¿Tleka noneki matikueyiteneuakan Jehová?

1-3. a) ¿Kemanon nesi onoijkuilo Salmo 147? b) ¿Tlenon uelis tomachtiskej itech Salmo 147?

IJKUAK yakaj kichiua se melak kuajli tekitl noso kiteititia se kualtsin kualneskayotl, kinamiki kuajli matlajtokan itech. Tla yejuin ijkon panoua iuan tlaltikpakchanejkej, kuakon ok melak kinamiki matikueyiteneuakan toTajtsin Jehová. Tejuamej uelis tikueyiteneuaskej ipampa ueyi ikojtilis, tlen nesi itech tlen kualtsin okichijchiuj, noso pampa teititia ika kintlasojtla tlaltikpakchanejkej, ken ijkuak okitemakak iKoneuj ken tlaxtlauijli.

² Tlajkuilojketl itech Salmo 147 melak kinekiya kiueyiteneuas Jehová. Niman noijki okinyolchikauj ika oksekimej makiueyiteneuakan toTajtsin iuan yejua (xpoua Salmo 147:1, 7, 12).a

³ Xtikmatij akinon okijkuilo yejuin Salmo, san ika, akin okijkuilo nesi ika onen ijkuak Jehová okinkixti israelitas itech Babilonia niman oksejpa okinuajuikak Jerusalén (Sal. 147:2). Pampa ikalpan toTajtsin oksejpa kiueyichiuaskiaj kampa kinamiki, okichiuj ika salmista makineki kiueyiteneuas Jehová. Maski ijkon, onkatka okse tlen ika okinek kichiuas. ¿Katlejua katka? ¿Tleka tejuamej noneki tikueyiteneuaskej Jehová ipan tonemilis? (Sal. 147:1; 104:35, nota).

JEHOVÁ KINPAJTIA AKIN NOYOLAJMANAJ

4. Ijkuak tekiuaj Ciro okinmakixti israelitas, ¿kanaj kenon onomachilijkej niman tleka?

⁴ San matikonnemilikan kenon onomachilijkej israelitas ijkuak nemiyaj Babilonia. Babilonios kinpinaujtiayaj: “Xtechkuikatlalilikan se itech itlakuikaluan Sión”. Yejuamej xkinekiyaj nouikatiskej pampa Jerusalén, tlen melak kinyolpaktiaya, yokipopolojkaj (Sal. 137:1-3, 6). Yejuamej noyolajmanayaj niman kinekiyaj makinyolseuikan. San ika, toTajtsin yokijtoka ika Ciro, tekiuaj itech Persia, kinmakixtiskia itech Babilonia. Kuakon yejua okinotlatkiti Babilonia niman okijto: “Jehová toTajtsin iluikakchane yonechinmakak nochi tekiuajyomej itech tlaltikpaktli niman yonechnauati manikchijchiuili se kajli ipan Jerusalén, tlen onka ipan Judá. Nochimej akin nemij nemotsajlan itech nochi ikalpan, manemi Jehová inTajtsin inuan, niman matlejkokan” (2 Crón. 36:23). Yejuin melak okinyolseui israelitas ijkuak ok chantiyaj ipan Babilonia.

5. ¿Tlenon okitak salmista itech ken Jehová kitekitiltia ikojtilis?

⁵ Jehová xsan okiyolseui san sekan nochi ikalpan, noijki okinyolseui inseselti. Noijki ijkon panoua ipan yejuin tonajli. Salmista okijkuilo itech toTajtsin: “Yejua kinpajtia akin noyolajmanaj; yejua kinpajtilia kampa onokokojkej” (Sal. 147:3). Kema, Jehová kinpaleuiya akin xkuajli nomachiliaj: akin kualoj noso noyolkokouaj. Ipan yejuin tonajli, Jehová kinektika techyolseuis niman kipopolos tlen techyolkokoua (Sal. 34:18; Is. 57:15). Yejua techmaka tlamachilistli niman chikaualistli tlen ika uelis tikixnamikiskej san katlejua tlatlatalistli (Sant. 1:5).

6. ¿Tlenon uelis tomachtiskej itech tlen kijtoua Salmo 147:4? (Xkita tlaixkopinajli kampa peua tlen tomachtijtokej).

⁶ Aman salmista ontlachia ipan iluikak niman kijtoua ika Jehová “kinpoua kech ika miyekej sitlalimej” niman “kinnotsa nochimej ika intoka” (Sal. 147:4). ¿Tleka salmista opeuj tlajtoua itech sitlalimej? Matitlanemilikan itech yejuin: salmista ueliya kimitaya sitlalimej ika ixtololojuan, san ika, nion achijtsin xkimatiya kech ika miyekej katka. Ipan yejuin tonajli, melak miyek sitlalimej tlen uelij noitaj. Ixtlamatkej kijtouaj ika onka miyek millones sitlalimej ipan iluikak. Tejuamej xkeman uelis tikinpouaskej kech ika miyekej sitlalimej. San ika, toTajtsin keman ueli kichiua niman kintlalilia intokayo. Yejuin kijtosneki ika Jehová kimita inseselti (1 Cor. 15:41). ¿Tlenon techmachtia yejuin? Ijkon ken kimati nochi itech sitlalimej, toTajtsin noijki kimati kanon tinemij, kenon tomachiliaj niman tlenon techpoloua mojmostla.

7, 8. a) Ijkuak Jehová kinmakixtia itekipanojkauan, ¿tlenon kasikamati intechkopa? b) Xkijto se neskayotl kenon Jehová techasikamati.

⁷ ToTajtsin Jehová xsan najmana totechkopa, noijki techasikamati niman kipiya kojtilistli tlen ika techpaleuis itech tlen tikixnamikij (xpoua Salmo 147:5).b Kemantika uelis tomachiliskej ika melak ouijtika tlen tikixnamiktokej niman ika xok tiuelij tiaskej ika tlayekapan. San ika, toTajtsin kasikamati tlen xtiuelij tikchiuaj niman “kilnamiki ika titlachijchiujtin ika tlalpoktli” (Sal. 103:14). Pampa titlajtlakolejkej, uelis topopoloskej miyekpa ika itlaj. Tikmatij ika tinochimej toyolkuepaj itech itlaj tlen otikijtokej, itech se xkuajli ileuilistli tlen tikpiyaj kemantika noso ijkuak tikileuiyaj tlen oksekimej kipiyaj. Maski Jehová xijkon ipan nochiua ken tejuamej, yejua kuajli techasikamati (Is. 40:28).

⁸ Kanaj kemantika yotikitakej kenon Jehová yotechpaleui ika ikojtilis matikixnamikikan se tlatlatalistli (Is. 41:10, 13). Matikitakan tlen ipan onochiuj se tokniuj precursora itoka Kyoko. Yejua melak onajman ijkuak oyaj oksekan otlapaleuito. ¿Kenon okititi Jehová ika kasikamatiya tlen kixnamiktoya? Kampa yenkuik oajsik, tokniuj okitak ika nemiyaj akin kasikamatiyaj tlen ipan panotoya. Yejua okimachili kentla Jehová kijliskia: “Nejua nimitstlasojtla, xsan pampa titekiti ken precursora, pampa tejua tinokoneuj niman yotimosentemakak notech. Nikneki ika tejua xyolpaki ipan monemilis ken noteixpantijkauj”. Aman, ipan monemilis, ¿kenon Jehová akin nochi ueli kichiua yomitsititi ika “iasikamatilis xuelis notemachiuas”?

JEHOVÁ TECHMAKA TLEN TECHPOLOUA

9, 10. ¿Kenon melak ueyi techpaleuiya Jehová?

⁹ Kanaj kemantika techpoloua tlen ika topanoltiaj. Se neskayotl, kanaj tejua uelis timajmanas tla xtikpiya tlen tijkuas. San ika, Jehová okichijchiuj ika tlaltikpaktli makitemaka tlakuajli niman ijkon nochimej makipiyakan tlen kikuaskej, hasta “kuechtikej kakalomej akin tsajtsij pampa apismikij” (xpoua Salmo 147:8, 9).c Tla yejua kintlakualtia hasta kakalomej, uelis tikmatstos ika Jehová noijki techmakas tlen techpoloua (Sal. 37:25).

¹⁰ San ika, Jehová techmaka tlen melak noneki, tlapaleuilistli tlen kichikaua totlaneltokil ijkuak techmaka “yolseuilistli on yejuan más ueyi de nochi kech se tlakatl uelis kajsikamatis” (Filip. 4:6, 7). Xtlanemili itech yejuin neskayotl. Se tokniuj itoka Mutsuo niman isiuauj, okitakej kenon ikojtilis Jehová okinpaleui ijkuak ipan 2011 opanok se tsunami ipan Japón. Yejuamej ouel omakiskej pampa otlejkokej ikuatipan inkal, maski ijkon, okipolojkej nochi tlen kipiayaj. Yejon yeuajli, onokaujkej ipan se cuarto ika ome piso kampa melak seua katka niman yoxoxotonka. Ika kualkan, okitejtemojkej tlenon ika kichikauaskiaj intlaneltokil. San se amoxtli okinextijkej, katka Anuario de los testigos de Jehová 2006. Mutsuo nimantsin okixtilan kampa kijtouaya “Los tsunamis más mortíferos de la historia”. Yejuin tlajtouaya itech se chikauak tlalolinalistli tlen opanok ipan xiuitl 2004 ipan atlajkotian Sumatra, tlen okichiuj mapanokan tsunamis tlen melak otlaijtlakojkej hasta ken xkeman noitaya. Mutsuo niman isiuauj chokayaj ijkuak kipoujtiayaj nochi tlen ompa onochiuj. Yejuamej okimachilijkej ika toTajtsin kimititijtoya itlasojtlalis niman kinmakatoya yolchikaualistli ijkuak yemelak kinpolouaya. Jehová ika itlasojtlalis noijki okinmakak tlen kinpolouaya, ijkuak sekimej tokniuan okimitkilijkej tlakuajli niman tlakentli. San ika, tlen melak okinyolchikauj, opanok ijkuak okintlajpalotoj tokniuan akin tekitij ken Grupo akin tlayekana ipan se Sucursal. Mutsuo kijtoua: “Onikmachili ika Jehová nemiya touan niman techpaleuijtoya. Melak otechyolseui”. Ken tikitaj, ken melak techpaleuiya toTajtsin kichiua ijkuak techmaka tlen kichikaua totlaneltokil, san ika, noijki techmaka tlen techpoloua.

MATECHPALEUI IKOJTILIS TOTAJTSIN

11. ¿Tlenon noneki kichiuaskej akin kinekij makinpaleui ikojtilis toTajtsin?

¹¹ Jehová nochipa kinektika kinkuiteuas “akin yolyemankej” (Sal. 147:6a). San ika ¿tlenon tikchiuaskej niman ijkon tikseliskej itlapaleuilis? Noneki kuajli iuan touikaskej. Yejuin uelis panos tla tochiuaj tiyolyemankej (Sof. 2:3). Akin yolyemankej kichiaj ika Jehová makiyektlali tlen xkuajli nochiua niman makipopolo tlen kintlajyouiltia. Jehová kiselia tlen kichiuaj akin yolyemankej.

12, 13. a) ¿Tlenon noneki tiktlalkauiskej tla tiknekij tikseliskej itlapaleuilis toTajtsin? b) ¿Tlenon noneki tikchiuaskej niman ijkon tikyolpaktiskej Jehová?

¹² San ika, noijki toTajtsin “komintlajkali akin xkuakualtin ipan tlajli” (Sal. 147:6b). Yejuin tlajtoltin kakistij chikauak. Tla tiknekij tikseliskej itlasojtlalis Jehová tlen xtekaua niman maka makualani touan, noneki tiktlauelitaskej tlen kitlauelita (Sal. 97:10). Se neskayotl, noneki matiktlauelitakan auilnemilistli. Yejuin kijtosneki ika kipiya tiktlalkauiskej nochi tlen uelis kichiuas matiauilnemikan, ken tikmauisoskej kampa auilnemilo (Sal. 119:37; Mat. 5:28). Yejuin uelis melak ouijtika yes, san ika, tla tochikauaj tikpiyaskej itlateochiualis Jehová.

¹³ San titetlaniskej ipan yejuin tla tiktlajtlaniliaj itlapaleuilis Jehová. ¿Kuelitas tla tejuamej tikyejyekoskej topaleuiskej “ipan ikojtilis caballo”, kijtosneki, itech tlaltikpakchanejkej? Ka. Nion xkipiya ika titlaneltokaskej “itech ken chikaujkej ikxiuan se tlakatl”, tla tikchiuaskiaj yejuin kentla tikneltokaskiaj ika tejuamej noso se tlaltikpakchane uelis techmakixtis (Sal. 147:10). Tlen kema, noneki tiktlajtlaniliskej Jehová matechpaleui. Yejua xijkon ken tlaltikpakchanejkej, pampa yejua xkeman siaui ika techkakis ijkuak tiktlatlaujtiaj maski miyekpa tikchiuaj. “Jehová yolpaki intech akin kimojkaitaj, akin tlamachiaj itech itlasojtlalis tlen xtekaua” (Sal. 147:11). Uelis titlaneltokaskej itech itlasojtlalis tlen xtekaua, ika yejua touan nemis niman techpaleuis maka matechyekana xkuajli ileuilistli.

14. ¿Tlenon melak kiyolchikauaya salmista?

¹⁴ Jehová techmaka tlen kichiua kuajli matikmatstokan ika yejua nochipa techpaleuis ijkuak nonekis. Ijkuak salmista opeuj tlanemilia itech kenon israelitas onokuepkej Jerusalén, yejua onokuikati yejuin itech Jehová: “Yejua kichiua ika barras ipan ipuertas moueyikalpan machikaujkej; yejua kinteochiua mokoneuan motech. Yejua kuajkui yolseuilistli itech tlajli tlen motlatki” (Sal. 147:13, 14). Melak okiyolchikauj salmista kimatis ika toTajtsin kichikaujtoya ipuertas ueyikalpan niman kintlajpiyas itekipanojkauan.

15-17. a) ¿Kenon uelis tomachiliskej kemantika itech tlen tikixnamikij, san ika, kenon Jehová kitekitiltia iTlajtol ika techpaleuis? b) Xkijto se neskayotl kenon iTlajtol toTajtsin kentla “melak totoka notlaloua”.

¹⁵ Kanaj kemantika tikixnamikiskej tlen ouijtika tlen kichiua matokuaajmanakan. San ika, Jehová uelis techmakas tlamachilistli niman ijkon tikmatiskej tlen tikchiuaskej. Salmista okijto ika toTajtsin “kititlani itlanauatil ipan tlajli; itlajtol melak totoka notlaloua”. Sakin ijkuak okijto ika Jehová “kititlani nieve ken ichkatl; yejua kisemoyaua seuktli ijkon ken tlikonextli” niman “yejua kontlajkali tesiujtli tlatsintlan”, salmista otetlajtolti: “¿Akinon uelis kixikos kech sesek?”. Niman noijki okijto ika Jehová “kititlani itlajtol niman kichiua mapatikan” (Sal. 147:15-18). ToTajtsin akin kipiya nochi tlamachilistli niman nochi ueli kichiua ueli kiteltia seuktli niman tesiujtli. Kuakon, yejua uelis techpaleuis maski san tlenon tikixnamikiskej.

¹⁶ Ipan yejuin tonajli, Jehová techyekana ika iTlajtol, Biblia. Niman “itlajtol melak totoka notlaloua”. Yejuin kijtosneki ika techpaleuiya itech totlaneltokil ijkuak techpoloua. San matiknemilikan kenon melak techpaleuiya ijkuak tikpouaj Biblia, tomachtiaj amatlajkuiloltin tlen techinmaka “tekitketl” akin yolmelauak niman tlamachilise, tlen tikitaj ipan JW Broadcasting, página jw.org, tlayekankej niman oksekimej tokniuan (Mat. 24:45). ¿Yotikitak kenon Jehová techyekana melak totoka?

¹⁷ Se tokniuj itoka Simone yokitak kenon iTlajtol toTajtsin kipiya kojtilistli. Yejua kimachiliaya ika xtlaj ika tepaleuiaya, niman hasta kinemiliaya ika toTajtsin xkiseliskia. Maski ijkon, yejua xkeman okikauj ika kichiuas teoyotl niman kitlajtlanilis Jehová makipaleui. Yejua noijki melak onochikauj nomachtis Biblia. Yejua kijtoua: “Jehová nochipa yonechyolchikauj niman yonechyekan itech nochi tlen nipanoua”. Yejuin yokipaleui matlanemili itech tlen tepaleui.

18. ¿Tleka tikmachilia tejua ika toTajtsin yomitsteochiuj, niman ipampa tlenon noneki tikueyiteneuas?

¹⁸ Salmista kimatiya kenon yeuejkaui toTajtsin okiteochiuj ikalpan. ToTajtsin san yejuamej okinmakak “itlajtol” niman “itlanauatiluan niman ken tetlajtlakolmakas” (xpoua Salmo 147:19, 20).d Ipan yejuin tonajli, yotechteochiujkej pampa san tejuamej tikpiyaj itokayo toTajtsin. Tikixmatij Jehová, tikpiyaj iTlajtol tlen techpaleuiya ipan tonemilis niman kuajli iuan touikaj. Ijkon ken yejon tlajkuilojketl itech Salmo 147, onka miyek tlen ika noneki tikueyiteneuaskej Jehová niman tikimijliskej oksekimej noijki makichiuakan.