Veveheaga 14

Tau Tutaki Fakamua ha Iesu

MOLE atu 40 e aho hana he tutakale, ne liu a Iesu ki a Ioane, ne papatiso a ia. He magaaho ne hoko atu a ia, ne tuhi a Ioane ki a ia mo e talahau ki a lautolu ia ne ha ha i ai: “Kitiala, ko e Punua Mamoe he Atua, ko ia ke uta kehe e hala he lalolagi. Ko ia haia ne tala atu ai au. Ha ne mui mai kia au e tagata, kua mua ni kia au, ha ko e mena mua tuai a ia kia au.” Pete ne fakamua a Ioane he kasini hana ko Iesu, ne iloa e Ioane na moui fakamua a Iesu ia ia ko e peresona fakaagaga he lagi.

Ka e taha e mena, ko e tau fahi tapu gahoa fakamua he magaaho ne finatu a Iesu ke papatiso, ne nakai iloa moli e Ioane ko Iesu ka eke mo Mesia. “Nakai iloa foki e au a ia,” he talahau e Ioane, “ka kia fakakite a ia kia Isaraela, ko e mena ia ne hau ai au ke papatiso ke he vai.”

Ne fakamaama atu foki e Ioane ke he hana tau tagata fanogonogo e mena ne tupu he magaaho ne papatiso e ia a Iesu: “Ne kitia e au e agaga he hifo mai he lagi, tuga ne lupe, mo e nofo ki luga ia ia. Ti nakai iloa e au a ia, ka ko Ia ne fakafano mai au ke papatiso ke he vai, ko ia ne tala mai kia au, Ko ia ka kitia e koe e agaga kua hifo ki ai, mo e nofo i luga ia ia, ko ia haia ni ke papatiso ke he agaga tapu. Ti kua kitia tuai e au mo e talahau atu, ko ia ni ko e Tama he Atua.”

Ko e aho hake ne tu a Ioane mo e tokoua hana a tau tutaki. Ne liu haele mai a Iesu, ne pehe a ia: “Kitiala, ko e Punua Mamoe he Atua!” Ko e mena nei, ti mumui e tau tutaki tokoua ha Ioane ko e Papatiso ki a Iesu. Ko Aneterea e taha mai ha laua, mo e ko e taha foki ne maaliali ai ko ia ne fakamau e tau mena nei, ne higoa ai foki ko Ioane. Ko Ioane nei, tuga foki e tau fakamailoga, ko e kasini foki ha Iesu, ko e tama he taokete a Maria ko Salome.

Ne fuluhi atu mo e kitia a Aneterea mo Ioane ne mumui ki a ia, ne huhu a Iesu: “Ko e heigoa ha mua ne kumi?”

“Rapai na e!” he huhu e laua, “kua nofo a koe i fe?”

“Ati o mai a, mo e kikite ki ai,” he tali e Iesu.

Ko e liga ko e matahola fa he pale laa, ti nonofo a Aneterea mo Ioane mo Iesu ke he vala aho katoa ia. Ko e magaaho fakamui ne lahi e fiafia ha Aneterea mo e alumaki a ia ke kumi hana tehina, ne higoa ko Peteru. “Kua moua tuai e mautolu e Mesia,” he talaage e ia ki a ia. Ne uta e ia a Peteru ki a Iesu. Liga ko e magaaho taha ia ni ne kumi e Ioane hana tehina ko Iakopo mo e ta mai a ia ki a Iesu; ka e taha e mena, ko e aga fakatagata, ne tiaki e Ioane e vala tala nei he hana a Evagelia.

Ko e aho hake, ne moua e Iesu a Filipo, ko e tagata Petesaita, ko e maga taha ne o mai ai a Aneterea mo Peteru. Ne uiina e ia a ia: “Mui mai a kia au.”

Ne moua e Filipo a Natanielu ne higoa foki ko Patolomaio, mo e pehe: “Kua moua e mautolu a ia ne tohia e Mose ke he Fakatufono, katoa mo e tau Perofeta; ko Iesu haia, ko e tama a Iosefa, ko e Nasareta.” Ne fakauaua a Natanielu. “Maeke kia ke tupu ha mena mitaki mai Nasareta?” he huhu e ia.

“Ati hau a, mo e kitekite,” he fakaohooho e Filipo. Ko e magaaho ne o mai a lautolu ki a Iesu, ne pehe a Iesu hagaao ki a Natanielu: “Kitiala, ko e Isaraela moli, nakai pikopiko a ia.”

“Ne fioia e koe au i fe?” he huhu e Natanielu.

“Ne kitia e au a koe ke he lalo mati, ka e nakaila ui atu ni a Filipo kia koe,” he tali e Iesu.

Ne ofo a Natanielu. “Rapai na e [kakano ko e Akoako], ko koe ni ko e Tama he Atua, ko koe ni ko e Patuiki a Isaraela,” he talahau e ia.

“Kua talia kia e koe ha ko e mena tala atu e au kia koe, ne kitia e au a koe ke he lalo mati?” he huhu e Iesu. “To kitia e koe e tau mena ke mua ke he tau mena nai.” Ne mavehe a ia: “Ko e moli, ko e moli, ke tala atu e au kia mutolu nā, a taha aho to kitia ai e mutolu e lagi kua maihi mai; ko e tau agelu foki he Atua, ke o hake, mo e o hifo ki luga he Tama he tagata.”

Ne nakai leva he mole atu e mena nei, ko Iesu, fakalataha mo e hana a tau tutaki fou, ne toka e Pahua i Ioritana mo e fenoga atu ki Kalilaia. Ioane 1:​29-51.

▪ Ko hai e tau tutaki fakamua ha Iesu?

▪ Fakafeleveia fefe a Peteru, pihia foki mo Iakopo ki a Iesu?

▪ Ko e heigoa e mena moli ati talia e Natanielu ko Iesu ko e Tama he Atua?