Kuajli xmatsto ika tikyolpaktia Jehová

1. ¿Tlenon kinemiliaj sekimej itekipanojkauan Jehová?

¡MELAK tipakij pampa Jehová “sanoyej paki iminuan itlapejpeniluan”! (Sal. 149:4). San ika, kemantika sekimej najmanaj niman kinemiliaj: “Jehová kiyolpaktia tlen kichiua ikalpan, san ika ¿nejua nikyolpaktia?”. Miyekej itekipanojkauan Jehová akin yeuejkaui onenkej kemantika noijki ouijtika okitakej kineltokaskej ika kiyolpaktiayaj Jehová (1 Sam. 1:​6-10; Job 29:​2, 4; Sal. 51:11).

2. ¿Akinomej uelis kiyolpaktiskej Jehová?

² Biblia kijtoua ika maski titlajtlakolejkej, uelis tikyolpaktiskej Jehová. ¿Niman tlenon noneki tikchiuaskej? Noneki titlaneltokaskej itech Jesús niman toapolaktiskej (Juan 3:16). Ijkuak toapolaktiaj, nochimej tikimititiaj ika yotoyolkuepkej niman ika yotikijlijkej Jehová ika nochipa tiktlakamatiskej (Hech. 2:38; 3:19). Jehová melak yolpaki ijkuak kita ika tikchiuaj nochi yejuin para iuan touikaskej. Tla tokojtiliaj tikchiuaskej tlen otikijlijkej Jehová ijkuak itech otosentemakakej, Jehová kuelitas tlen tikchiuaskej niman nochipa iuan touikaskej (Sal. 25:14).

3. ¿Tlenon tiknankiliskej ipan yejuin tlamachtijli?

³ ¿Tleka kemantika sekimej kinemiliaj ika xkiyolpaktiaj Jehová? ¿Kenijki techititia Jehová ika tikyolpaktiaj? ¿Niman tlenon techpaleuis kuajli matikmatstokan ika Jehová kuelita tlen tikchiuaj?

TLEKA SEKIMEJ KINEMILIAJ IKA XKIYOLPAKTIAJ JEHOVÁ

4, 5. Tla tikmachiliaj ika xtitepaleuijkej, ¿tlenon noneki tikmatstoskej?

⁴ Timiyekej, desde ijkuak tikokonej katkaj, tiknemiliaj ika xtlaj kuajli tikchiuaj (Sal. 88:15). Se tokniuj akin itoka Adrián kijtoua: “Nochipa niknemiliani ika nejua xtlaj kuajli nikchiua. Ijkuak nikonetl katka, niktlajtlaniliaya Jehová makinkauili nochanejkauan manemikan ipan Xochitlalpan, san ika, nejua kuajli nikmatstoya ika xnechmelauaya ompa ninemis”. Tony, akin itajuan xiteixpantijkauan Jehová, kijtoua: “Notajuan xkeman onechijlijkej tla nechtlasojtlayaj noso tla kuajli tlen nikchiuaya. Nikmachiliaya ika xkeman ueliskia nikchiuas tlen makinyolpakti”.

⁵ Tla kemantika tikmachiliaj ika xmás titepaleuiyaj, matikilnamikikan ika Jehová yejua akin otechuajuikak ipan ikalpan (Juan 6:44). Yejua kuajli techixmatstok niman kita tlen kuajli tikchiuaj maski tejuamej xtikitaj (1 Sam. 16:7; 2 Crón. 6:30). Kuakon, ijkuak yejua techijlis ika melak titepaleuijkej, matikneltokakan (1 Juan 3:​19, 20).

6. ¿Kenijki nomachiliaya Pablo ijkuak tlanemiliaya itech itlajtlakoluan?

⁶ Kanaj sekimej ok totlajtlakolmakaj ipampa tlen xkuajli otikchiujkej ijkuak xitikixmatiyaj Jehová (1 Ped. 4:3). Oksekimej kanaj youejkaujkej ika kitekichiuiliaj Jehová, san ika, ok noxijxikouaj iuan tlen xkuajli kichiuasnekij. ¿Niman tejua? ¿Noijki timotlajtlakolmaka? Tla kema, maka melak xmajmana pampa sekimej itekipanojkauan Jehová noijki ijkon onomachilijkej, ken apóstol Pablo. Yejua melak noyolkokouaya pampa tlajtlakole katka (Rom. 7:24). Maski yonoyolkuepka itech nochi itlajtlakoluan niman yonoapolaktijka, yejua ijkin kijtouaya: “Xniueyixtikaj ken on oksekimej apóstoles”. Noijki okijto: “Nejua tej, más niueyi tlajtlakolej xken nochimej tlajtlakolejkej” (1 Cor. 15:9; 1 Tim. 1:15).

7. ¿Tlenon uelis tikmatstoskej tla yotoyolkuepkej?

⁷ ToTajtsin iluikakchane techijlia ika techtlapopoluis tla toyolkuepaj (Sal. 86:5). Ika yejon, tla yotoyolkuepkej, kuajli matikmatstokan ika Jehová yokichiuj tlen yokijto: yejua yotechtlapopolui (Col. 2:13).

8, 9. ¿Tlenon techpaleuis maka matiknemilikan ika xkeman uelis tikyolpaktiskej Jehová?

⁸ Tinochimej tiknekij chikauak tiktekichiuiliskej Jehová. San ika, kanaj sekimej kinemiliaj ika maski nokojtiliaj más kitekichiuiliskej Jehová, xkeman uelis kiyolpaktiskej. Se tokniuj akin itoka Amanda kijtoua: “Miyekpa niknemilia ika tla nikneki chikauak niktekichiuilis Jehová, mojmostla noneki más ninokojtilis. Ika yejon, kemantika hasta nikchiua tlen xok niueli. Niman ijkuak nikita ika xonikchiuj tlen niknekiya, niknemilia ika Jehová xkuelita tlen nikchiua ijkon ken nejua xonikuelitak tlen onikchiuj”.

⁹ ¿Tlenon techpaleuis maka matiknemilikan ika xkeman uelis tikyolpaktiskej Jehová? Matikilnamikikan ika yejua techasikamati niman xkeman techtlajtlaniliskia tlen xuelis tikchiuaskej. Maski tla ueli chikauak tiktekichiuiliaj noso xmás tiuelij, matikilnamikikan ika Jehová melak kipatiojkaita tla tiktekichiuiliaj ika nochi toyojlo. Matitlanemilikan intech itekipanojkauan Jehová akin okitekichiuilijkej ika nochi inyojlo. Oksejpa matikteneuakan Pablo. Yejua uejka yaya para tenojnotsas niman otlapaleui manochijchiuakan tlanechikoltin, niman miyek xiuitl ijkon okichiuj. San ika, sakin, xok ouel otenojnots ken kichiuaya. ¿Kijtosneki yejon ika Jehová xok okiyolpakti tlen kichiuaya? Ka, Pablo ok kitekichiuilijtoya ika nochi iyojlo niman Jehová ok kiteochiujtoya (Hech. 28:​30, 31). Tla ijkin topan nochiua niman xok tiuelij chikauak tiktekichiuiliaj Jehová, matikilnamikikan ika yejua kita tla tiktekichiuilijtokej ika nochi toyojlo. Aman matikitakan kenijki techititia Jehová ika tikyolpaktijtokej.

KENIJKI TECHITITIA JEHOVÁ IKA TIKYOLPAKTIAJ

10. ¿Kenijki techijlia Jehová ika melak tikyolpaktiaj? (Juan 16:27).

¹⁰ Techititia ika Biblia. Jehová melak kuelita techititis ika melak techtlasojtla niman ika tikyolpaktiaj. Ipan Biblia okpa nesi ika Jehová okijli iKoneuj, Jesús, ika melak kitlasojtlaya niman ika melak kiyolpaktiaya (Mat. 3:17; 17:5). ¿Tikuelitaskia mamitsijli Jehová ika melak tikyolpaktia? Maski Jehová xtechuajnotsas desde iluikak ijkon ken okichiuj iuan Jesús, kema techijlia ipan Biblia ika tikyolpaktiaj. Ijkuak tikamapouaj kenijki Jesús kualtsin kinnotsaya inomachtijkauan, tikmachiliaj kentla tla Jehová ijkon technotstoskia (xpoua Juan 16:27). Jesús kichiuaya ijkon ken iTaj. Ika yejon, ijkuak tikamapouaj ika Jesús okimijli inomachtijkauan ika melak kintlasojtlaya maski nopopolouayaj, uelis tikonnemiliskej ika Jehová yejua akin ijkon techijlitika (Juan 15:​9, 15).

11. Ijkuak titlajyouiskej, ¿tleka xnoneki tiknemiliskej ika xok tikyolpaktijtokej Jehová? (Santiago 1:12).

¹¹ Techititia ipampa ken techpaleuiya. Jehová kineki techpaleuis. San matikonnemilikan kenijki nochipa techmaka tlen ika topanoltiskej. San ika, kemantika tikixnamikij tlen xkuajli, ijkon ken ipan opanok Job (Job 1:​8-11). Ijkuak ijkin topan nochiuas, maka matiknemilikan ika xok tikyolpaktijtokej Jehová, yej matiknemilikan ika uelis tikititiskej Jehová ika melak tiktlasojtlaj niman ika itech titlaneltokaj maski ouijtika tlen tikixnamiktokej (xpoua Santiago 1:12). Niman matikmatstokan ika yejua techpaleuis niman techititis ika techtlasojtla para uelis titlaxikoskej.

12. ¿Tlenon techmachtia tlen ipan onochiuj Dimitri?

¹² Matikitakan tlen ipan opanok tokniuj Dimitri akin chanti Asia. Se tonajli xok okipix tekitl. Opanok seki metstin niman xkinextiaya se tekitl, ika yejon, okijto más tenojnotsas para kititis Jehová ika itech tlaneltokaya. San ika, opanok tiempo niman ok xueliya kinextiaya se tekitl. Sakin, opeuj kualo niman nonekiya nochipa nentos ipan itlapech. Niman ipampa tlen kixnamiktoya, opeuj kinemilia ika xkuajli kichiujtoya itekiyo ken tajtli niman ken teueuentsin niman ika xok kiyolpaktiaya Jehová. San ika, se yeuajli, iichpokatsin okimakak se amatl kampa okitlali tlen kijtoua Isaías 30:15 itech Traducción del Nuevo Mundo: “Nenkojtitoskej tla xnemomojtiaj niman tla nenkiteititiaj ika nentlaneltokaj”. Yejua okijli: “Notaj, ijkuak timajmanas, xkilnamiki yejuin texto”. Dimitri okitak ika Jehová kinpaleuijtoya pampa ichanejkauan xkinpolouaya intlaken, tlen kikuaskej niman kampa chantiskej. Yejua kijtoua: “San nonekiya xninosiaujkauas niman xninomojtis niman xnikajkauas ika nitlaneltoka itech noTajtsin”. Tla tejua itlaj tikixnamiktika, kuajli xmatsto ika Jehová najmana mopampa niman ika mitspaleuis xtlaxiko.

13. ¿Kenijki techititia Jehová ika ok tikyolpaktiaj?

¹³ Techititia itechkopa tokniuan. Jehová uelis kichiuas ika tokniuan matechyolchikauakan ijkuak xkuajli tomachiliskej. Yejon tlen ipan opanok se tokniuj siuatl akin chanti Asia. Yejua xok okipix tekitl niman opeuj melak kualo. Sakin, iueuentsin okichiuj se ueyi tlajtlakojli niman okikuilijkej itekiyo ken tlayekanketl ipan tlanechikojli. Tokniuj melak onajman niman yejua kijtoua: “Xnikasikamatiya tleka ijkon nopan nochiujtoya. Niknemiliaya ika onikchiujka itlaj tlen xkuajli niman ika xok nikyolpaktiaya Jehová”. Kuakon, okitlajtlanili Jehová makititi ika ok kitlasojtlaya niman Jehová okinankili iteoyouj. ¿Kenijki? Yejua kijtoua: “Tokniuan tlayekankej nouan otlajtojkej niman onechpaleuijkej manikita ika Jehová ok nechtlasojtlaya”. Sakin, oksejpa okitlajtlanili Jehová makipaleui. ¿Tlenon opanok? Yejua kijtoua: “Yejon tonajli onikseli se carta tlen onechijkuilouilijkej sekimej tokniuan ipan notlanechikol. Ijkuak onikamapouj, onikitak ika Jehová okikak noteoyouj”. Ken tikitaj, tlen techijliaj tokniuan ijkuak techyolchikauaj, techititia ika ok tikyolpaktiaj Jehová (Sal. 10:17).

14. ¿Kenijki Jehová kintekitiltia tokniuan para techititis ika ok tikyolpaktiaj?

¹⁴ Jehová techititia ika tikyolpaktiaj ijkuak tokniuan techyektlaliaj. Matikonteneuakan tlen opanok ipan kachtopa siglo. Jehová okichiuj ika apóstol Pablo makimijkuilouili tokniuan 14 cartas kampa okinyektlali. ¿Tleka Jehová okichiuj ika Pablo makinyektlali? Pampa yejua yolkuajli niman tetlasojtlani, niman teyektlalia ijkon ken se tajtli kiyektlalia ikoneuj (Prov. 3:​11, 12). Kuakon, tla se tokniuj techyektlalia ika Biblia, maka matiknemilikan ika xok tikyolpaktiaj Jehová, yej matiknemilikan ika ok techtlasojtla (Heb. 12:6). Matikitakan kenijki Jehová noijki techititia ika ok tikyolpaktiaj.

OKSEKI KEN JEHOVÁ TECHITITIA IKA TIKYOLPAKTIAJ

15. ¿Akinomej kinmaka Jehová iespíritu santo, niman tlenon uelis kuajli tikmatstoskej?

¹⁵ Jehová kinmaka iespíritu santo akin kiyolpaktiaj (Mat. 12:18). Uelis totlajtoltiskej: “¿Nikinteititia kualneskayomej tlen kitemaka espíritu santo?”. Xnemili, ¿aman más titeijyouiya xijkon ken ijkuak xitikixmatiya Jehová? Uelis más kuajli tikmatis tla tikyolpaktia Jehová tla tikita ika más yopeuj tikinteititia kualneskayomej (xkita recuadro “Itlakilyo espíritu santo”).

16. Ijkon ken kijtoua 1 Tesalonicenses 2:​4, ¿akinomej kintekitiltia Jehová para makiteijlikan kuajli tlajtoltin? ¿Niman kenijki timomachilia pampa Jehová ijkon kichiua?

¹⁶ Akin kiyolpaktiaj Jehová kinmaka se kualtsin tekitl: kiteijliaj kuajli tlajtoltin (xpoua 1 Tesalonicenses 2:4). Matitlajtokan itech se tokniuj akin itoka Jocelyn. Se tonajli, yejua xmás kuajli otlanextili. Yejua kijtoua: “Nikmachiliaya ika xnikpiaya chikaualistli, xtlaj niknekiya nikchiuas. San ika, ijkuakon niprecursora katka niman yejon tonajli nochipa nontenojnotsaya. Kuakon, oniknots Jehová niman onitenojnotsato”. Yejon kualkan, Jocelyn otlajto iuan se siuatsintli akin itoka Mary niman yejua okinek nomachtis Biblia. Seki metstin sakin, Mary okijli Jocelyn ika yejon kualkan ijkuak okinojnots, yejua yokitlajtlanilijka toTajtsin makipaleui. ¿Tlenon okimachti yejuin tokniuj Jocelyn? Yejua kijtoua: “Onikmachili kentla Jehová nechijlijtoskia: ‘Nikuelita tlen tikchiua’”. Tikmatstokej ika xnochimej techkakiskej ijkuak tikinnojnotsaskej, san ika, kuajli matikmatstokan ika Jehová melak yolpaki ijkuak kita ika tokojtiliaj titenojnotsaskej.

17. ¿Tlenon mitsmachtia tlen okijto Vicky itech tlaxtlauijli? (Salmo 5:12).

¹⁷ Jehová kichiua ika akin kiyolpaktiaj makinpaleui imikilis Cristo (1 Tim. 2:​5, 6). San ika ¿tlenon uelis tikchiuaskej tla tiknemiliaj ika xtikyolpaktiaj Jehová maski titlaneltokaj itech tlaxtlauijli niman maski yotoapolaktijkej? Matikilnamikikan ika kemantika toyojlo techkajkayaua. San ika, Jehová xtechkajkayaua, niman yejua techijlia ika akin tlaneltokaj itech imikilis Cristo yejuamej yolmelajkej niman yejua kinteochiuas (xpoua Salmo 5:12; Rom. 3:26). Se tokniuj akin itoka Vicky melak okipaleui pampa otlanemili itech tlaxtlauijli. Yejua xkineltokaya ika Jehová kitlasojtlaya, san ika, sakin okijto: “Jehová melak onechijyoui. Kema, nejua kentla nikijlijtoya: ‘Tejua xuelis tinechtlasojtlas. Maski mokoneuj okitemakak inemilis nopampa, xuelis tikintlapopoluis nochi notlajtlakoluan’”. Ijkon ken Vicky, tla titlanemiliaj itech imikilis Cristo, tikitaskej ika Jehová melak techtlasojtla niman kuajli tikmatstoskej ika tikyolpaktiaj.

18. ¿Tlenon uelis kuajli tikmatstoskej tla nochipa tokojtiliaj tiktlasojtlaskej toTajtsin iluikakchane?

¹⁸ Maski tokojtiliskej tikchiuaskej tlen yotiuelkej ipan yejuin tlamachtijli, kemantika uelis tajmanaskej niman totlajtoltiskej tla tikyolpaktijtokej Jehová. Tla ijkon mopan nochiua, xkilnamiki ika “on yejuan kitlajsojtlaj” Jehová kiyolpaktiaj (Sant. 1:12). Kuakon, más xmonisiui itech Jehová niman xmokojtili xkita kenijki mitsititia ika tikyolpaktia. Niman maka xkilkaua ika toTajtsin “xuejka nemi cada se de tejuamej” (Hech. 17:27).