Tlen mitspaleuis nochipa xmomachti
¿XMÁS ueli timomachtia sejse semana? ¿Mitstlatsiuitia? Tinochimej ijkon topan panouani. Onka seki tlemach tlen noneki nochipa tikchiuaskej maski noneki tokojtiliskej niman tikxeloskej tiempo, ken taltiskej. San ika ¿xmelak ika melak kualtsin tiuajtomachiliaj ijkuak tiuajtaltiaj? Ijkuak tomachtiaj Biblia, noijki melak kuajli tomachiliaj pampa yeskia kentla taltiskiaj “ikan atl niman ikan itlajtoltsin Dios” (Efes. 5:26). Tlen noteneuas ipan yejuin tlamachtijli melak mitspaleuis.
Xchijchiua se programa. Yakaj akin kichiua ken Cristo melak noneki nochipa manomachti (Filip. 1:10). Tla tikneki tikchiuas tlen otiktlali ipan moprograma, xtlali kampa uelis tikitas, ken kampa tikintlalia moamauan, ipan se tablero, ipan morefrigerador. Noso kanaj uelis tiktlalis se alarma ipan moteléfono para mamitsilnamikti ika noneki timomachtis.
Xnekto xchiua tlen más mitspaleuis. Sekimej kuelitaj uejkauiskej nomachtiskej, san ika, sekimej kuelitaj miyekpa nomachtiskej pero xmás uejkauiskej. ¿Tejua kenon tikuelita? Xtlali ipan moprograma ken tejua tikuelitaskia timomachtis. Tla yoajsik ijkuak timomachtis, san ika, titlatsiui, uelis tikyejyekos san 10 minutos timomachtis. Kanaj tiknemilis ika xueyi tiempo, san ika, tla yotikpeualti, kanaj tiknekis más tiuejkauis timomachtis (Filip. 2:13).
Xkita tlenon timomachtis. Tla peua tiknemilia tlenon uelis timomachtis hasta ijkuak yotiuajmotlali, tikpolos motiempo (Efes. 5:16). Kanaj uelis tikinmijkuilos seki tlamachtiltin noso nochi tlen tikuelitaskia tikmatis. Tla itlaj xkuajli tikajsikamati niman tikneki tikajsikamatis, xkijkuilo. Niman tla ijkuak timomachtijtok tikneki itlaj tikmatis, noijki uelis tikijkuilos.
Xpatla moprograma ijkuak nonekis. Xkilnamiki ika tikneki timomachtis sejse semana. Kuakon, tla kemantika noneki, xpatla tonajli, hora, kech tiuejkauis niman tlen timomachtis.
• Tla nochipa timomachtia san moselti, mitspaleuis más xmonisiui itech Jehová, mitspaleuis xtlapejpeni tlen kuajli niman mitspaleuis melak kuajli xmomachili (Jos. 1:8).