Hokotaki he Tau Tagata Fakapuloa he Kautu

“Ko e Maka Fakamanatu ke he Agaga Kau Auloa”

KUA tata lahi ke he hoe fakahiku i toga matua a Sepania ne tu tavinivini ai e patu makatea lahi mahaki ne kua iloa ko e Maka a Kiparata. Ke he tau teau he tau tau, kua eke e maka nei mo fakamoliaga nonoiki ke he taufetoko fakapolitika mo e nakai fia loto taha he lalolagi katoa. Ti kua kehe ai, he magaaho ku kua mole kua eke e Maka a Kiparata mo fahi tua he taha fakakiteaga he mahani kau auloa mo e fefakalatahaaki ko e mena kua lavea ke kitia ai he lalolagi he vaha nei.

Kua tolu maka ne kilomita he mamao mai he Maka kua tu ai e taone a La Línea, i Sepania. Kua ha ha i ai e gahua talaga fale he Fale he Kautu he Tau Fakamoli a Iehova ne kua tamai fakalataha e tau teau he tau tagata gahua noa kua manako lahi ke foaki ha lautolu a tau magaaho mo e tau malolo. He gahua fakamalolo a lautolu ke fakatu hake e kaina kua lata ma e tapuakiaga ke he Tufuga, ko e Atua ko Iehova, kua eke foki e fahi motu homo ue atu he Maka a Kiparata ke nakai mua mai ka fakatatai mo e gahua ne fa e taute.

Kua fakafano mai he tau tagata tukuogo he Kautu he vala motu ia he lalolagi e hokotaki ne mui mai:

“Kua hiva e teau he tau tagata fiafia lahi ne gahua noa he aho mo e po, he kamata mai he magaaho pale la he aho Falaile, ia Sepetema 24, 1993. Ti ko e hola fitu he magaaho afiafi he aho Tapu, kua taha e fakamailoga fou ne kua fakatu hake kua fakailoa aki e fale ko e Fale he Kautu he Tau Fakamoli a Iehova, mo e kua fakaaoga ai foki e fale fulufuluola fou ma e hana feleveiaaga fakamua ke he tau tagata oti.

“Kua tokologa e Tau Fakamoli he matakavi tata ko Kiparata ne lalaka mai he katofia ke lagomatai ha lautolu a tau matakainaga Sepania. ‘Kua nakai maeke e tau miha feveheveheaki fakapolitika ke fakalolelole ha mautolu a aga fakamatakainaga he lalolagi katoa,’ he fakamaama he taha he tau tagata ne gahua noa, ko e tagata he matakavi ni a Kiparata. Ne lafi mai foki a ia: ‘He falu a tau tau kua mole, ne o age e tau kapitiga i La Línea, ke lagomatai a mautolu ke ta ha mautolu a Fale he Kautu i Kiparata, ti ko e magaaho nei kua fiafia a mautolu ke taui e mahani totonu ia.’

“Ke fakakatoatoa aki e tau laliaga malolo ne foaki noa he tau fakapotopotoaga he Tau Fakamoli a Iehova mo e tau teau he tau tagata makaka ne lagomatai ne kua o mai he fahi a Andalusia, kua fifili ai e taone a La Línea ke foaki noa e vala kelekele ne kua lata tonu ai. ‘Ke he mahani tuai, ne fa foaki tumau he tau pule malolo Sepania he matakavi e vala kelekele ke ta ai e tau fale he lotu Katolika,’ he fakamaama he tupule he maaga a La Línea, he magaaho ne ahi atu a ia ke he talagaaga fale. ‘Ti ko e ha he nakai taute foki e mena ia ma e falu lotu kehekehe foki? Kua nava lahi au ke he mahani nakai fulukovi he tau tagata gahua noa, mo e ke he haku a logonatiaaga kua lata tonu a lautolu mo e ha mautolu a lagomatai. Kua lata na tautolu ke moua lahi e faga agaga pehenai he lalolagi mavehevehe he vaha nei.’

“Ne vagahau a ia hagaao ke he Fale he Kautu ‘ko e maka fakamanatu ke he agaga kau auloa.’ Kua moli, ko e vala ne kua mua e homo ue atu nakai ko e fakatokatokaaga he talagaaga po ke lahi he fale. Ka e kehe, ha ko e mena moli ne kua nava e tau tagata tokologa he maaga ki ai, ko e talaga oti ni he tau tagata gahua noa mo e kua fakatu hake ni ke he 48 e tau tula!”

Kua kitia moli ai ko e Tau Fakamoli a Iehova i La Línea mo e hana tau matakavi ne viko takai kua mahani fakamoli a lautolu ke he tau kupu ia Kalatia 6:10. Ko e mena kua ha ha i ai e akonakiaga he aposetolo ko Paulo ke he faoa talitonu: “Hanai, kia mahani mitaki a tautolu fakalata ke he tau aho ha i ai ia tautolu, ke he tau tagata oti kana, ka e au atu ke he faoa ne tua.”