan Salmo 37:11, 29 niman Isaías 55:11 (TNM), niman xtlajtokan itech yejuin:
¿Tleka tikmatstokej ika Jehová ok kineki matinemikan ken kachtopa kinekiya?
Se kajli tlen melak yoijtlakauj oksejpa uelis noyektlalis. Yejuin tlaltikpaktli noijki melak yoijtlakauj, san ika, toTajtsin kiyektlalis niman kinmakas ikoneuan akin kitlasojtlaj.
5. Tinemiskej ika toyojlo tla tikueyichiuaj Jehová
Ijkuak tikmatij kenijki kineki Jehová matinemikan, melak tiyolpakij. Xkitakan VIDEO niman xtlajtokan itech yejuin:
¿Tlenon opanok ijkuak Terumi okasikamat tleka otexchijchiuj toTajtsin?
Xkitakan Eclesiastés 12:13 niman xtlajtokan itech yejuin:
¿Kenijki uelis tiktlasojkamachiliskej toTajtsin ipampa nochi tlen yokichiuj topampa?
SEKIMEJ UELISKIA KIJTOSKEJ: “¿Tleka otexchijchiuj toTajtsin?”.
¿Tejua tlenon tikijtoskia?
TLEN OTIUEL
Jehová kineki nochipa matiyolpakikan ipan se kualtsin tlaltikpaktli. Niman desde aman, uelis tiyolpakiskej tla tikueyichiuaj toTajtsin ika nochi toyojlo.
¿Kenon titlanankiliskia?
¿Kenijki kinekiya Jehová manemikan Adán iuan Eva?
¿Tleka tikmatstokej ika Jehová ok kineki matinemikan ken kachtopa kinekiya?
¿Tlenon noneki tikchiuas niman ijkon tiyolpakis?
OKSEKI XKITA
Xkita tleka uelis tikneltokaskej ika melauak onkatka jardín de Edén.
“¿Melauak onkatka jardín de Edén?” (Amatl Tekakistilijketl, 1 de enero de 2011)
Xkita tleka kuajli tikmatstokej ika tlaltikpaktli xkeman popoliuis.
Biblia kijtoua tleka otexchijchiuj toTajtsin. Xkita tlenon kijtoua.
Se tlakatl kinemiliaya ika xitlaj kipolouaya, san ika, xkita tlenon kipolouaya niman ijkon yolpakis.
a Ipan okse tlamachtijli tikitaskej tleka xtinemij ijkon ken toTajtsin kinekiya.