Tau Fakapotopotoaga ke he Ati Hakeaga he Fakaalofa mo e Fefakalatahaaki

Kua liga fita he fakalataha atu a koe ke he falu he tau feleveiaaga he tau fakapotopotoaga he Tau Fakamoli a Iehova ne tata atu ke he mena ne nofo ai a koe. Ne o mai e tau tagata he tau puhala momoui kehekehe—tau matakau magafaoa, tau tagata nofo tokotaha, fuakau mo e fuata—ne kua ha ha i ai. Ne fefakalatahaaki a lautolu ke he tapuaki ha lautolu mo e fiafia pauaki ke lagomatai e falu.

Ke he ha fakatokatokaaga kua ha ha i ai e tau tagata tokologa ne manako ke gahua mo e fefakalatahaaki, ti kua lata ni ke ha ha i ai e falu takitakiaga. Ko e Atua maopoopo e Atua; mo e ha ko e mena ia, kua lata ke ata mai e maopoopo ia i loto he fakapotopotoaga he hana a tau tagata. Ke tuga he senetenari fakamua, ti pihia foki he vaha nei, ne fifili ai e tau tagata tane Kerisiano kua lata, kua loto motua, mo e fa mahani lahi mo e tau mena ke eke ke kotofa mo tau momotua, po ke tau leveki. Ne takitaki e lautolu nei e fakapotopotoaga mo e leveki e tau mena fakaagaga kua lata hana. Ne lagomatai he falu tagata tane taute mena fakamoli a lautolu ne fakahigoa ko e tau fekafekau lagomatai. Ne nakai moua he tau tagata nei ha totogi tupe tumau po ke falu mena lagomatai tupe ka e foaki ni e lautolu a lautolu ke fekafekau noa, he fakafeleveia ni e lautolu ha lautolu a tau mena fakamole, kakano he mahani ke gahua tupe fakalalolagi.—1 Korinito 14:33, 40; Filipi 1:1; 1 Timoteo 3:8, 9.

Ne fifili fefe a lautolu nei? Kua lata a lautolu ke eke ko e tau fekafekau fakamoli he Atua kua fakakite moli falu mena kua lata mo e Tohiaga Tapu. Ko e falu he tau mena nei: ko e ‘mataala, mahani fakalatalata, gali, fakaalofa ke he tau tagata kehe, aga ke fakaako atu, nakai fa taufetoko, nakai loto lahi ke he tau tupe, nakai ko e tagata kito liogi, kua lata foki a ia ke talahaua mitaki e lautolu i tua’; ‘kua taofi mau ke he kupu moli tuga ne fakaako ai a ia.’—1 Timoteo 3:1-15; Tito 1:7-9.

Ne nakai vili he fakapotopotoaga e tau tagata tane nei ke he tau tuaga ofisa gahua, ko e tau mena kua liga mahani mau ke tokologa e tau Kerisiano fou ne ha ha i ai. Ka e, ko lautolu ia ne tuku atu he tau tagata tane loto motua ne mahani lahi ke he tau mena, ko e tau momotua mo e kua ha ha i ai e lotomatala ko e hohoko fefe a lautolu ne onoono ki ai ke fakafeleveia e tau mena kua lata he Tohiaga Tapu. Ati taute ai mogoia e tau kotofaaga he tau momotua mo e tau fekafekau lagomatai i lalo he takitakiaga he Kau Fakatufono he Tau Fakamoli a Iehova, ne taute pihia e mena nei he muitua ke he fakafifitakiaga ne fakatoka mai he fakapotopotoaga Kerisiano he senetenari fakamua.

Ko e tau momotua nei, po ke tau leveki, kua nakai tanaki hake e vahega fekafekau lotu; nakai ko e tau iki a lautolu ki luga he falu. Ke tuga ne talahau e Iesu, ko lautolu oti ne takitaki ko e tau tupa ai ni ke he tau tagata oti kana. I loto he tau fakapotopotoaga he Tau Fakamoli a Iehova, kua moli ni ko e tau faoa gahua auloa e tau momotua ke he Kautu he Atua.—Mataio 20:26, 27; 23:8-11; Roma 12:8; 1 Korinito 3:5; 4:1, 2; Kolose 4:11; 1 Tesalonia 5:12-14.

Ha ko e tau leveki, ne takitaki e lautolu e tau fakatonutonuaga ne foaki mai he tau feleveiaaga mo e takitaki e gahua fakamatala. Ko e foliaga fakamua he fakapotopotoaga ko e fakamatalaaga he tala mitaki he Kautu ke he fonua katoa ne kotofa ki a lautolu. Kua gahua leveki mamoe foki e tau leveki, he ahiahi atu ki a lautolu he fakapotopotoaga ke fakamalolo a lautolu ke he mena kua lata.—Mataio 24:14; Gahua 1:8; 1 Tesalonia 2:11, 12; 5:14, 15; 2 Timoteo 2:24-26; Heperu 13:17; Iakopo 5:13-16; 1 Peteru 5:1-4.

Kua lago foki ke he tau momotua e matagahua ke fakatonu mo e fakahoko e akonakiaga ki a taha kua liga muitua ke he puhala hepe lahi mo e kua liga fakahagahaga kelea e tuaga fakaagaga mo e mahani mea mo e fefakalatahaaki he fakapotopotoaga.—1 Korinito 5:4, 5, 7, 11-13; Tito 1:9; 2:15; 3:10, 11.

Ka lafi tumau mo e fakapotopotoaga to moua e koe e fakalatahaaga fakamatakainaga mitaki mo e loga e tau lagomatai fakaagaga.—Salamo 35:18; 84:10.

• Ko hai ne takitaki e tau mena he tau fakapotopotoaga takitokotaha?

• Mai he fakaveaga fe ka fifili aki e tau leveki?

• Ko e heigoa e tau matagahua ha lautolu?

[Tau Fakatino he lau 13]

Fakaako he tau leveki e fakapotopotoaga, takitaki e gahua fakamatala ke he taha fale mo e ke he taha fale, fakamalolo atu he ahiahi tuga e leveki mamoe, age e tau fakatonutonuaga mo e akonaki kaeke kua lata