Hagaao Atu Ki Fe e Lalolagi Nei?
Kua eke e tau lekua mo e tau mena tutupu ofoofogia mo tala he tau aho oti ke he lalolagi katoa! Ko e heigoa e kakano?
HAOHAO MITAKI FAKATAGATA: Kua papa e tau pomu ke he tau makete. Tau faiaoga mo e tau fanau aoga kua fana ke he fonua aoga. Tau tama mukemuke kua hamuti he fuluhi kehe fakaku e tau mamatua ha lautolu. Tau fifine mo e tau fuakau tane kua keli mo e kaiha he aho vakevake.
KO E TUAGA FAKALOTU: Lalago he tau lotu e tau matakau totoko he felakutaki. Fakahala e tau akoako he keli katoatoa e tau matakau tagata. Tau faifeau ne ekefakakelea e tau fanau ke he mahani fakatane mo e fifine; tau mena ufiufi he lotu. To hifo e numera ne o tapu; kua fakafua e tau fale tapu.
KO E TAKATAKAIMOTU: Hahala e tau vao uhi ma e tau mouaaga tupe. Takalekale e tau ulu akau ha kua hahala he tau tagata nonofogati mo gaafi. Kiva e vai he lalo fonua, nakai hagahaga mitaki ke inu. Ko e takafaga ika kua malona ha ko e kiva mai he tau fale gahua mo e falu puhala takafaga fou. Puke e matagi he kiva.
KO E GAHUA TUPE: Ko e totogi he taha e tagata he matakavi Sahara i Aferika kua hokotaki ke moua kavi $480 (U.S.) he tau. Ko e lotokai he tau kautaha pisinisi kua takitaki atu ke tomo e tau pisinisi, ti totou afe ne nakai fai gahua. Ko e tau lagatau kaiha kua galo noa e tau tupe he tau tagata fakahu tupe ne fakaputu tali mai he tau momoui gahua tupe ha lautolu.
TAU HOGE: Kavi ke he 800,000,000 tagata ke he lalolagi katoa ne momohe hoge tumau.
FELAKUTAKI: Molea e 100,000,000 tagata ne mamate ha ko e felakutaki he senetenari ke 20 aki. Loga e tau kanavaakau niukilia ne maeke ke tamate lagaloga aki e tau tagata oti. Tau felakutaki he motu. Kua hoko e fakamatakutaku ke kaputia e lalolagi katoa.
TAU TATALU MO E FALU GAGAO: Kamata mai he 1918, ko e fulu Sepania ne tamate toko 21,000,000 tagata. Ko e AIDS he magaaho nei kua eke “mo gagao ne mua atu e matematekelea he fakamauaga tuai he tagata.” Ko e kanesa mo e gagao ate kua tamai e maanu ke he lalolagi katoa.
Kia nakai onoono ke he taha ni e vala tala. Ko e tau mena tutupu takitaha kia a nei? Po ke ko e vala he tau mena tutupu tumau he lalolagi ne kua fai kakano moli?
[Puha/Fakatino he lau 5]
Fakaalofa Moli Kia e Atua?
Ne tupetupe ha ko e tau mena ofoofogia ne tutupu po ke he galo e tau mena uho fakatagata, tokologa e tagata kua manamanatu ke he kakano ne nakaila fakalava mai e Atua ke puipui e tau mena pihia.
Fakaalofa moli e Atua. Kua foaki e ia e tau takitakiaga falanaki mo e fakatotoka moli mogonei. (Mataio 11:28-30; 2 Timoteo 3:16, 17) Nukua fakatoka e ia e fakaveaga ke fakaoti tukulagi e favale, gagao, mo e mate. Ko e tau foakiaga hana kua fakakite e nakai fakaalofa hokoia ni a ia ke he tau tagata he taha ni e motu ka e ke he tau tagata he tau motu, tau magafaoa, mo e tau vagahau oti.—Gahua 10:34, 35.
Lahi fefe e fakaalofa ha tautolu? Iloa nakai e koe ko hai e Tufuga he lagi mo e lalolagi? Ko hai e higoa hana? Ko e heigoa hana finagalo? Ne tali e ia e tau huhu nei i loto he Tohi Tapu. I loto ne talahau e ia ki a tautolu e tau lakaaga ka taute e ia ke fakaoti aki e favale pihia mo e gagao mo e mate. Ke aoga mai ai, ko e heigoa kua lata ia tautolu ke taute? Kua lata ia tautolu ke ako hagaao ki a ia mo e hana finagalo. Maeke fefe ia tautolu ke amanaki ke aoga mai he hana tau foakiaga ka nakai fakakite e tautolu e tua ki a ia? (Ioane 3:16; Heperu 11:6) Kua latatonu foki ke omaoma ke he hana tau poaki. (1 Ioane 5:3) Kua lahi nakai e fakaalofa hau ke taute e mena ia?
Ke maama e kakano ne fakaata he Atua e tau tutuaga he vaha nei, kua latatonu ia tautolu ke maama e matakupu aoga lahi. Fakamaama mai he Tohi Tapu e mena ia. He lau 15 he tohi nei, kua fakakite mai e matakupu nei.