ToTajtsin kinteochiua akin kitlakamatij

Teotlajtoketl Moisés okijto ika toTajtsin techteochiuas tla tiktlakamatij (Deuteronomio 10:13; 11:27). Xtiktlakamatij toTajtsin san pampa tikmakasij matechtlajtlakolmaka, tejuamej tiktlakamatij pampa melak yolkuajli, niman yejon kichiua matiktlasojtlakan niman maka matiknekikan tikyolkokoskej. “Ijkuak tiktlakamatij itlanauatiluan Dios, sano yejua tiktlajsojtlaj. Niman itlanauatiluan xyetikej” (1 Juan 5:3).

San ika ¿kenon techteochiuas toTajtsin tla tiktlakamatij? Matikitakan.

1. IJKUAK TIKTLAKAMATIJ TOTAJTSIN, MÁS TITLAMACHILISEJKEJ

“Nejua ninemoTEKO Dios. Nejua nemechititia tlen kuajli para nemejuamej; nemechyekana ipan on ojtli yejuan noneki nenkinejnemiskej” (ISAÍAS 48:17).

Jehová, akin otexchijchiuj, techixmatstika niman kuajli techyekana. Tla tiknekij ika toTajtsin matechpaleui matiktlapejpenikan tlen kuajli, noneki tikpouaskej Biblia niman ijkon matikchiuakan.

2. IJKUAK TIKTLAKAMATIJ TOTAJTSIN, TIYOLPAKIJ

“¡Yolpakij akin kikakij itlajtol toTajtsin niman kitlakamatij!” (LUCAS 11:28, Traducción del Nuevo Mundo).

Akin kitlakamatij iTlajtol toTajtsin melak yolpakij. Matikonteneuakan se tlakatsintli de España. Yejua nimantsin kualaniyaj, kintlajyouiltiaya oksekimej niman kitlajyouiltiaya isiuatsin. Se tonajli okipouj tlen okijkuilo teotlajtoketl Moisés itech kenon katka José, ikoneuj Jacob. José okinemakakej ken tlakeuajli niman maski xtlaj okichiuj, okitsajkej. Maski ijkon, yejua xsan tlauelmiktoya, yolseujki katka niman teikneliaya (Génesis, capítulos 37-45). Tlakatsintli de España okijto: “Pampa opeuj nitlanemilia itech José, oniknek niyolkuajli yes niman san noselti ninoteltis. Pampa ijkon onikchiuj, aman niyolpaki imiuan nochanejkauan”.

Biblia techijlia kenon tikimitaskej oksekimej. Okseki matikitakan itech yejuin ipan okse tlamachtijli.