Holo ki Mua e Fakaholoaga Talaga Fale he Kautu
1 He 1987, ne fakailoa mai he uho he Kingdom Ministry ia Me kua fakatu e fakaputuaga tupe pauaki ke lagomatai ke talaga mo e fakafou e tau Fale he Kautu i Niu Silani katoa. Tote maka e manamanatu ha tautolu ke he tau monuina ka tupu mai he tau kamataaga ikiiki pehena. Ne kamata agataha a tautolu ke logona katoa e Salamo 92:4 ne mafiti ke talahau: “Ha kua fakafiafia mai e koe au ke he hāu a gahua, Iehova na e; to kalaga fiafia na au ha ko e tau mena ne eke he hāu a tau lima.”
2 Kua olioli lahi a tautolu he magaaho nei ke he tau gahua kua taute ai. Ke he tau puhala kehekehe, kua igatia a tautolu oti mo e kotofaaga he fakalataha ke he feua nei. Ne taute pihia e tautolu he foaki e tau tupe lalahi po ke ikiiki ke lagomatai fakatupe ke talaga e loga atu he tau fale mo tapuaki i Niu Silani katoa. Tokologa foki e tau matakainaga ne foaki fakaalofa ha lautolu a tau koloa ke fakaaoga pihia foki mo e ha lautolu a tau magaaho, tau pulotu, mo e tau taleni ke he tau matagahua nei. Ko e kautuaga he fakaholoaga katoa ne maeke ni ha ko e takitakiaga, lagomataiaga, mo e tau fakamonuinaaga loga ha Iehova ke he tau laliaga kau auloa ha tautolu.—Salamo 127:1.
3 Ke he tau Fale he Kautu i Niu Silani katoa kua ha ha ai e puha ma e tau tagata fakailoa ke tuku ha lautolu a tau mena fakaalofa ke he Kingdom Hall Fund. Ko e fakaputuaga tupe nei kua tukulele ke fakatupe aki e tau matagahua talaga fale i Niu Silani ni. Tali mai he fakatu e Society Kingdom Hall Fund he 1987, kua foaki fakamokoi e tau matakainaga, ati maeke ai ke ole tupe mo talaga aki e tau Fale he Kautu. Kua fitugofulu ma fitu e fakapotopotoaga he motu nei kua aoga mai he fakaholoaga nei. Loga e fakapotopotoaga ka liga nakai maeke ke talaga e tau Fale he Kautu kua fou po ke fakafou a lautolu ne kua lata.
4 Pete ia, kua hoko mai e magaaho ke fakalaulahi atu e onoonoaga ha tautolu ke molea atu he tau manako he tau matakavi ha tautolu ni. He magaaho nei kua mafiti lahi e fakaholoaga talaga Fale he Kautu ne fa e taute ke he lalolagi katoa. Kua manako lahi mahaki ke lagomatai e tau fakapotopotoaga he tau motu ne lahi e mativa fakatupe. Ke he ha tautolu a la matakavi, kua manako lagomatai fakatupe mo e ke talaga e tau fale i Niue, Rarotonga mo Tonga. Ke he magaaho tonu nei, ko e tau tupe he Society Kingdom Hall Fund kua fakaaoga ke he tau matagahua ni i Niu Silani. Kua taute ai falu hikihikiaga ke he ha tautolu a fakaveaga matafakatufono ke fakaata e tau fakaputuaga tupe ia ke ta atu ma e tau matagahua pihia he falu motu. Ka e he magaaho nei, ka manako a koe ke foaki mena fakaalofa ma e tau matagahua talaga fakateokarasi he tau motu i fafo i Niu Silani, fakamolemole tohi e sieke ke he “Watch Tower Society” mo e tohi fakamahino i tua he sieke ko e tupe ia ma e “overseas projects.” Ti tuku e sieke he puha “Contributions for the Society’s Work−Matthew 24:14,” po ke fakafano fakahako atu ke he la ofisa. Ko e tau foakiaga fakaalofa pihia to nakai moua e risiti ke taute aki e tukuhau.
5 Manako agaia e lalolagi katoa ke talaga Fale he Kautu. Laulahi he tau fakapotopotoaga nei haia i Aferika, Asia, Amerika Lotouho mo Tokelau, mo Europa Uta. Lahi he gahua kua fita he taute kua mai he foaki fakamokoi he tau matakainaga tane mo e fifine he lalolagi katoa. Ne hokotaki mai he 2001 Yearbook: “He fakaholoaga nei, ke he 30 e motu, 453 e Fale he Kautu ne kua mau he hoko mai ke he mogonei, mo e hane talaga foki 727 e fale. Kua peehi e aoga he taute e tau palana Fale he Kautu kua fakamau ki ai ma e tau motu takitaha ke fakaaoga e tau koloa mo e tau puhala ta fale ni he motu. I Kenya, ne fakaaoga e tau maka tavili; i Togo fa mahani ke fakaaoga e tau piliki; i Cameroon ne mahuiga e tau poloka simeni ne oti ti puga he magaaho fakamui. Ke he puhala nei, to mafiti e tau matakainaga he matakavi ia ke maeke ke iloa e tau puhala gahua kua lata ma e tau matapatu gahua he fakaholoaga he motu.”
6 Kua kitia ke he tau matakavi katoa i Aferika e moli he fakamonuinaaga ha Iehova ke he fakaholoaga nei. He onoono a tautolu ke he tau fakatino he falu Fale he Kautu ne kua talaga, manamanatu la ke he lauiaaga ne tamai he tau talagaaga pehenei ke he gahua he Tau Fakamoli a Iehova! Kua moli e mena nei ke he tolu e fahi kehekehe—ko e kaufakalataha fakamatakainaga he lalolagi katoa, ko e lauiaaga ke he matakavi ia, mo e malikiti hake ia lautolu ne fakalataha ke he tau feleveiaaga he fakapotopotoaga. Kua fakakite mai he uho nei e tau Fale he Kautu ne talaga i Aferika, to fakakite he tau fufuta he tau aho i mua he Ha Tautolu a Fekafekauaga he Kautu e holo ki mua he fakaholoaga talaga Fale he Kautu he falu fahi he lalolagi.
[Tau Fakatino he lau 3]
REPAPILIKI A AFERIKA LOTOUHO
Bimbo, Bangui
Begoua, Bangui
[Tau Fakatino he lau 4]
Ukonga, Tanzania
[Fakatino he lau 4]
Accra, Ghana
[Fakatino he lau 4]
Salala, Liberia
[Fakatino he lau 4]
Karoi, Zimbabwe
[Tau Fakatino he lau 4, 5]
Allada, Benin—Fale he Kautu he mogo fakamua
Allada, Benin—Fale he Kautu fou
[Fakatino he lau 5]
Kpeme, Togo
[Fakatino he lau 5]
Sokodé, Togo
[Tau Fakatino he lau 4, 5]
Fidjrosse, Benin
[Fakatino he lau 6]
Lyenga, Zambia—Fale he Kautu he mogo fakamua
[Fakatino he lau 6]
Lyenga, Zambia—Fale he Kautu fou
[Fakatino he lau 6]
Kinshasa, Congo
[Fakatino he lau 6]
Musambira, Rwanda