‘Ne Nakai Fakateliga a Lautolu’

KO E fakateaga ke he tau hatakiaga kua maeke ke pu atu ke he matematekelea lahi.

I Darwin, Ausetalia, ne uhouho e tauteute ma e tau aho fiafia faiagahau he 1974 he magaaho ne tagi e tau pu ke hataki ke he afa hane hau. Ka e ne nakaila malona ia a Darwin he afa ke he kavi ke 30 e tau tau. Ko e ha mogonei? Laulahi he tau tagata ne nonofo i ai ne nakai onoono fakahokulo ki ai ko e taha mena kua hagahaga kelea moli ato kamata agataha e matagi ke hihi e tau tuafale mo e moumou e tau kaupa he tau fale ne fakapukupuku ai e tau tagata. He pogipogi hake, ne kua malona tiaki e taone.

I Kolomopia ia Novema 1985, ne pa e mouga. Ne tataka e kiona mo e aisa ti malua hifo e pelapela ne tanumia molea e 20,000 tagata he taone ko Armero. Kua nakai kia fai hatakiaga tuai? Ne kua fai mahina he talulu e mouga. Pete ia, ha kua aga he nonofo he kaukau he mouga pa, laulahi he tau tagata i Armero ne nakai tupetupe. Ne moua he tau takitaki he motu e tau hatakiaga to nakai leva ti to e matematekelea lahi, ka e tote maka e gahua ha lautolu ke hataki e tau tagata. Ko e tau fakailoaaga he letio ke he tau tagata ne taute he lali ke fakamafanatia he tau tagata. Ko e tau lakau fakataogo leo he fale tapu kua fakailoa ke he tau tagata ke fakatumau e fakatotoka. He magaaho afiafi, ne ua e papa lalahi mamahaki. To tiaki kia e koe e tau koloa hau ka e hola? Gahoa ni e tagata ne lali ke fehola ti kua to mui lahi mahaki.

Fa mahani e tau tagata kumikumi ke he lalofonua ke hako e tau fuafuaaga ko e to ki fe e mafuike. Ka e lavea a lautolu ke fuafua e magaaho tonu ka to ai. He 1999, ne mamate e kavi ke 20,000 tagata ha ko e tau mafuike ke he lalolagi katoa. Tokologa ia lautolu ne mamate ne kua manatu ko e mena to nakai tupu ki a lautolu.

Fehagai Fefe a Koe ke he Tau Hatakiaga Mai Ni he Atua?

Kua fakamaama fakamaaliali mai tuai he Tohi Tapu e tau mena ka tutupu ke fakamailoga aki e tau aho fakamui. He tutaki ke he mena ia, kua fakailoa mai ki a tautolu ke manamanatu ke he “vaha ki a Noa.” “Ke he vaha ka e nakaila hoko e fakapuke,” ne lavelave e tau tagata he tau gahua aga mau he moui, ka e ne nakai fakauaua kua tupetupe a lautolu ha ko e tupu lahi he favale. Ke he hatakiaga ne age he Atua puhala mai he fekafekau hana ko Noa, ne ‘nakai fakateliga a lautolu ato hoko mai e fakapuke, mo e uta kehe a lautolu oti.’ (Mataio 24:37-39) To liga omaoma nakai a koe ke he hatakiaga? Kua taute pihia nakai e koe he mogonei?

Ka e kua ane nofo a koe i Sotoma, tata ke he Tahi Mate, he vaha he tagata ko Lota, ko e nefiu ha Aperahamo? Ko e fonua he kaukau he maaga ne kua tuga e parataiso. Ne monuina e maaga. Ne nakai tupetupe e tau tagata. Ke he vaha ha Lota, “ne kai a lautolu, ne inu a lautolu, ne fakafua mai, ne fakafua atu, ne to mena, ne ta fale.” Ko e fakalatahaaga he tagata ne nonofo ai a lautolu kua mahani kelea muitui foki. To liga uta nakai e koe ke he loto e hatakiaga he magaaho ne vagahau a Lota ke he tau gahua kua kelea? To liga fanogonogo nakai a koe he tala atu a ia kua mauokafua e Atua ke moumou e maaga ko Sotoma? Po ke to manatu a koe ko e vaiga, ke tuga e tau tama tane ka eke mo tau figona tane ha Lota a mui? Kua liga kamata nakai a koe ke hola ka e liu ni mogoia haga ki tua, ke tuga e hoana ha Lota? Pete ni he nakai uta fakahokulo he falu e hatakiaga, ko e aho ne fano kehe ai a Lota i Sotoma, ne “liligi hifo e afi mo e taio mai he lagi, mo e fakaoti ai a lautolu oti.”​—Luka 17:28, 29.

Ko e laulahi he vaha ha tautolu kua nakai fakateliga. Ka e ko e tau fakafifitakiaga ne kua fakamau he Kupu he Atua kua eke ia mo hatakiaga ki a tautolu, ke fakamalolo a tautolu KIA MATAALA!

[Puha/Fakatino he lau 22]

Ne Hoko Moli Kia e Fakapuke he Lalolagi Katoa?

Tokologa e tau tagata kumikumi tala ne pehe Nakai. Ka e pehe e Tohi Tapu E.

Ne tutala a Iesu Keriso hagaao ki ai, mo e ne moui a ia he magaaho ne hoko ai e mena ia, nukua onoono mai he lagi.

[Puha/Fakatino he lau 23]

Ne Moumou Moli Kia a Sotoma mo Komora?

Kua fakamoli he keli kelekele e mena nei ne tupu.

Kua totoku foki he tau fakamauaga tala tuai he lalolagi.

Ne fakamoli e Iesu Keriso e mena ne tupu, mo e ko e mena ne tupu kua hagaao ki ai i loto he 14 e tohi kehekehe he Tohi Tapu.