Veveheaga 12

Papatisoaga ha Iesu

LIGA ko e ono ia e mahina he mole he kamata e fakamatala ha Ioane, ko Iesu, kua 30 e tau tau he magaaho ne hau ki a ia i Ioritana. Ko e heigoa e kakano? Ke feleveia fakafiafia? Ko e fiafia noa ni kia a Iesu ke he tuaga he gahua ha Ioane? Nakai, ne ole a Iesu ke papatiso e Ioane a ia.

Ne mafiti a Ioane ke totoko: “Ko e mena lata ke papatiso mai e koe au, ka e haele mai kia a koe kia au?” Ne iloa e Ioane ko e kasini hana ko Iesu ko e Tama uho he Atua. Ko e matakehe pauaki, ne hopo a Ioane he fiafia i loto he manava he hana matua fifine he magaaho ne fatu a Maria ia Iesu ti aahi mai ki a laua! Ko e matua fifine ha Ioane, ko Elisapeta, nakai fakauaua ne talaage e mena nei ki a ia he magaaho fakamui. Mo e talaage foki ki a ia e fakailoaaga he agelu ke he fanauaga ha Iesu mo e fakakiteaga he tau agelu ke he tau leveki mamoe he po ne fanau ai a Iesu.

Ti nakai ko e tagata kehe a Iesu ki a Ioane. Mo e iloa e Ioane ko e papatisoaga nei nakai ma Iesu. Ko e mena ma lautolu ne tokihala mai he ha lautolu a tau hala, ha kua nakai fai hala a Iesu. Ka e taha e mena, pete ni he totoko a Ioane, ne ole fakamakamaka a Iesu: “Kia eke pihia ainei ha ko e mena lata ia tautolu he eke pihia e tau mena tonu oti.”

Ko e ha ne tonu ai a Iesu ke papatiso? Kakano ha ko e papatisoaga ha Iesu ko e mena fakamailoga, nakai ko e tokihala mai he tau hala, ka ko e foaki ia ia ke taute e finagalo he hana Matua. Ko Iesu ko e tagata ta fale, ka ko e magaaho nei kua hoko mai e magaaho ke kamata hana a feua ne fakafano mai ia Iehova ko e Atua a ia ke he lalolagi ke taute. Manatu nakai a koe to amanaki a Ioane ke fai mena kehe ka tupu ka papatiso e ia a Iesu?

Ne hokotaki mai e Ioane fakamui: “Ka ko Ia ne fakafano mai au ke papatiso ke he vai, ko ia ne tala mai kia au, Ko ia ka kitia e koe e agaga kua hifo ki ai, mo e nofo i luga ia ia, ko ia haia ni ke papatiso ke he agaga tapu.” Ti amaamanaki a Ioane ke he agaga he Atua ke hifo mai ki luga he taha ka papatiso e ia. Liga ko e mena ia, ati nakai ofo a ia he magaaho ne hake mai a Iesu he vai, ti kitia e Ioane “e agaga he Atua kua hifo mai tuga ne lupe, kua hoko ki luga ia ia.”

Ka e loga atu foki e mena ne tupu he magaaho ne papatiso a Iesu. ‘Kua maihiua tuai e lagi’ ki a ia. Ko e heigoa e kakano he mena nei? Ne maama lahi e kakano he magaaho ne papatiso a ia, ko e moui fakamua hana ke he lagi to eke a ia mo tagata, ne kua liu a ia manatu. Ti ko e mena ia, kua liu a Iesu manatu katoatoa e moui hana ko e tama fakaagaga ha Iehova ko e Atua, putoia ai e tau mena oti ne vagahau he Atua ki a ia he magaaho ne moui fakamua a ia he lagi to eke a ia mo tagata.

Ke lafi ki ai, he magaaho he hana papatisoaga ko e leo mai he lagi ne fakapuloa ai: “Ko e haku a Tama fakahele hanā, kua fiafia na au kia ia.” Ko e leo ha hai a ia? Ko e leo ni kia ha Iesu? Nakai! Ko e leo he Atua. Ne maaliali ai, ko Iesu ni ko e Tama he Atua, nakai ko e Atua, tuga mo e talahauaga he falu.

Ka e taha e mena, ko Iesu ko e tama fakatagata he Atua, tuga ni e tagata uluaki, ko Atamu. Ko e tutaki ko Luka, he mole e fakamaamaaga he papatisoaga ha Iesu, ne tohi: “Ko Iesu foki, ko e hoko la ia ke he tolu gofulu e tau tau hana, kua manatu foki e tau tagata, ko ia ko e tama a Iosefa, ko e tama a ia ha Heli, . . . ko e tama a ia a Tavita, . . . ko e tama a ia a Aperahamo, . . . ko e tama a ia a Noa, . . . ko e tama a ia a Atamu, ko e tama a ia he Atua.”

Tuga ni a Atamu ko e ‘tama he Atua,’ ti pihia foki a Iesu. Ko Iesu ko e tagata mua ue atu ne moui ka fakamoli he kumikumiaga ha tautolu ke he moui ha Iesu. Ka e taha e mena, he hana a papatisoaga, ne kamata e fakafetuiaga fou ha Iesu mo e Atua, kua eke foki mo Tama fakaagaga he Atua. Ko e magaaho nei kua manako e Atua ki a ia ke liu ke he lagi, tuga fakamua, ke kamata a ia ke he puhala ke takitaki atu a ia ke toka hifo hana a tino fakaoti ke poa ma e tau tagata agahala. Mataio 3:​13-17; Luka 3:​21-38; 1:​34-36, 44; 2:​10-14; Ioane 1:​32-34; Heperu 10:​5-9.

▪ Ko e ha a Iesu ne nakai ko e tagata kehe ki a Ioane?

▪ Ha kua nakai fai hala a ia, ko e ha ne papatiso ai a Iesu?

▪ He onoonoaga ke he mena ne iloa e Ioane ki a Iesu, ko e ha ne nakai ofo a ia he agaga he Atua ne hifo mai ki luga ia Iesu?