Talagaaga Fale he Kautu—Ko e Vala Aoga he Fekafekauaga Tapu
1. Ko e heigoa kua fitā he taute he talagaaga Fale he Kautu, ka ko e heigoa ne toe agaia ke taute?
1 Ke he lima e tau kua mole, 16 e Fale he Kautu ne talaga, 2 ne fakafoou, mo e 8 ne fakalahi mo e fakafoou he la matakavi ha Niu Silani. Kua loto fakaaue lahi a mautolu ke he gahua lahi ne taute he tau Komiti Ta Fale he Matakavi mo e ki a lautolu oti ne lagomatai e tau komiti. Pete kua lahi mahaki e gahua kua oti, ka kua lahi agaia e gahua ne toe ma e talagaaga Fale he Kautu. Maeke fēfē ia tautolu oti ke lalago e vala aoga nei he fekafekauaga tapu ha tautolu ki a Iehova?—Fakakite. 7:15.
2. Maeke fēfē ia tautolu ke lalago e gahua talagaaga Fale he Kautu?
2 Kia Fakamakai: Kaeke ko e matakainaga fakailoa kua papatiso a koe, kua uiina atu e mautolu a koe ke fakaatā e koe a koe ke gahua mo e Komiti Ta Fale he Matakavi he fakapuke e Kingdom Hall Volunteer Worker Questionnaire. (Sala. 110:3) Ko mutolu oti ne foaki noa ke gahua kua lata ko e tau tagata gahua fakamakai mo e ha ha e agaaga kaufakalataha. (Sala. 133:1) Pete ka nakai fai pulotu ta fale a koe, maeke agaia a koe ke lahi e lagomatai ke kautu e matagahua ta fale. Maeke foki ia koe ke moua e fakamahaniaga ti fakaatā a koe ke fakaaoga fakalaulahi he vahā i mua.
3. Ko e heigoa falu puhala kua maeke ia tautolu ke fakakite e lalago ha tautolu ke he fakaholoaga nei?
3 Kaeke nakai maeke ia koe ke lagomatai, maeke ia koe ke fakakite e lalagoaga he fakamalolō falu ne kua maeke ke fakalataha ke he fakaholoaga ia. Maeke ia koe ke taute e tau kotofaaga he fakapotopotoaga ne lago ki a lautolu kua o atu ke he gahua ia. He fakatokatoka tuai, maeke e tau motua ke kikite kua leveki fakamitaki e fakapotopotoaga ka o atu falu ke he matagahua ta Fale he Kautu. Nakai fakauaua, kua fiafia a Iehova ka kaufakalataha a tautolu ma e fakalaulahiaga he tau mena he Kautu.—Hepe. 13:16.
4. Maeke fēfē ia tautolu ke atihake a lautolu ne fakalataha ke he tau matagahua ta Fale he Kautu?
4 Kia Atihake: Kua loga e tau magaaho mo e gahua malolō kua putoia ke he talagaaga he tau fale mo tapuaki. Maama ai mogoia, ko lautolu ne uiina ke lagomatai e tau matagahua ta fale to fai magaaho ka nonofo kehe mai he tau fakapotopotoaga ha lautolu. Kia mafiti a tautolu ke navanava mo e fakamalolō a lautolu kua foaki noa ke he gahua ta fale, nukua taute e tau foakiaga ke leveki e ‘feua nai kua lata.’—Gahua 6:3; Roma 14:19.
5. Maeke fēfē e tau tagata foaki noa ke ta fale ke fakakite e lagotatai?
5 Kia Lagotatai: Ko e fakamatala e Kautu he Atua ko e matapatu gahua fakateokarasi ha tautolu. (Mareko 13:10) He tokaloto e mena nei, kua lali lahi e tau Komiti Ta Fale he Matakavi ke setulu e tau matagahua ke nakai nonofo kehe noa mai e tau matakainaga foaki noa mai he tau fakapotopotoaga ha lautolu. Pihia foki, kua eketaha e tau tagata foaki noa ke ta fale ke lagotatai he leveki e tau kotofaaga loga ha lautolu. Kua taute e lautolu e tau fakatokatokaaga ke iloa mitaki to leveki ke he ha lautolu a tau kotofaaga he fakapotopotoaga ka o kehe a lautolu.
6. Ko e heigoa ne moua ka kaufakalataha e tau tagata oti he fakapotopotoaga ke fakalaulahi e tapuakiaga mooli?
6 Kua fakamaama he aposetolo ko Paulo e tau tagata he fakapotopotoaga kua kaufakalataha “kia ati hake ai e tino e ia a ia ni ke he fakaalofa.” (Efeso 4:16) Ko e fakaalofa ha tautolu ma Iehova mo e ma e tapuakiaga mooli ka fakaohooho a tautolu ke kaufakalataha auloa ke fakamatala e tala mitaki mo e lalago e talagaaga Fale he Kautu.