Tlen notlajtoltiaj akin kitaj revistas

Ijkuak Satanás okijli Eva ika xmikiskia tla kikuaya itlakilyo “on kojtli yejuan temachistia on tlen kuajli niman on tlen xkuajli”, ¿kijtosnekiya ika kipiyaskia se alma tlen xueliskia mikis, ken aman miyekej kineltokaj?

Nesi ika ka. Ijkuak Diablo okijli Eva ika xmikiskia tla kikuaya tlakilyotl tlen toTajtsin yokimijlika maka kikuaskej, Diablo xokasikamachilti tla kipiyaskia se alma tlen xkeman mikiskia. Satanás okitekitilti se kouatl niman ijkon kimelajkaijlis Eva ika yemelak xmikiskia, yej nemiskia ika iyojlo ipan tlaltikpaktli niman xok nonekiskia kitlakamatis toTajtsin (Gén. 2:17; 3:3-5).

Kuakon tikitaj ika ipan Edén xakaj kineltokaya tla tikpiyaj se alma tlen xmiki, xompa oualeuj yejuin tlen miyekej kineltokaj. Kuakon, ¿kemanon opeuj noneltoka yejuin? Yejuin itlaj tlen xkuajli tikmatij. Tikmatstokej ika ijkuak opanok Apachiuilistli ipan itonaluan Noé, opopoliuj nochi tlaneltokijli tlen xmelauak. Pampa san Noé iuan ichanejkauan omakiskej niman san yejuamej kitekichiuiliayaj Jehová, uelis tikijtoskej ika nochi tlaneltokijli tlen xmelauak opopoliuj.

Yejuin techasikamachiltia ika miyekej opeuj kineltokaj ika tikpiyaj se alma tlen xmiki hasta ijkuak yopanoka Apachiuilistli. Ijkuak toTajtsin okinpatili intlajtol nochimej “on tlakamej” akin nemiyaj Babel niman ijkuak onoxexelojkej “nochiuiyan ipan tlaltikpaktli”, uelis tikijtoskej ika opeuj kiteijliaj ika tikpiyaj se alma tlen xmiki (Gén. 11:8, 9). Kuakon, xtikmatij kemanon opeuj noneltoka yejuin tlamachtijli tlen xmelauak. San ika, kema kuajli tikmatstokej ika Satanás, “imintataj on yejuan tlakajkayauaj”, yejua akin yokichiuj manoneltoka yejuin. Noijki tikmatstokej ika melak oyolpak ijkuak nochiuiyan opeuj noneltoka yejuin (Juan 8:44).