Veveheaga 34

Fifiliaga he Hana Tau Aposetolo

NA LIGA ko e taha ia e tau mo e hafa he talahau fakamua e Ioane ko e Papatiso a Iesu ko e Punua Mamoe he Atua mo e kamata e Iesu hana a gahua fakamatala ke he tau tagata. Ke he magaaho ia ko Aneterea, Simona Peteru, Ioane, liga ko Iakopo foki (ko e matakainaga ha Ioane), pihia foki a Filipo mo Natanielu (ne fakahigoa foki ko Patolomaio), ne eke ia mo tau tutaki fakamua hana. Ne tokologa atu foki ne fakalataha mo lautolu ke mumui ki a Keriso he magaaho fakamui.

Ko e magaaho nei kua mautali a Iesu ke fifili hana a tau aposetolo. Ko lautolu haia ko e hana a tau kau gahua uho ka foaki ki ai e tau fakaakoaga pauaki. Ka e nakai la fifili a lautolu, ne fano a Iesu ke he mouga mo e liogi he po katoa, tuga ko e ole ke he pulotu mo e fakamonuinaga he Atua. Ko e magaaho ne aho ai, ne ui e ia hana tau tutaki mo e fifili mai ia lautolu 12. Ka e taha e mena, ko e matutaki agaia ni a lautolu ko e tau fanau aoga ha Iesu, ko e ui agaia ni a lautolu ko e tau tutaki foki.

Ko e tokoono ne fifili e Iesu, ne fakahigoa i luga, ko lautolu haia ko e hana a tau tutaki fakamua. Ko Mataio, ne ui e Iesu mai he hana ofisa oko tukuhau, ne kua fifili foki. Ko e tokolima ne fifili foki ko Iuta (ne fakahigoa foki ko Tataio), Iuta Isakariota, Simona ko e Kanana, Toma, mo Iakopo ko e tama ha Alefaio. Ko Iakopo nei foki ne fakahigoa ko Iakopo Tote, liga he tote e tino po ke fakamui mai he taha aposetolo ne higoa foki ko Iakopo.

Ke he magaaho nei kua fai magaaho e toko 12 ne fakalataha mo Iesu, ti iloa mitaki e ia a lautolu. Ko e moli, ko e tokologa ia lautolu ko e hana ni a tau magafaoa. Ko Iakopo mo e hana a matakainaga ko Ioane ko e tau kasini fakamua ni ha Iesu. Ti liga ko Alefaio ko e matakainaga ha Iosefa, ko e matua hiki ha Iesu. Ti ko e tama tane ha Alefaio, ko e aposetolo ko Iakopo, ko e kasini foki ni ha Iesu.

Ko e moli, ko Iesu ne nakai uka ke manatu e tau higoa he hana a tau aposetolo. Ka e maeke nakai a koe ke manatu a lautolu? Maeke ke manatu ko e ua ne higoa ko Simona, ua ne higoa ko Iakopo, ua ne higoa ko Iuta, ti fai matakainaga a Simona ko Aneterea, mo e matakainaga ha Iakopo a Ioane. Ko e kei haia ke manatu aki e tokovalu he tau aposetolo. Ko e tokofa ne toe putoia e tagata oko tukuhau (Mataio), ko ia ne mahalohalo e tua he magaaho fakamui (Toma), taha ne ui mai he lalo akau (Natanielu), mo e hana kapitiga ko Filipo.

Tokohogofulu ma taha e tau aposetolo mai i Kalilaia, ko e matakavi kaina ha Iesu. Ko Natanielu mai i Kana. Ko Filipo, Peteru, mo Aneterea ne o mai fakamua i Petesaita, ko Peteru mo Aneterea ne o he magaaho fakamui ki Kapanaumi, tuga ko e mena ne nofo ai a Mataio. Ko Iakopo mo Ioane he pisinisi takafaga ika mo e nonofo foki i Kapanaumi po ke tata atu ki ai. Ko e tuga ni ko Iuta Isakariota, ne afo a Iesu he magaaho fakamui, ko e aposetolo ni a ia mai i Iutaia. Mareko 3:​13-19; Luka 6:​12-16.

▪ Ko hai e tau aposetolo ne liga ko e tau faoa ni ha Iesu?

▪ Ko hai e tau aposetolo ha Iesu, mo e maeke fefe a koe ke manatu ha lautolu a tau higoa?

▪ Ne o mai he tau matakavi fe e tau aposetolo?