MAKA SA MATITETLAUELITAKAN
4 | Xmokauili Mamitspaleui Totajtsin
Biblia kijtoua:
“Itlakilyo espíritu santo yejuin: tlasojtlalistli, pakilistli, yolseuilistli, ijyouilistli, iknelilistli, yolkuajlilistli, tlaneltokijli, yolyemanilistli, noteltia iselti” (GÁLATAS 5:22, 23, TNM).
¿Tlenon kijtosneki?
ToTajtsin uelis techpaleuis maka sa matitetlauelitakan. Espíritu santo uelis techpaleuis matikchiuakan tlen san toselti xueliskia tikchiuaskiaj. Kuakon, tla tejuamej tikitaj ika titetlauelitaj, matiktlajtlanilikan toTajtsin matechpaleui maka sa matitetlauelitakan. Tla ijkon tikchiuaj, tomachiliskej ijkon ken kijtoua libro de Isaías. Ompa kijtoua: “Dios yejua nechmakixtia niman aman noyolika ninemi, niman xninomojtia. ToTEKO nechmanauiya niman yejua nechmaka yolchikaualistli” (Isaías 12:2). Niman noijki uelis tikijtoskej: “Notlapaleuilis ualeua itech Jehová” (Salmo 121:2, TNM).
Xyejyeko xchiua yejuin:
“Kachtopa, melak nitlauele katka [...]. San ika, Jehová yokichiuj ika nejua más maniteikneli niman manitetlasojtla” (WALDO).
Ika nochi moyojlo xtlajtlanili Jehová iespíritu santo niman ijkon mamitspaleui xchiua tlen kuajli (Lucas 11:13). Tla tejua timokojtilia más titetlasojtlas, tiyolseujtos, titeijyouis niman san moselti timoteltis, mitspaleuis maka sa xtetlauelita. Xkita tlenon kijtoua Biblia itech yejuin niman xmokojtili ijkon tikchiuas. Noijki, melak noneki xmouika imiuan akin ijkon kichiuaj, pampa yejon mitspaleuis más xtetlasojtla niman xchiua tlen kuajli (Hebreos 10:24).