Tlen notlajtoltiaj akin kitaj revistas
¿Hasta kemanon titenojnotsaskej?
Jesús ijkin okijto: “Niman kuajli tlajtoltin itech iGobierno toTajtsin noteijliskej ipan nochi yejuin mundo para nochimej makimatikan, niman ijkuakon tlapopoliuis” (Mat. 24:14). Ipan yejuin tlaxelojli niman ipan tlaxelojli 6 niman 13, tlajtojli ika griego télos notlajtolkuepa “tlapopoliuis”. Yejuin kijtosneki ika ipan Armagedón kipopoloskej para nochipa nochi tlen Satanás kiyekana (Apoc. 16:14, 16). Yejuin techasikamachiltia ika ijkuak yetlapopoliuis ok titenojnotsaskej. Kuakon, nopatla ken achto tikasikamatiyaj yejuin tlaxelojli.
Hasta aman, tikasikamatiyaj ika tijkajkauaskiaj ika titenojnotsaskiaj ijkuak kipopoloskia Ueyixtika Babilonia niman peuaskia ueyi tlajyouilistli (Apoc. 17:3, 5, 15, 16). Tikneltokayaj ika ijkuak peuaskia ueyi tlajyouilistli techititiskia ika yetlamis on tiempo tlen noixmati ken “xiuitl ijkuak ok uelis” teselis Jehová (Is. 61:2, TNM). Noijki tikneltokayaj ika san ueliskiaj makisaskej ipan ueyi tlajyouilistli akin melajkanemiyaj itech Jehová ijkuak xepeua ueyi tlajyouilistli. Tikijtouayaj ika yejuamej yeskia ken judíos akin omakiskej ijkuak okixoxotonijkej Jerusalén ipan 607 ijkuak xpeuaya xiuitl 1, akin yokintlapejpenijkaj para makisaskej pampa kiueyichiuayaj Jehová niman kitlauelitayaj tlen xkuajli (Ezeq. 5:11; 9:4). San ika, yejuin xnotlajtolnamiki iuan tlen Jesús okijto ipan Mateo 24:14, kampa kijtoua ika sekimej kinekiskej techkakiskej achto tlapopoliuis ipan Armagedón.
Ken aman tikasikamatij Mateo 24:14 noijki kipatla ken tikasikamatij Apocalipsis 16:21, kampa kiteneua uejueyi tesiujtli. Ijkuak más kuajli tikimitaj yejuin tlaxeloltin kuajli tikitaj ika notlajtolnamikij: cada se kiteneua kenijki kiseliskej tlaltikpakchanejkej iTlajtol toTajtsin. Ijkon ken okijkuilo apóstol Pablo, “akin kinmakixtiskej”, kuajli kiseliaj on kuajli tlajtojli. San ika, para itlauelikniuan toTajtsin “yeskia ken mikilistli” (2 Cor. 2:15, 16). Yejuamej kinkualania on kuajli tlajtojli pampa kiteititia ika yejuin tlaltikpaktli melak xkuajli, ika Satanás yejua akin kiyekantika niman ika sa achijtsin poliui ijkuak kipopoloskej (Juan 7:7; 1 Juan 2:17; 5:19).
San ika, Apocalipsis 16:21 noijki kijtoua ika on tesiujtli melak uejueyi yeskia. Nesi ika yejuin kijtosneki ika ipan ueyi tlajyouilistli más kineltokaskej tlen tikteijliskej, niman ijkon más noixmatis itoka Jehová (Ezeq. 39:7). Ijkuak yokipopolojkej Ueyixtika Babilonia, ¿ok nemiskej sekimej akin kinekiskej kikakiskej on kuajli tlajtojli tlen tikteijliaj? Kanaj uelis ijkon panos. Kanaj uelis kilnamikiskej noso kitaskej ika iteixpantijkauan Jehová ouejkauj kiteijlijtinemiyaj ika tlaneltokiltin xmelajkej kinpopoloskiaj.
Kanaj panos ijkon ken tlen opanok Egipto ijkuak yopanokaj 10 tlajyouilistin. Sakin ika Jehová okintlajtlakolmakak “nochimej on iminídolos”, “miyekej seseknekamej tlakamej yejuan xisraelitas” oyajkej imiuan israelitas (Éx. 12:12, 37, 38). Kanaj akin xisraelitas katkaj otlaneltokakej itech Jehová pampa okitakej ika yonochiujkaj 10 tlajyouilistin tlen yokijtojka Moisés.
Nochimej akin tlaneltokaskej itech Jehová sakin ika yokipopolojkej Ueyixtika Babilonia uelis kinpaleuiskej ikniuan Cristo akin ok nemiskej ipan tlaltikpaktli (Mat. 25:34-36, 40). Tla kinekij nopouaskej itech akin yolmelajkej ijkuak Jesús teyolkuitis, noneki nopatlaskej ijkuak xepeua Armagedón. Ijkuak tlapejpeniltin akin ok nemiskej ipan tlaltikpaktli yaskej iluikak.
Ken aman tikasikamatij Mateo 24:14 techititia ika Jehová melak tetlasojtla niman teiknelia, “pampa nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9).