Jehová kuajli techijlia ika yejuin tlaltikpaktli kikuepas se xochitlalpan

1. ¿Tlenon okijto teotlajtoketl Isaías?

TEOTLAJTOKETL Isaías okijto ika Jehová “toTajtsin itech tlen melauak”. Ika hebreo tlajtojli “melauak” kijtosneki “amén” (Is. 65:​16, TNM). Niman “amén” kijtosneki “ijkon manochiua” noso “yemelak nochiuas”. Ipan Biblia miyekpa notekitiltia tlajtojli “amén” niman ijkon noteititis ika melauak nochi tlen Jesús noso Jehová kijtouaj noso kichiuaj. Kuakon, Isaías kinekiya kimijlis israelitas ika nochi tlen Jehová kijtoua yemelak kichiua. Niman yejua ijkon yokuajteititijtiaj.

2. ¿Tleka uelis tikneltokaskej ika Jehová yemelak kichiuas tlen yokijto? ¿Tlenon tiknankiliskej ipan yejuin tlamachtijli?

² ¿Uelis tikneltokaskej ika Jehová yemelak kichiuas tlen yokijto? Kanaj 800 xiuitl sakin ika omik teotlajtoketl Isaías, apóstol Pablo okijto itlaj tlen kiteititia ika nochi tlen Jehová kijtoua yemelak nochiuas. Okijto: “Dios xkaman kijtoua on tlen xmelauak” (Heb. 6:18). ¿Xmelak ika ipan se ameyajli xuelis uajkisas atl tsopelik niman poyek? Noijki ijkon, itech Jehová xuelis uajkisas tlakajkayaualistin pampa itech yejua san uajkisa tlen melauak. Kuakon, uelis kuajli tikneltokaskej ika nochi tlen Jehová kijtoua yemelak nochiua. Ipan yejuin tlamachtijli tiknankiliskej yejuin: ¿tlenon yokijto Jehová kichiuas ika tlayekapan? niman ¿tleka uelis tikneltokaskej ika yemelak kichiuas?

¿TLENON YOKIJTO JEHOVÁ KICHIUAS?

3. a) ¿Tlenon melak tikuelitaj tinochimej akin tiktekichiuiliaj toTajtsin? (Apocalipsis 21:​3, 4). b) ¿Tlenon kijtouaj sekimej ijkuak kikakij yejuin?

³ Tinochimej akin tiktekichiuiliaj toTajtsin tikuelitaj tlen kijtoua Apocalipsis 21:​3, 4 (xpoua). Jehová kuajli yokijto ika “xok onyas mikilistli, nion chokistli, nion ajmantli”. Miyekpa tiktekitiltiaj yejuin tlaxelojli niman ijkon tikimijliskej akin tikinnojnotsaj kenon tinemiskej ipan xochitlalpan. San ika, ijkuak kikakij yejuin, sekimej kijtouaj: “Melak kualtsin kakisti, san ika, xkeman uelis nochiuas”.

4. a) ¿Tlenon ome tlemach kimatstoya Jehová? b) ¿Tleka tikijtouaj ika Jehová xsan otechijli tlen kichiuas ika tlayekapan?

⁴ Ijkuak Jehová okichiuj ika apóstol Juan makijkuilo tlen kijtoua Apocalipsis 21:3 niman 4, kimatstoya ika tiktekitiltiskiaj ipan yejuin tonajli ijkuak titenojnotsaskiaj. Noijki, Jehová kimatstoya ika miyekej xmás tlaneltokaskiaj itech tlen kichiuas ika tlayekapan (Is. 42:9; 60:2; 2 Cor. 4:​3, 4). Kuakon, ¿kenon uelis tikinpaleuiskej oksekimej makineltokakan tlen kijtoua Apocalipsis 21:3 niman 4? ¿Niman kenon uelis más titlaneltokaskej itech Jehová niman itech tlen yokijto kichiuas? Jehová xsan yotechijli tlen kichiuas ika tlayekapan, noijki yotechijli tleka uelis tikmatstoskej ika yemelak nochiuas. Amantsin titlajtoskej itech yejon.

JEHOVÁ KUAJLI YOKITEITITI IKA TLEN YOKIJTO NOCHIUAS

5. ¿Tlen tlaxelojli kiteititia ika uelis tikneltokaskej tlen Jehová yokijto, niman tlenon kijtoua?

⁵ Tlaxeloltin tlen sakin tikinnextiaj, techititiaj ika Jehová yemelak kikuepas yejuin tlaltikpaktli se xochitlalpan. Ompa kijtoua: “On yejuan yeuatikatka ipan on ueyixtikaj trono okijtoj: ‘Xkita, nejua nikyenkuilia nochi on tlajtlamach’. No ijki okijtoj: ‘Xkijkuilo in tlajtoltin pampa in tlen nimitsijlijtikaj yejua tlen melauak niman kuajli para nochimej kineltokaskej’. Kemaj onechijlij: ‘Ijki yonochiu. Nejua niachtoj niman nisa ika nochi de nochi on tlajtlamach’” (Apoc. 21:​5, 6a).

6. ¿Tleka Apocalipsis 21:5 niman 6 techpaleuiya más matitlaneltokakan itech tlen Jehová yokijto kichiuas?

⁶ ¿Tleka yejuin tlajtoltin techpaleuiyaj más matikneltokakan ika Jehová yemelak kichiuas tlen yokijto? Ipan yejuin tlaxeloltin yeskia kentla Jehová kitlalijtoskia ifirma ipan se amatl tlen kiteititia ika yemelak kichiuas tlen yokijto.b Ipan Apocalipsis 21:3 niman 4, Jehová kijtoua tlenon kichiuas. Sakin, ipan tlaxeloltin 5 niman 6 kiteititia ika yemelak ijkon kichiuas. Aman matikitakan tlenon kijtouaj yejuin tlaxeloltin.

7. ¿Akinon peua tlajtoua ipan tlaxelojli 5, niman tleka melak ueyi kijtosneki?

⁷ Ipan nochi tlatlachalistin tlen apóstol Juan okimitak, Jehová yexpa otlajto. Niman ijkuak ika okpa otlajto, okijto yejuin: “On yejuan yeuatikatka ipan on ueyixtikaj trono okijtoj” (Apoc. 21:5a). Yejuin tlajtoltin melak ueyi kijtosnekij pampa Jehová yejua akin otlajto, xotlajto se ángel nion xotlajto Jesús. Yejuin melak techpaleuiya pampa kichiua más matitlaneltokakan itech tlen kijtoua Tito 1:​2, ompa kijtoua ika toTajtsin “xueli tekajkayaua”. Ken tikitaj, melak uelis titlaneltokaskej itech tlen kijtoua Apocalipsis 21:5 niman 6.

“XKITA, NEJUA NIKYENKUILIA NOCHI ON TLAJTLAMACH”

8. ¿Kenon Jehová techititia ika yemelak kichiuas tlen yokijto? (Isaías 46:10).

⁸ Aman matitlajtokan itech tlajtojli “xkita” (Apoc. 21:5). Tlajtojli griego “xkita” melak miyekpa uajnestiuj ipan Apocalipsis. Se amatlajkuilojli kijtoua ika yejuin tlajtojli notekitiltia niman ijkon “akin tlaamapoujtika kuajli makita tlen sakin noijtoua”. ¿Niman tlenon noijtoua iyekapan Apocalipsis 21:5? ToTajtsin kijtoua: “Nejua nikyenkuilia nochi on tlajtlamach”. Maski Jehová nikan kiteneujtika tlen kichiuas ika tlayekapan, kijtoua kentla tla ikichiujtoskia pampa kuajli kimatstok ika ijkon kichiuas (xpoua Isaías 46:10).

9. a) ¿Tlenon kichiua matiknemilikan ijkuak kijtoua “nikyenkuilia nochi on tlajtlamach”? b) ¿Tlenon ipan nochiuas on “cielo” niman “tlaltikpaktli” tlen aman onka?

⁹ Aman matikitakan tlenon kijtosneki ijkuak Apocalipsis 21:5 kijtoua: “Nikyenkuilia nochi on tlajtlamach”. Yejuin kichiua matitlanemilikan itech ome tlemach tlen Jehová kichiuas: yejua kipatlas seki tlemach niman okseki kiyektlalis. Kachtopa matikitakan tlenon kipatlas. Apocalipsis 21:1 kijtoua: “On achtoj cielo niman on achtoj tlaltikpaktli xok onkatkaj”. “On achtoj cielo” kineskayotia tekiuajkej akin Satanás niman idemonios kinyekanaj (Mat. 4:​8, 9; 1 Juan 5:19). Ipan Biblia, tlajtojli “tlaltikpaktli” kemantika kinneskayotia tlaltikpakchanejkej (Gén. 11:1; Sal. 96:1). Kuakon, “achtoj tlaltikpaktli” kinneskayotia tlaltikpakchanejkej xkuajkualtin akin aman nemij. ToTajtsin xsan kiyektlalis “cielo” niman “tlaltikpaktli”, yej nochi kipopolos niman kipatlas ika “sen yenkuik cielo niman se yenkuik tlaltikpaktli”. Kijtosneki ika kitlalis se yenkuik gobierno niman kinpatlas akin nemij ipan yejuin tlaltikpaktli.

10. ¿Tlenon kiyenkuilis Jehová?

¹⁰ ¿Tlenon okseki kichiuas Jehová niman ijkon kiyektlalis “nochi on tlajtlamach”? (Apoc. 21:5). Jehová kiyektlalis yejuin tlaltikpaktli niman tlaltikpakchanejkej hasta ijkuak kichiuas maka sa makipiyakan tlajtlakojli. Ijkon ken okijto Isaías, nochi tlaltikpaktli nochiuas se kualtsin xochitlalpan, ijkon ken katka xochitlalpan Edén. Tejuamej noijki techyektlaliskej, Jehová kinpajtis akin xuelij nejnemij, akin xtlachiaj, akin xtlakakij niman hasta kinyolitis akin yomijkej (Is. 25:8; 35:​1-7).

“IN TLAJTOLTIN [ . . . ] YEJUA TLEN MELAUAK NIMAN KUAJLI PARA NOCHIMEJ KINELTOKASKEJ. [ . . . ] IJKI YONOCHIU”

11. ¿Tlenon okijlikej Juan makichiua, niman tleka?

¹¹ ¿Tlenon más okijto toTajtsin para itech matitlaneltokakan? Jehová okijli Juan: “Xkijkuilo in tlajtoltin pampa in tlen nimitsijlijtikaj yejua tlen melauak niman kuajli para nochimej kineltokaskej” (Apoc. 21:5). Yejua xsan okijli Juan makijkuilo yejuin, noijki okijli tleka nonekiya ijkon kichiuas. Okijli: “Pampa [ . . . ] yejua tlen melauak niman kuajli para nochimej kineltokaskej”. Kijtosneki ika nochi tlen toTajtsin kijtoua uelis tikneltokaskej niman nochipa nochiua. Melak kuajli ika Juan okitlakamat Jehová niman okijkuilo tlen okijli. Nochi yejuin techpaleuiya matikasikamatikan ika toTajtsin techmakas se xochitlalpan niman techteochiuas ika tlayekapan.

12. ¿Tleka Jehová ueli kijtoua “ijki yonochiu”?

¹² ¿Tlenon okijto Jehová ipan Apocalipsis 21:6? Yejua okijto: “Ijki yonochiu”. Jehová tlajtoua kentla yonochiuj nochi tlen yokijto itech xochitlalpan pampa xitlaj uelis kichiuas maka manochiua tlen yokijto. ¿Tlenon más okijto Jehová niman ijkon itech matitlaneltokakan?

“NEJUA NIACHTOJ NIMAN NISA IKA NOCHI”

13. ¿Tleka Jehová kijtoua “niachtoj niman nisa ika nochi” noso ika yejua Alfa niman Omega?

¹³ Ijkon ken kachtopa otikijtokej, ipan nochi tlatlachalistin tlen apóstol Juan okimitak, Jehová yexpa otlajto (Apoc. 1:8; 21:​5, 6; 22:13). Nochiuiyan Jehová okijto: “Nejua niachtoj niman nisa ika nochi”. Noso ken kijtouaj okseki Biblias: Alfa niman Omega. Yeuejkaui ipan alfabeto griego kachtopa letra itoka katka Alfa niman sa ika tlami letra itoka katka Omega. Kuakon, ijkuak Jehová kijtoua “nejua niachtoj niman nisa ika nochi” noso ika yejua Alfa niman Omega, techasikamachiltia ika ijkuak toTajtsin itlaj kipeualtia noijki kitlamiltia.

14. a) Xkijto kemanon Jehová kentla okijto letra Alfa niman kemanon kentla kijtos letra Omega. b) ¿Tlenon kuajli techijlia Jehová ipan Génesis 2:​1-3?

¹⁴ Sakin ika Jehová okichijchiuj Adán niman Eva, okimijli tlenon kinekiya kichiuas ipampa tlaltikpakchanejkej niman tlaltikpaktli. Biblia kijtoua ika “Dios okintiochiu ika in tlajtojli: ‘Xtlaxinachokan niman xkimpiyakan miyekej nemokoneuan. Xtemiltikan in tlaltikpaktli, niman xkinmomaktikan [ . . . ] on yolkej’” (Gén. 1:28). Ijkuak Jehová okijto tlenon kinekiya kichiuas, yeskia kentla okijto letra Alfa. Ajsiskia se tonajli ijkuak ikoneuan Adán niman Eva, akin tetlakamatiskiaj niman xok kipiyaskiaj tlajtlakojli, kitemiltiskiaj tlaltikpaktli niman kikuepaskiaj se xochitlalpan. Ipan yejon tonajli, Jehová kentla kijtos letra Omega. Ijkuak yejua otlan kichijchiua “on cielo niman on tlaltikpaktli niman nochi on tlajtlamach yejuan imimpan onkaj”, okichiuj itlaj tlen kiteititia ika yemelak kichiua tlen kijtoua. Yejuin tiknextiaj ipan Génesis 2:​1-3 (xpoua). ¿Tlenon okijtosnek Jehová ijkuak okijto ika chikome tonajli melak ueyi kijtosneki? Ika nochi tlen toTajtsin yokijto kichiuas ipampa tlaltikpakchanejkej niman tlaltikpaktli, yemelak nochiuas. Ijkon panos ipan itlamiyan chikome tonajli.

15. ¿Tleka nesiya ika xok ueliskia nochiuas tlen Jehová yokijtojka?

¹⁵ Pampa Adán niman Eva xotetlakamatkej, opeuj kipiyaj tlajtlakojli niman okinpanoltilijkej inkoneuan tlajtlakojli niman mikilistli (Rom. 5:12). Kanaj ueliskia nesis ika yejuin kichiuaskia maka manochiua ken toTajtsin kinekiya: ika tlaltikpakchanejkej akin tetlakamatij niman xtlajtlakolejkej makitemiltikan yejuin tlaltikpaktli. ¿Jehová xkeman ueliskia kitlamiltis tlen yokipeualtijka san ipampa tlen okichiuj Satanás? Kanaj ijkon nesiskia. Diablo okinemili ika Jehová xmás itlaj ueliskia kichiuas. Yejua okinemili ika ueliskia kipopolos Adán niman Eva niman kichijchiuas okse tlakatl niman okse siuatl akin kitemiltiskiaj yejuin tlaltikpaktli. San ika, tla Jehová ijkon kichiuaskia, Diablo kijtoskia ika Jehová tlakajkayaua. ¿Tleka? Pampa Génesis 1:28 kijtoua ika Jehová okimijli Adán niman Eva ika inkoneuan kitemiltiskiaj tlaltikpaktli.

16. ¿Tleka Satanás okinemili ika ueliskia kijlis Jehová ika xouel okichiuj tlen kineki?

¹⁶ ¿Tlenon más okinemili Diablo ika Jehová ueliskia kichiuas? Kanaj Satanás okinemili ika Jehová kinkauiliskia Adán niman Eva makinpiyakan inkoneuan, san ika, yejuamej nochipa nemiskiaj ika tlajtlakojli (Ecl. 7:20; Rom. 3:23). Tla ijkon panoskia, Diablo kijliskia Jehová ika xok ouel okichiuj tlen kinekiya. ¿Tleka? Pampa toTajtsin kineki ika yejuin tlaltikpaktli matemi ika tlaltikpakchanejkej akin xkipiyaj tlajtlakojli.

17. ¿Tlenon okichiuj Jehová niman ijkon kiyektlalis tlen okichiujkej Satanás niman Adán iuan Eva, niman kenon nochi ontlamis? (Noijki xkita tlaixkopinajli).

¹⁷ Jehová okiyektlali tlen Adán niman Eva yokichiujkaj. ¡Ken okichiuj melak okimojkatlachialti Satanás! (Sal. 92:5). Ijkuak Jehová okinkauili Adán niman Eva makinpiyakan inkoneuan, okiteititi ika yejua xtlakajkayaua niman ika nochipa nochiua tlen kijtoua. Noijki okiteititi ika yejua nochipa tetlani. ¿Kenon okiteititi yejuin? Okichiuj ijkuak okuajtitlan yakaj niman ijkon makinmakixtiki ikoneuan Adán niman Eva, akin tetlakamatiskiaj. Ijkon, ok nochiuaskia tlen toTajtsin kineki (Gén. 3:15; 22:18). Satanás xkeman kinemiliskia ika Jehová yakaj kuajtitlaniskia para matemakixtiki. ¿Tleka? Pampa ijkuak Jehová okuajtitlan yakaj okiteititi ika melak tetlasojtla (Mat. 20:28; Juan 3:16). Satanás san itech tlanemilia niman xkeman ijkon kichiuaskia. Kuakon, ¿tlenon uelis nochiuas ipampa tlen Jehová okichiuj? Ipan itlamiyan mil xiuitl ikoneuan Adán niman Eva, akin otetlakamatkej niman xok kipiyaskej tlajtlakojli, nemiskej nikan ipan tlaltikpaktli tlen nokuepas se xochitlalpan, ijkon ken Jehová yokijtojka desde yeuejkaui. Ijkuakon, Jehová kentla iuelis kijtos Omega noso ika yonochiuj tlen okipeualti.

¿TLENON TECHPALEUIS MÁS MATIKNELTOKAKAN IKA TOTAJTSIN TECHMAKAS SE XOCHITLALPAN?

18. ¿Tlenon yeyi tlemach techijlia Jehová niman ijkon matikneltokakan ika kichiuas tlen yokijto? (Noijki xkita recuadro “Yeyi tlemach tlen techpaleuis matikneltokakan ika Jehová kichiuas tlen yokijto”).

¹⁸ Itech tlen yotikitakej, ¿tlenon uelis tikimijliskej oksekimej para más makineltokakan ika toTajtsin yemelak kichiuas tlen yokijto? Kachtopa, ika Jehová akin yokijto ijkon kichiuas. Apocalipsis kijtoua: “Kemaj on yejuan yeuatikatka ipan on ueyixtikaj trono okijtoj: ‘Xkita, nejua nikyenkuilia nochi on tlajtlamach’”. Yejua uelis kichiuas tlen yokijto pampa kineki, pampa tlamachilise niman pampa melak kojtik. Ika ome, ijkuak Jehová tlajtoua itech tlen kichiuas, kiteneua kentla inochiujtika pampa kimatstika ika xtlaj uelis kiteltis. Ika yejon, ijkin kijtoua: “In tlajtoltin [ . . . ] yejua tlen melauak niman kuajli para nochimej kineltokaskej”. Noijki kijtoua: “Ijki yonochiu”. Ika yeyi, ijkuak Jehová itlaj kipeualtia, kitlamiltia. Pampa yejua kijtoua: “Nejua niachtoj niman nisa ika nochi”. Jehová kiteititis ika Satanás san tlakajkayaua niman ika xuelis kiteltis makichiua tlen yokijto.

19. ¿Tlenon uelis tikchiuas tla yakaj xmás kineltoka ika yejuin tlaltikpaktli nochiuas se xochitlalpan?

¹⁹ Xkilnamiki ika ijkuak tikinnojnotsas oksekimej itech tlen toTajtsin kichiuas noijki más chikauis motlaneltok. Kuakon, ¿tlenon uelis tikchiuas tla ijkuak yotikpouj Apocalipsis 21:4 akin tiknojnotstika mitsijlia: “Melak kualtsin kakisti, san ika, xkeman uelis nochiuas”? Uelis tikamapouilis niman tiktomilis tlen kijtouaj tlaxeloltin 5 niman 6. Xkititi akin tiknojnotstika ika Jehová kuajli yokiteititi ika yemelak kichiuas tlen yokijto. Yeskia kentla yokitlali ifirma ipan se amatl (Is. 65:​16, TNM).